¹ Siete walria naco talricanaati caami Jehú, Joás italricanaaca iinitawa; coarenta walria oonia lritalricanaataca Jerosalén lrico. Sibia pia roipitana rsoaji Joás jidoa, Beerseba darro pia. ² Joás inaitja cayoji Dio yoma capisho caidalritsa, ima jliaji sacerdote Joiada icanantani. ³ Mitsa najaji altar yenondalripe nacoperri corrim lripeeco piacana. Niini njaji inaiki aimadan namjaita manacatsa nirse maaficalri njite incienso tsakja nanaco. ⁴ Joás iaco narso njaji sacerdotenai: ''Pjiomi nja palraata naderri ofrenda sho njenitanda Dio iipana icaoyanada, njite njaji palraata nanda njaji inaiki Dio irso nacaolre rikjoite, nja cadaa nja palraata njetanda naoya njaji inaiki naniwetaji, o nja cadaa nja palraata nanda njaji inaiki nacaoña shopa pada matsiacalri, pjiomi nja palraata nanda njaji inaiki Dio ipomenataji icaolre rico naacarro wa-Minalri iipana icaoya, ⁵ njaji sacerdotenai nasotsa natatjaca nainai njaji iwapacape palraata namatsietashopa jliaji Dio iipana coancawa catsa maatsini.'' ⁶ Mitsa Ventitre walria naco oonia talricanaaticami Joás, njaji sacerdotenai corripiatoa coancawaca namatsieta jliaji DIo iipana. ⁷ Niini jliaji talricanaati Joás iwana jliaji sacerdote Joiada njite njaji lrikitsiñape sacerdotenai; njite lriaco narso: ''¿Coadao corrin imatsieta matsicawape Dio iipana lrico? Niini panaya, ajena jipaca napjeya naplratan njaji inaiki yaacape, panaya, nashoena njaji palraata nawaketajina namatsieta shopa jliaji Dio iipana iáa-carroatsa narso njaji atsianai itaitacaperri imatsietaca.'' ⁸ Niini njaji sacerdotenai corrinatsa njepaca na palraatan njaji inaiki, corrin tsakja njawaca catsantja imatsietaca jliaji Dio iipana. ⁹ Njite cadana jliaji sacerdote Joiada jlipa pada patowa, njite ltinaitja lrimomafe lriipana naco, njite lricdaa lriofawa atsiajliemjete altar icodapi pjewa cádanco Dio iipana lrico. Njite njaji sacerdotenai iwapacape lri pananoma jliaji Dio iipana nacadaa lri-ricoda njaji palraata nadeji njaji inaiki Dio iipana lricojle. ¹⁰ Nacapa cádanacoena pacjankena palraatasho jliaji patowa, jliaji idanacada talricanati irso njite jliaji sacerdotenai yaapiyawalre njepa naniweta nja palraata njeetá carrona tsacoapa lrico njite nadana nanaco, palraata waoketanda Dio iipana lrico. ¹¹ Nja palraata naniwetaji nacadaa nacadaa nacaapi rico njaji atsianai iwapacape Dio iipana. Nacaoña njaji carrapinanai, njite nja paana idenjicape imatsietacaope Dio iipana. ¹² Nacaoña tsakja njaji ipatsicacaperri, iyoa caperri jiipada, nawentashopa jaico, jiipada nayoaope namatsieta shopa Dio iipana, njite pjiomi icaona canacaidalri namatsieta shopa. ¹³ Mitsa njaji palraata nadeji Dio iipana lricojle corritsa coca nanaitja lrisho, corri taza palraatape cantja, lampara irrocape cantja, ooni yaarrodao cantja, trompeta cantja, o coamperri cantja matsiaperri pacapaca nanaitjaji palraata sho o owirro sho cantja. ¹⁴ Nacadaa njaji palraata nsrso njaji imatsietacape Dio iipana. ¹⁵ Njite corrin natatjaca nainai njaji atsianai nacadaji irso palraata naniwetaji cocaca nadenjica nasho ima nacaoñaca njaji idenjicaperri niini, njite njaji idenjicape niini meñaite perri-catsana. ¹⁶ Mitsa nja palraata nacaoña shopa caikjaolrena cádanacona, njite njaji ofrenda nadeji napecadon ikjaote corripiatsa nadeecana Dio iipana lricojlena, ima nayadapeca njaji sacerdotenai. ¹⁷ Papia nacojlena jliaji talricanaati Hazael, Aram italricanaa, inoacawa Gat ikjoete, njite jliamana. Njite lridiawa lrinoacá carro Jerosalén ikjoete. ¹⁸ Mitsa, Joás, Judá italricanaa jipa nanaanipem njaji talricanaatinai Judá lricopepia, jlinirrinaipemi Josafat, Joram njite Ocozía, pjiomi njaji njenitaji pia narsowao, njite lricadaa piacana teecojletsa, pjiomi njaji owirro naoketaji namatsietacawa lrico piana Dio iipana lrico njite talricanaati dapana lrico tsakja, njite lrimeenaca Hazael irso, Aram italricanaa. Cayotsa Hazael iwa Jerosalén ioya. ¹⁹ Njite njaji pana Joás inacoanaperri, pjiomi njaji lrinaitjalri, pacapacana nerricoda njaji paperra nadanacawa nanaco njaji talricanaatinai Judá lricope pia. ²⁰ Njaji lrirsoperri njenico lricjoete pjiomi; niini nainoca Joás Beth Millo rico, lri ricoda jliaji inipo yaacadawa Sila lricojle. ²¹ Njaji lrirsoperri Josacar, Simeat irri, njite Jozabad, Somer irri, icatsa njaji iinolrini. Caitsa mayamicani. Nadawa Joás lriferrinaipemi icodapitsa David iyaalre rico, Njite lrirri Amasía nacja italricanaata jliapodam.