¹ Niini Eliseo icaiteca: ''Jimi njaji yakoti Dio icaiterri. Cayo lricaiteca jliaji wa-Minalri: Tjeweena, cayokenaotsa jerri, anjí yacaalre ipananoma, itaitaotsa iwentaca paita shotsa moneda madalrida kilo arina matsiaperri, njite sei kilo cebada paita moneda ikoada sho tsacja.'' ² Njite jliaji cakonaite ikitsindataca jliaji talricanaati, iako Eliseo irso: ''Korriotsa cayó carroca jliyapacao, ajantja Dio imjeko cadantja jliaji eeno ipananoma cayó carro jliyapacao. Niini Eliseo iako lrirso: ''Cayoatsa jliyapacao, njite piocapacaotsa pitji sho cayocaotsa, mitsa korriotsa pinjá carrocaotsa nanakjoite.'' ³ Njite cadana niini piaca coatro atsianai irsocape jliaji ipoati wepem nadaki nako, nemacawa tsoomi yacaalre ipananoma ioya. Naaco narsowaca: ¿Koampecantja wawapaca mayamica fa anjí? ⁴ Kotsa pacapjenca injaodati Samaria lriko, fewa cadao nirsetsa mayami faa. Matsiapja wacawa naofacawa lriko njaji tsolrodaonai Siria njité perri. Corri cada naino faa, caafi catsaotsa faa, mitsa naino caaa faa, mayaninaotsa faa.'' ⁵ Niini dainoma nakojlena njenikowa naa-carroena naofacawa lriko njaji tsolrodaonai Siria lrikoperri; Njite naocawa nirse tekjoa pjatoa naoya, njite korri koca nacapa niini. ⁶ Ima jliaji wa-Minalri icadaa pia arameonai jimica cayoji aima capisho nanoca naicjaolre caballo njite njaji natsoetaji carreta, njite nainai capisho pja papoko tjacja tsolrodaonai aimadan, niinnaako narsowaca njaji arameonai: ''Jliaji talricanaati Irael rikoda inaica panjí lrikitsiñapewa wakjoete njaji talricanaatinai hitita lrikope njite egipcionai tsacja.'' ⁷ Niini dainomjete toa njenico napito njiteo; namaca napanaita, na-caballon, na-borron, pjiomi naofacawa lriko pia koampiacatsa naofacawa, napitoa, korricapoa naoma mayamicana. ⁸ Nacapa cádanako tekjoite pjatoa naofacawa lriko pia njaji arameonai njaji carrenaaperri nadaki nako, natsoomita pada pana panti naofacawa lriko pia njaji arameonai, niini nainjaca, nairra tsacja; njepa tsacja narsowao napalraatanim, nawirrotem, natsayanim nadee carro nadawana. Naa tsenacja pada pana lrikojle, njite cayo tsenacja nanaitjaca. Nadawa nadawa narsowao pjiomi lriitada. ⁹ Njite nacaite narsowaaca: ''Kotsa matsia-lrica cayoji wanaitja capisho.'' Ima jliadaa jalredaocaca jliaji pacaawaca yacoti matsiaperri, mitsa faa icaamitsa wamakoitaca nanako njaji. Wawapa cadaa jaalreca waicawa, nanjiiwatsa faaca irso maatsicalri. Warsa waawa talricanaati iipana lrikojle wacaité carro jlimi.'' ¹⁰ Niini naacawa, njite nawana njaji iwapacape yacaalre ipananoma, naako narso: ''Weni wacapa naofacawa lriko njaji arameonai, mitsa korritsa koca wacapa niini, korri pjemi pada niini, mitsa nintsa nacaballon, naborron napapiji, njite napanaitape pjiomi cayotsa niini capishotsana.'' ¹¹ Ikeena nawanaca cjaida njaji iwapacape pantinoma nacaité carro lrinako jliaji nacaiterri njemi, cayotsa nanjica pjiomi talricanaati dapana lriko lrinako. ¹² Njite jliaji talricanaati Irael rikoda jiniko yemao deepi riko, lriako narso njaji lrirsoperri: ''Nocaiteotsa jimi koadaca cayo nanaitjaca njaji arameonai. Nanjíi waiwaketsa mawitacai sho, niini njewacatsa nadawaacawa lrioya jliaji naofacawa lriko. Ima naako cayoji: Namoto cádankoatsa yacaalre lrikjoite icatsaotsa fepacana caafitsana, njite wacaiteotsa njeewá carro waapiya yacaalre riko.'' ¹³ Mitsa, pada nanakjoite njaji talricanaati irsoperri iako lrirso: ''notatja piinai caiwi rikotsa, picadaa padapena nanakjoite njaji pirsoperri naa-carro njepa nadee cincona caballo nanakjoite njaji warsolri wa-yacalre rikó yoomjeperrim. Ima cayo cana wacayoshotsa faa Irael lrikope, aima njaji mayamirri maawitacai sho; picadaa naa-carroa wacapá carro koanca.'' ¹⁴ Niini njepa nameenaca yaamana caballo irsocape carreta, njite jliaji talricanaati imeenaca naa-carro nacapa naofacawa lriko pia njaji arameonai, lriako narso: ''Warsa iáa icapa koanca.'' ¹⁵ 15Niini naacawa njapodam Ooni Jordán nakojle, njite nacapa pjiomi inipolriko aima napekoji natjsayanim, njaji nainoaca shopawa ima nacjeyapitaca naacawa. Njite njaji iacapem icapa, nadia nacaite jliaji talricanaati koanca. ¹⁶ Niini pjiomi njaji inaiki aimadan Irael lrikope naawa naofacawa lrikojle pia njaji arameonai nadee carro pjiomi njaji namacajim. Niinina navende kena paita modeda ikoa madalrida kilo arina matsiadalripe, njite paita moneda icoada sho tsacja nawenta sei kilo cebada, cayotsa Dio icaite capisho. ¹⁷ Niini jliaji talricanaati, lrimeenaca pada cakonaite lrirsodalri lriá carro lriwapa pantinomajle, mitsa aima capoa njaji inaiki opi napoa nainoni. cayotsa mayamican lricaite capisho lrirso jliaji atsia Dio irsodalri, jliaji caakolri talricanaati iáa cádanako Eliseo iipana lrikojle. ¹⁸ Cayotsa jliyapacao lricaite capisho jliaji atsia Dio irsodalri arameonai italricanaa irso: ''Tjewenaotsa, cayokenaotsa jeeriji, navendeotsa paita moneda ikoada sho madalrida kilo arina, paita ikoada sho tsacja sei kilo arina, Samaria ipanamona lriko.'' ¹⁹ Mitsa jliepa piacan jliaji talricanaati irsodalri cakonaite, lriako Eliseo irso cayoji: Ajatsantja Diio imjeko cadantja nja ventana eenolriko-jleperri.'' Mitsa eliseo jiepani: ''Picapjeniotsa pitji sho cayocaotsa, mitsa korriotsa pinjá carroca nanakjoite.'' ²⁰ Cayotsa jliyapacao lricaite capisho lrirso, ima njaji inaiki aimadan opi nainoni, napoacani yacaalre ipananoma lriko.