¹ Njite Acab irso pia setenta lrienipe Samaria lriko. Niini Jehú idana paperra njite lrimeenaca narso njaji Samaria lrikojle, narso njai talricanaatinai iwapacape jliaji jiipai Jezreel, narsowalre tsacja njaji pekipenai cakonaperri njite narso njaji Acab inakjoite perri, lriako narso: ² ''Irsoentsa inaiwa njaji italricanam Acab ienipe, irso tsacja caballo, caballo cacarretanpe, pacoa yacaalre taimí dalri idaana njite irso tsacja aima inoaca shopao oowi riko. Lrioca cádankoatsa iderse jliaji paperra, ³ iniwanaotsa pada Acab ienipe nakjoite jliaji matsiadalri pja, itaitacada icapa jliá carroatsa icadaa italricanaawa jlinirrim iyarromtacawa, njite inoacaotsa iwapa-carroatsa jliaji italricanaa.'' ⁴ Mitsa njaji caconaperri Jezreel lrikoperri aima nafiocawa, naako narsowaaca: ''Yamada catja njaji talricanaatinai iemalri lrikjoete corrica nataita lrikjoete, omami kena faa'' ⁵ 5Njite jliaji atsia iwapacada jliaji talricanaati-dapana, njite jliaji iwapacada yacaalre, njaji pekipenai caconaperri, njite njaji itawiñacaperri talricanaati ienipe, nadieta iacoti Jehú irso, naaco: ''Pirsoperrica faa, wanaitjaotsa pjiomi njaji pinaalri wanaitjaca. Corriotsa wacadaacarroca pada atsia watalricanaawa. Pinaitjena cayoji piwaada capisho matsiapjaaca picapaca.'' ⁶ Njite Jehú imeenaca tsenacja paperra narso yamapia shopena, lriaco narso: ''Ajádalri cadaa noinai catsa jia, jimi cada norso, iyoáwatsa njewida njaji atsianai Acab ienipemi, njite tjewena, cayo kenaotsa jerri, ideotsa noderse Jezreel lricojle.'' Njite njaji setenta-dee Acab ienipemi, naofapiacawa piacawa naapana lrico njaji atsianai caconaperri nayacalre rico, ima njaca itawiñana. ⁷ Niini nacapa cádanaco tsenacja Jehú ipaperrani, naino pjiomi njaji setenta-dee Acab ienipemi, njite napeco njewidam tseeto lrico nameenacá carrona Jehú iderse Jezreel lricojle. ⁸ Pada ideecada iacoti yaco Jehú irso: ''Opina nadee njewidapemi njaji Acab ienipemi. Njite lriaco narso: ''Iwaketa narsoawa yamapocoa pjewacawa yacalre irso tjewa ipiawa.'' ⁹ Njite piyompinacojlena, Jehú imoto yemawa, lriaco narso njaji inaiki: ''Cotsa coca imatsicanalri. Ima njoa, noema lricjoete jliaji no-minalri njite noinoni, mitsa ¿Cokao iino njaji? ¹⁰ Panaya itaita icapaca corrica wa-Minalri jiyapeta pada iacoti caaco-cádanaconi. Wa-Minalri icaite piena oopi Elía inoma lricjoite coancaotsa njeyapacawa njaji Acab iipaneta. Lrinaitjenina cayoji lricaite capisho pia.'' ¹¹ 11Ikena Jehú iinoca pjiomi njaji Acab ikitsiñape itepem Jezreel lrico, pjiomi njaji atsianai caconaperri, nakitsiñapeji, na-sacerdotenaipe, corrin lrimacaca pada nanacjoite. ¹² Njité dalri Jehú jinico iawa Samaria lricojle, niini lriacayawa lriocawa nayoa cawa oveja iiyo njaji iwapacapena, lriipitana Bet Eked. ¹³ Lricapa niini Ocozía iweeri, Judá italricanaam. Jehú iaco narso: ''Cjaitenao jia?'' Njite naaco njepacan: ''Ocozía iwenaipeca fa, niini wacawa nacapá carro fa njaji lrienipem njite rsoaji talricanaati Jezabel.'' ¹⁴ Niini Jehú iaco narso njaji lrinaikite: ''Jipana caafitsana.'' niini njepacana caafitsa pjiomina nainó carrona ooniapji rico Bet Eket dalri, cuarenta y do pia namaimaca. Crorrin lricadaa pada caafi. ¹⁵ Jehú iáa cádanaco njitewa, lricapaacawa Jonadab iinai, Recab irri, niini lrimotoca lricoadatani. Jehú itatjani njite lriaco lrirso: ''¿Capja nokitsindaji catsa pjia, cayoji nokitsinda capisho noanjica pjia?'' Njite Jonadab jiepani: ''Ajaca, pikitsindaji catsa njoa.'' Niini Jehú iaco lrirso: ''Noinai cadaa pjia, pjia norso picaapi.'' Niini Jonadad iaca lricapi Jehú irso njite jlirretacani lri-carretan lrico. ¹⁶ Njite Jehú iaco pja lrirso: ''Pino noinai picapá carro coana noifarroca jliaji wa-Minalri.'' Cayotsa Jehú ideeca Jonadab lri-carretan lrico. ¹⁷ Lrioca cádanacoa Samaria lricojle, Jehú iino pjiomi njaji Acab inacjoite perri Samaria lricope, corrin lricadaa caafi pada, cayotsa wa-Minalri icaite capisho pia Elía inoma lricjoite. ¹⁸ Njite Jehú iwaketa pjiomi njaji lrinaikite, lriaco narso: ''Acab ientsa mataiadari jatjamtsa Baal irso, mitsa Jehú aima pjaotsa lridenjica Baal irso. ¹⁹ Niini panaya idee norso pjiomi njaji Baal iprefetanai, lri-sacerdotenai njite pjiomi njaji iacape lrirso matsiadalri. Iwaketa pjiiomina wadee imacaca pada, ima norsoca aima maaficalri noinoape Baal irso. Jliaji corridalriotsa ino, mayamicaotsani.'' Mitsa Jehú icashata catsana lriwakeeta-carrotsa pjiomi njaji iáa cape matsiadalri Baal irso lriinó carrona. ²⁰ Jehú icaite narso: ''Jiatsa icaite coan cadanaco caotsa wawacaacawa Baal icjaote.'' Njite nacaite lrirso cosho kenaotsa. ²¹ Ikena Jehú imeenaca iacoti narso pjiomi njaji Irael lricope niini nanacoa pjiomi njaji iacape matsiadalri Baal irso, corrin padaca iofawa. Njeewa pjiomiwa Baal iipana lrico, niini pakjancana yamemape. ²² Jehú iaco lrirso jliaji iwapacada natsayan njaji sacerdotenai: ''Pjita natsayanio njaji iacape matsiadalri Baal irso.'' Niini jliaji atsia lrimotoita natsayaniwa pjiomi. ²³ Njite Jehú iawa Jonadab iapiya, Recab irri, Baal iipana lrico jlena, lriaco narso njaji iáa cape matsiadalri Baalirso: ''Ioma icapa matsia wadetsa aca iinai pada iáa cada matsiadalri Dio irso, njatsa waoma njaji Baal iyaape.'' ²⁴ Ikena njewacawa nainó carro maaficalri njite maaficalri na-mjaitaji. Jehú iwaketa cadanena ochenta atsianai lricadaalri iemawa pemajletsa panti ioya, njite Jehú icaite narso: ''Ape icada cada pada ipitoa lricaapi rikjoite, nanakjoite njaji iwacacalrio anji, jlienakjaotsa waino lricoadawa jliaji imalri lripitocawa.'' ²⁵ Niini Jehú itaita catsa imjaitaca njaji maaficalri ofrenda sho, lriaco narso njaj capitamanai njite lrirso jliaji iwapacadana: ''Jiewenawa iino carrona. Macadatsa pada imotocawa njiteo.'' Niini nainocana namatsetan sho pjiiomina, njite njaji capitamanai njite jliaji iwapacaita napeco njaji nainoji pemajle. Njité dalri njewa pjawa lriwawa lricojle jliaji Baal iipana. ²⁶ Namotoita njite njaji panti ipje shoperri nanaitjanda jiipa sho namaita-carrona. ²⁷ Nadoita jliwao jliaji Baal iema-carrona, napeco jliwao jliaji Baal iipana, icatsa naacawa manacawa namatsikena njaji inaiki atee panajiete toa. ²⁸ Cayo piatsa Jehú iwayaketaca Baal njite corritsa coca iáa lrirso mtasiadalri Irael lrico. ²⁹ 9Mitsa Jehú corrim lrimacaca Jeroboam, Nabat irri imatsicana, lrimalri pia Iraelnai inaitjaca imatsicanawa, naacaojli piamatsiadalri lrirso jliaji vaaca nanaitjanda owirro sho Betel lrico pjia nite Dan lrico tsacja. ³⁰ Niini wa-Minalri iaco Jehú irso: ''Pinaitja capoa matsia cayoji nooma capisho, nite pinaitja Acab iipaneta irso cayoji nooma capisho pia nanaitjaca narso, coatro comaotsa nanakjoite njaji pinakjoite perri talricanaati-caotsana Irael naco.'' ³¹ Mitsa Jehú, corrin jliepa wa-Minalri, na Diote njaji Iraelnai iaco lricaolre rikjoite. Ima corrica yaami lrinaitjaca Jeroboam imatsicana, niini lrimaca nanaitjaca namatsicanawa njaji Iraelnai. ³² Jliawajli naco piena wa-Minalri iinita pia lri-tsotaca njepaite njaji Iraelitanai, ima Hazael jiametaca owi rico njaji Iraelnai njepaite iocacawa pia naji iraelitanai, ³³ jerri imoto kema lrikjoite Jordán irso, pjiomi jliaji jiipai Galaad dalri, pjiomi gaditanai, Ruben poco jipaite tsakja, nayada tsakja njaji Manase poco, Aroer lrikjoite, jliaji jiipai pacoacaita cawa Armón dalri, Galaad lrikjoite teeco jlinaa Basán lricojle. ³⁴ Pjiomi njaji Jehú inacoanaperri, pjiomi njaji lrinaitjalri, paoketacana nadanada lrico paperra nacaiteca nanaco njaji Irael italricananai pia. ³⁵ Mayami Jehú nainai njaji lriferrinaipemi, nadawani Samaria lrico. Njite lrirritsa Joacaz, jimao talricanaatica Irael naco, Samaria lrico. ³⁶ Ventiocho walria oonia Jehú italricanaata pia Irael naco Samaria lrico.