¹ Ventitre walria naco talricanaati-cami Joás, Ocozía irri, Judá italricanaa, Joacaz, Jehú irri iniita italricanaataca nanaco njaji Iraelnai Samaria lrico; diecisiete walria lritalricanata piaca. ² Lrinaitja njaji maatsirri corripetsa matsia Dio icaaca, njite lrinaitja njaji imatsiacanaati Jeroboam, Nabat irri inaitjalri pia, njaji imalri pia Iraelnai inaitjaca imatsicanawa; corrin Joacaz imaca lrioyawana. ³ Niini kerroaca Dio Irael icjoete pekirritsa, niini Dio icadaa Hazael, Aram italricanaa jiametacana nainoaca-werrico, cayocja jliaji Ben Hadad, Hazael irri. ⁴ Niinina Joacaz itatjaca caiwi-ricotsa Dio iinai, njite Dio jimica lrirso lricapa capoa coanca njerrapiteca njaji Iraelitanai, coanca talricanaati Aram lricoda jirrapiteetacana. ⁵ Niini Dio icadaa Iraelnai irso pada imanacocadana, niini manacocana naacapi rikjoite njaji arameonai, njitena nadia tsenakja naofawa naapana lrico njaji Iraelnai cayotsa oopi sho. ⁶ Mitsa, njaji iraelitanai corrim yamicana Jeroboam iipaneta ipecadoni ioya, jliaji imalri pia Iraelnai inaitjaca imatsicanaawa, cayo carromtja naofacawa; njite rsonapjiam rsoaji Aserá niinicatsan Samaria lrico. ⁷ Njaji arameonai icaamitsa namacalrica Joacas irso cincoenta atsianai ianjicape caballo naco, diez carreta fiape, njite die mil atsianai iacapetsa njaipa sho, ima jliaji Aram italricanaan iwayaketa piacana, lripjoetana cayoji napjoa capisho napania ipje njaji idejicaperri. ⁸ Njite nja paana Joacaz inacoapanaperri, pjiomi njai lrinaitjalri, njite jliida lri talricanaaca lrico paoketana lri-ricoda jliaji paperra nadanacawa nanacoapana njaji talricanaatinai Irael lricope. ⁹ Cayotsa mayamica joacaz lriferrinaipe shotsa, njite nadawani Samaria lrico. Njite Joás italricanaata jliapodam. ¹⁰ Trenta siete walria naco talricanaati caami Joás, Judá italricanaa, Joás, Joacaz irri iniita italricanaataca nanaco njaji Iraelnai Samaria lrico; diecisei walria lritalricanaataca. ¹¹ Lrinaitja maatsi Dio ipeyajle. Corrim lrimacaca njaji Jeroboam, Nabat irri ipecadoni, njaji imalri pia Iraelnai inaitjaca imatsicanawa, lrinaitja njaji maatsirri. ¹² Njite njaji Joacaz inacoanaperri, pjiomi njaji lrinaitjaji, njaji jliida coan piaca lrinoacawa Amasía ikjoete, Judá italricanaa, paoketacana lri-ricoda jliaji paperra nanacoapanaperri njaji talricanaatinai Irael lricope. ¹³ Cayotsa mayamica Joacaz nacayoshotsa njaji lriferrinaipemi, njite nadawani nacodapitsa Samaria lrico. Njite lrrri, Joás italricanata jliapodam. ¹⁴ Njite caifica Eliseo pada ipoati sho jlaji icadalrina mayamican, niini Joás, Irael italricanaa iorroco icapani njite lriiyaca lrinaco matsina capoani ipoati sho, nino Joás iaco lrirso: ''¡Pjia njonirri, pjia njonirri, capja nadeeca pjia njaji carro-fiape Irael iyarrope njite njaji atsianai jiecocape nanaco!'' ¹⁵ 15Eliseo iaco lrirso: ''Pjipa paapo yawitjiapoti njite apjewipena yawitjiocoti,'' Niini Joás jipa paapo yawitjiapoti njite apjewipena yawitjiocoti. ¹⁶ 16Niini Eliseo iaco lrirso jliaji Irael italricanaa: ''Pjipa piyawitjiaponi,'' Joás jipa lriyawitjiapo. Njite eliseo icadaa nja lricaapi Joás icaapi naco. ¹⁷ Eliseo iaco Joás irso: ''Pimjeco jliaji ventana jeerri imoto kemjete,'' njite Joás imjecocani, Njite Eliseo inaa lriyawitaca nirse, njite lriyawitaca. Eliseo icaite pja: ''Icatsa jliaji yawitjiocoti Dio icadashopa pjiametá carro njaji arameonai, ima piawatsa nakjoete njaji arameonai Afac lricojle akjerre catsaotsa piwayaketana padenirri.'' ¹⁸ Eliseo yaco tsenakja: ''Pjipa njaji piyawitjioco,'' njite Joás jipana. Niini Eliseo iaco Joás irso, Irael italricanaa: ''Piñaa jiipai nacojle nasho,'' Niini lriñaca jiipai nacojle madalripiatsa, njite yamini. ¹⁹ Mitsa jliaji atsia Dio irsodalri kerroani lrirso, lriaco: ''Pirsopiatsantja piñaaca jiipai nacojle cinco o sei pia. Cayo cadantja pinaitja piaca piino piacantja Aram akjerreca piwayaketani, mitsa panaya madalripia tsaotsa pjiametacani.'' ²⁰ Cayo cayami mayami Eliseo, njite nadeeketsa nadawá carroni. Njite pawalria iinitaca icoam njaji papoco moabitanai njersaa mana naoya njepaite. ²¹ Njite papia nacojle, nadawa cádanaco pada mayamdalrim, nacapa papoco moabitanai nanoca naikjaolre, niini napecoca jliawao jliaji mayamdalrim nacadacawa Eliseo idadam iorsoawa. Niini jliaji mayamdalrim idada lrinota cádanaco catsa Eliseo iapipem, icaamitsa lridiaca lricafiawa jliaji mayandalrim pia, njite lrinicoca lriemawa jliwacatsa. ²² Hazael, Aram italricanaa jirrapiteeta piaca njaji Iraelnai caidalritsa Joacaz caojli pia Irael italricanaa. ²³ Mitsa matsiatsa Dio inaitjaca Irael irso, kjena lricapaca narso lrinaitja capoa iacoti Abraham iapiya, Isaac njite Jacob. Cayoshopatsa corrim Dio icadaa nawayaketacana, corrim yamica Lricapaca narso. ²⁴ Njite mayamica Hazael, Aram italricanaa, njite lrirri Ben Adad nakja jimao talricanaatican jliapodam. ²⁵ Njite Joás, Joacaz irri, jita tsenakja Ben Adad ioya njaji yacaalre njetajim Joacaz ioya oowi rico. Madalripiatsa Joás inoacawa nakjoete njite lridieta pjiomi njaji Iraelnai iyacaalre.