¹ Caako tsenacja Eliseo roapiya rsoaji iinarro lricafietanda pia ienipe mayanicalri ioya. Lriako rorso: ''Warsa piawa ajaiteji naapiya pjiomi njaji piipaneta, pia piofawa pada jiipai nakojle, ima Dio imeenacaca maawitacai lrinakojle jliaji jiipai, siete walria oonia watsa maawitacai caotsa anjí.'' ² Niini rsoaji iinarro rsoepa cayoji lricaite capisho rorso jliaji atsia Dio irsodalri. Roawa roopaneta iapiya njiteo roá carro roofawa njepaite rikó njaji filisteonai siete walria oonia. ³ Njite siete walria oonia jiapodamina rodiawa filisteonai jipaite ioya, niini roacawa Irael italricanaa iderse rotatjácarro lriinai caiwi rikotsa lridietá carro rorso roopana njite rsopaite tsacja. ⁴ Caako cadana toa jliaji talricanaati Giezi iapiya, lrirsodalri jliaji atsia Dio irsodalri, lriako lrirso: ''Pinaitja matsiacalri norso, picaite njomi pjiomi njaji matsiaperri Eliseo inaitjalri.'' ⁵ Njite, lricaitepe cádanako toa talricanaati irso koanca Eliseo icafietaca pada iempepi mayamicalri ioya, rono talricanaati iderse, roatsa rsoaji iinarro mayandarro pia ienipe, rotatjá carro talricanaati iinai jliaji roopana njite rsopaite tsacja. Niini Giezi iako talricanaati irso: ''Pjia, no-talricanaa, icatsa jlidoaca jliaji iempeti, njite alri-tsacja jliaji roenipe Eliseo icafietalri mayamicalri ioya.'' ⁶ Niini talricanaati itatja cádanako roenipe nakó, rocaite jlimi matsia koan piaca lrinako. Niini jliaji talricanaati lricaite pada lrirsodalri cakonaite irso: ''Pidieta rorso pjiomi njaji royarro pia, pjiomi njaji ropania iinaca rsopaite rikope, njite idietaotsa rorso pjiomi njaji ropania iinaca roá cádanaco pia nakjoite atee panaya. ⁷ Eliseo yaawa Damasco lrikojle, Ben Hadad iderse, Aram italricanaai, mitsa caifiacani. Nacaite njemi talricanaati irso: ''Aniji wainai jliaji atsia Dio irsodalri.'' ⁸ Niini talricanaati iako Hazael irso: ''Pjipa pidee pada regalo, piáa-carroatsa picapa lriderse jliaji atsia Dio irsodalri, njite pitatjaotsa pjimi Dio iinai lrinacjoite jliaji atsia Dio irsodalri, cayoji: ¿Capjaotsa nowafeetacaotsa lrioya jliaji norrenaa?'' ⁹ Niini Hazael inaitja cayo, lria lricapa lriderse njite lridee pada regalo. Lridee pjiomitsa inaaniti dape Damasco lrikjoite, lrideena coarenta camello nakona. Niini Hazael ioca yeemawa Eliseo icoemjete, lriako: ''Jliaji talricanaati Ben Hadad, Aram italricanaa, caidalriji pienipe sho lrimeenaca njoa piderse, ima lriomaca lrianjíica lriwafeeta cadaotsa lri renaa ioya.'' ¹⁰ Niini Eliseo iako lrirso: ''Pidia picaite Ben Hada irso, wadetsantjaotsa matsiaca pjia pi-renaa ioya, Mitsa Dio icañjata nocapa mayamicaotsani.'' ¹¹ Njite Eliseo icapa Hazael irso, njite capaiman lriajiacacawa lricapá capoani, njite ikena lriiyaca jliaji atsia Dio irsodalri. ¹² Njite Hazael itatja jimioni: ¿Koadadao piiya nominalri? Njite jliepacani, lriako: ''Ima noanjica njaji maatsirri pinaitjalriotsa narso njaji inaiki Irael lrikoperri. Pimjaitacaotsa naapana, piino caotsa njaji yempetipetoa matseeta sho, piyoá caotsa pamoyoa njaji kerraitalri, njite poyoá caotsa nawawa njaji kewedan perri.'' ¹³ Njite Hazael jiepani: ''¿Kocantja jliaji pirsodalri, lrinaitjá carrontja cayo? Cakoada pjatoa apana tsiino noya. Mitsa Eliseo iako lrirso: NoMinalri icañjata no-capa, pjia caotsa talricanaati nanako njaji Aram lrikope.'' ¹⁴ Icamina Hazael iawa Eliseo ioya lri-talricanaa iderse, niini lri-talricanaa itatja jlimioni koanca lriako lrirso jliaji atsia Dio irsodalri lrinako. Njite Giezi jiepani, lriako lrirso: ''Lricaite, piwafetacaotsa pi-yaamikje ioya.'' ¹⁵ Mitsa tjewaijletsa, Hazael jipa pamaca pajleti, lripotsietani ooni riko njite lricadaani Ben Hadad yeekoa nako mayaní carron, caitsa mayamicani. Niini Hazael nacja italricanata lriarrontacao. ¹⁶ Cinco walria oonia nako, talricanaati caami Yoran, Acab irri, Irael italricanaa, Joram iniita italricanaataca. Josafat irri piacani, Judá italricanaa. Lriniita pia lritalricanaataca Josafat caojli pia talricanaati Judá lriko. ¹⁷ Joram irso pia kena trenta y do jamolri lripekirrica lriniita caojli pia lritalricanaataca. Ocho jamolri lritalricanata piaca Jerosalén lriko. ¹⁸ Joram inaitja cayotsa nanaitja capisho pia njaji talricanaatinai lripjeyadape Irael lrikope, nanaitja capisho njaji Acab iipaneta; ima jlitaca lriinoa Acab íito. Lrinaitja njaji maatsiperri Dio ipeyajle. ¹⁹ 19Mitsa, Dio, korrin lripeekoca Judá lriicjaote jliaji lrirsodalri David, ima Dio icaite piaca David irso, pada lriipaneta nakjoite minítsa italricanaatacaotsa Judá lriko. ²⁰ Joram jiawalri pia, Edom yeema lrikjoete jliaji Judá italricanaa, ima nacadaaca narsowao njawaacatsa pada natalricanaawa. ²¹ Njite, Joram iawa naapiya njaji lricomandante-perre Zair lrikojle, njite lridee tsacja pjiomi njaji lri-caballon cacarretanpe. Njite njaji Edom lrikope na-korrarrata Joram, lri-comandantenai njite njaji lri-caballon cacarretanperri, mitsa deepi rikotsa njeniko naoya napitó carro naoya. cayotsa napitocawa njaji Joram inaikite naapana lrikojle. ²² Niini, caipia manatsa Edon iemacawa Judá italricanaaca ikjoete atee panajiete. Cayo tsacja njaji Libna lrikoperri, jliawalri piatsacja neema Judá ikjoete. ²³ Pjiomi njaji Joram inakoapana perri, pjiomi njaji lrinaitjaji, paoketacana lri rikoda jliaji paperra nadanacawa nanakoapana nako njaji talricanaatinai Judá lrikoperri pia. ²⁴ Cayotsa mayamica Joram lriwafeetá carro nainai njaji jlinirri-naipemi. Nadawani nakodapitsa David iyacalre rikó. Njité dalri, lrirri Ocozia jimao talricanaatica lriarrontacao. ²⁵ Doce walria nako oonia talricanaati caami Joram, Acab irri, Irael italricanaa, Ocozia, Joram irri, Judá italricanaa iniita italricanaataca. ²⁶ Ocozia irso piakena venti do oonia lripekirrica nako lriinita caojli pia lritalricanaataca. Lritalricanaata pia pawalria ooni Jerosalén lriko. Atalía pia roipitana rsoaji jlidoa, Omri iito, Irael italricanaa. ²⁷ Ocozia inaitja cayoji nanaitja capisho njaji Acab ipaneeta; lrinaitja maatsi Dio ipeyajle, nanaitja capishotsa njaji Acab iipana lrikoperri, ima Acab iipaneta itsimarreca jliaji Ocozia. ²⁸ Ocozia iawa Acab irri iapiya, Joram, nainoacacarro Hazael ikjoete, Aram italricanaa, Ramot lrikojle Galaad lrikoda. Mitsa, njaji arameonai nanaitja lriyaoniwa jliaji Joram. ²⁹ Niini Joram idiawa Jezreel lrikojle lritapiacá carroa lriyaoni ioya nanaitjalri lriso njaji arameonai nainoacá cádanakoa Ramot lriko, lrinoaca cádanako Hazael ikjoete, Aram italricanaa. Niini Ocozia, Joram irri, Judá italricanaa iáa icapa Joram iderse, Acab irri Jezreel lrikojle, ima cayaonica Joram.