¹ Njite rsoaji Ocozía jidoa, Atalía darro ipitana, rocapa cádanaco mayamica rirri Ocozía, ronaa nainoca pjiomi njaji yempetipe Ocozía iipaneta lricope. ² Mitsa rsoaji Josaba, talricanaati Joram iito, Ocozía iweedoa, rsopa rodawa pada Ocozía irrida Joás dalri iipitana. Rodawani teeco naoya njaji pana yempetipe Atalía inaalri nainoca, rodawa jliaji yempeti njite rsoaji itaoñacadani patawajle rico Dio iipana lrico. Nawani Atalía ioyani wadee ronaaca nainocani. ³ Josaba idawacawa Joás iapiya sei walria oonia Dio iipana lrico, cayo cadana Atalía italricanata nanco njaji inaiki. ⁴ Njite siete walria nacojle, jliaji sacerdotenai iapiyawalri Joiada imeenaca iacoti nanó carro njaji comandantenai irsocape cien inaiki narsoperri najirri cariteonai njite njaji iwapacaperri, nawacaacawa Dio iipana lricojle. Lrinaitja pada iacoti naapiya, njite lrinaa nacaiteca iacoti ajádalri sho Dio iipana lrico. Njite ikena jlicañjataca nacapa jliaji talricanaati Ocozía ienipemi. ⁵ Njite icatsa njaji lrinaalrica nanaitjaca: ''Cayoatsa inaitjaca. Pamoyoa ipamoyoaca naco inakjoite inoatsa sabado lrico iwapá carroatsa jliaji talricanaati dapana, ⁶ njite nja paana ipamoyoaca inocaotsa iwapá carro jliaji pantinoma lri parrema nacoda jliaji panti, njite nja papoco nawapacaotsa lridananjite jliaji panti naofacawa lrico njaji iwapacaperri.'' ⁷ Njite njaji yamapoco, njaji corri petsa iwapaca sabado lrico, nawapacaotsa jliaji Dio iipana lriofaalri niini jliaji talricanaati. ⁸ Irsotsa iemaca lriwaida naco jliaji talricanaati, icoanamtsa jipaca icaapi rico inoacashopawa. Coca cadaotsa itsoomitani lrirsotsa mayamicani. Irsotsa aca shaji talricanaati iinai, jlimoto cádancoa njite jliewa cádanacoa. ⁹ Niini njaji comandantenai njeepa jliaji yacoti sacerdote Joiada inaalri nanaitjaca. Nacoanamtsa nadeeca nanaikite, njaji idenjirriotsa sabado lrico njite njaji corri perritoa idenji sabado lrico. Njite naawa pjiomi sacerdote Joiada iderse. ¹⁰ Jite jliaji sacerdote Joiada iáa narso njaj comandantenai irsocape cien nanaikite namolroconiwa, nadanape talricanaati David iyapempia, njaji namatsietalri Dio iipana lrico. ¹¹ Niini njaji iwapacaperri neema catsa nawapani, nacoanaa njepaca nainoaca shopawa nacaapi rico, neemawa atsia jliemjete njite inarroemjete Dio iipana irso nawapaca jliaji talricanaati. ¹² Ikeena Joiada ideeca jliaji talricanaati Ocozía ienipem, Joás, njite lricadaa jliwida naco corona, njite lriá lrirso jliaji Dio inaitja shopam iacoti talricanaati iapiya. Ikena narroca jliwida naco aceite jlia-carroena walridalri talricanaati. Nañaa nacaapi njite naaco: ''¡Wia watsa lriofaacawa jliaji talricanaati!'' ¹³ Njite Atalía jimi cádanaco namaolrena njaji iwapacaperri njite njaji inaiki aimadan, rono naderse Dio iipana lricojle. ¹⁴ Rooca rocapa coampecana, niini rocapaca lriemacawa jliaji talricanaati panti ipje Dio iipana lricoda, cayotsaji nanaitja capisho mana oopi, njite njaji capitamanai njite njaji ipjia cape trompeta neemacawa talricanaati icodapi. Pjiomi njaji inaikiIrael lricoperri nacatimataacacawa njite napjiaca na trompetani. Niini Atalia itsafaaca rotsayani njite rowanaca kjaida: ''¡Neemaca nokjoete, neemaca nokjoete!'' ¹⁵ Njite jliaji sacerdote Joiada, lrinaa njaji comandantenai irsocaperri cien nanaikite, njaji yajicape nanaco njaji tsolrodaonai aimadan, cayoji: ''Yaa imotoitano naojiete njaji iwapacapeno. Pjiomi njaji iomacape idaanatacano, inoatsana.'' Ima lriaco pia jliaji sacerdote narso: Macadatsa nainocano Dio iipana lrico.'' ¹⁶ Niini njaji inaiki neemacawa yamemape nanaitja capisho inipo rorso, roa-carro niini caballo ipananoma lricojle, iacadawa talricanaati dapana lricojle, icatsa nainocano niini. ¹⁷ Njite. Joiada inaitja pada iacoti wa-iMinalri iinai, walridalri talricanaati njite njaji inaiki aimadan, nacaitecawa wa-Minalri inaikite canaa, njite nanaitja tsakja iacoti jliaji talricanaati napiya njaji inaiki aimadan. ¹⁸ Niini naacawa pjiomi njaji inaiki aimadan Baal iipana lricojle napeecó carro jliwao. Na peco njewao njaji altar nanaitjaji Baal irso, njite napeeco tsakja njaji idolo Baal jinapjiam, njite naino tsakja Matán, Baal isacerdotenim nanacotsa njaji altar. Njitédalrina jliaji sacerdote ikepitanata iwapacaope Dio iipana, nja-carro ianjii lrinaco. ¹⁹ Ikena Joiada iawa naapiya njaji comandantenai cien perri inaikite, njaji cariteonai, njaji iwapacaperri njite pjiomi njaji inaiki naorrocoetá carro jliaji walridalri talricanaati Dio iipana lrikjoite talricanaati dapana lricojle, njeewawa napananoma lrico njaji iwapacaperri talricanaati dapana. Ikena Joás iofacawa naofacarroda naco caconaadalri njaji talricanaatinai. ²⁰ Niini nacatimataacawa pjiomi njaji inaiki aimadan, njite namawadacatsa njaji inaiki yacaalre ricope. Njite rsoaji Atalía, nainono matseta sho talricanaati dapana lricotsa. ²¹ Siete walri oonia lripekirrica jliaji Joás lriniita caojlina lritalricanaataca.