¹ Yamawalria cayaami lritalricanataca jliaji Joás, Joacaz irri, Irael italricnaa, Anasía, Joás irri, Judá italricanaa iniita italricanaataca. ² Lrirsopiakena venticuatro walria lripekirrica naco lriniita cádnaco lritalricanaataca; ventinoeve walria lritalricanaataca Jerosalén lrico. Joadán pia roipitana rsoaji jlidoa, Jerosalén darro iofawa. Lrinaitja matsia Dio ipeyajle, mitsa corri cantja cayoji lriferrim David icayosho pia. ³ Lrinaitjatsa cayoji jlinirri Joás inaitja capisho pia. ⁴ Mitsa njaji altar yenondalripe nacope corri piatsa lripeecocana. Niini njaji inaiki naa manacatsa namjaita incienso nanaco njaji yenondalripe. ⁵ Niini matsia cadanacoena lritalricanaataca, lrinaa nainoca naji lrirsoperri inocapem jlinirri, natalricanam pia. ⁶ Mitsa corrim lrinaa nainoca njaji neenipemi; icamitsa lrinaitjaca cayoji lricaite capisho jliaji Moisé idananda, iacoti yajicada panaco, cayoji wa-Minalri inaa capisho nanaitjaca, ima cayo pia lricaiteca: ''Corrim nataita nainoca njanirri neenipe ikjaote, corrim tsacja nataita nainoca neenipe njanirri ikjaote. Nacoanamtsa narsotsa mayamicana namatsicana icjaote.'' ⁷ Lriino die mil tsolrodaonai Edom lricope lri ricoda jliaji jiipai pacoacaite cawa yokirra dalri iipitana. Njaji tsolrodaonai Amasía iyarrope njepa oowi rico jliaji yacaalre Sela njite lricadaa nakja lriipitanawa Joctel, icatsa lriipitanaca panajiete. ⁸ Njite Amasia imeenaca iacoti Joás irso, Jehú irri, Irael italricanaa, lriaco cayoji: ''Pinoatsa wainoacá carro oowi rico pjiá njite njóa.'' ⁹ Mitsa Joás, Irael italricanaa idieta iacoti Amasía irso, Judá italricanaa, lriaco lrirso cayoji: ''Jliaji mayafina iemacadam pia Libano lrico lrimeenaca iacoti lrirso jliaji cedrona iemalriwa Libano lrico, lriaco lrirso cayoji: ''Picada piito roofá carro nirri iinai.'' Mitsa apana maaficalri jiyapa Libano lrico niini opica jlipjoa jliaca mayafina.'' ¹⁰ Ajádalri opica pjiameta njaji Edom lricope, picatimataacawa lrisho, mananitsa pjia piyacalre rico wadee piomaca pirsowawa matsicalri. ¿Coadada pioma pirsowao maatsirri, njite narso tsakja njaji Judá lricope?'' ¹¹ Mitsa Amasía corrim jlimica lrirso. Niini Joás, Irael italricanaa iáa inoacawa Amasía ikjoete, Judá italricanaa. Nainoacawa nacjoetewaca Bet Semes lrico, jliaji yacaalre Judá lricoda. ¹² Niini Irael jiametaca Judá, njite njaji tsolrodaonai Judá lricope napitocawa naapana lricojle. ¹³ Joás, Irael italricanaa, jipaca jliaji Josía, Judá italricanaa, Joás irri, Ocozía irri, Bet Semes lrico. Lrioca cádanaco Jerosalén lricojle, Joás itsolrodaonai jiweta Jerosalén idana njewa-carro, wadepia ciento ochenta metro jliwalripaca, Efrain ipananoma nakjoite teeco jlinaa yacaalre idaana itonjiwi nacojle. ¹⁴ Niini jlipaca lridee pjiomi njaji owirro, palraata, pjiomi njaji lrioketalri Dio iipanalrico, pjiomi njaji inaaniti dape cacoadaperri talricanaati dapana lricope, lridee tsakja preso njaji inaiki, njitena lridiawa Samaria lricojle. ¹⁵ Njite njaji Joás inacoanaperri, pjiomi njaji lrinaitjalri, jliida, njite coan piaca lrinoacawa Amasía ikjoete, Judá italricanaa, pacapacana lri ricoda jliaji paperra nanacoapana njaji talricanaatinai Irael lricope. ¹⁶ Mayami Joás nacayoshotsa njaji lriferrinaipemi njite nadawani Samaria lrico nainaitsa njaji talricanaatinai Irael lricope, njite lrirri Jeroboam nakja talricanaati jliapodam. ¹⁷ Njite Amasía, Joás irri, Judá italricanaa iofaa quince oonia mayami cayami Joás, Joacaz irri, Irael italricanaa. ¹⁸ Njite nja Amasía inacoanaperri pacapacana lri ricoda jliaji paperra nanacoapana njaji talricanaatinai Judá lricope. ¹⁹ Neema pia Amasía ikjoete Jerosalén lrico, niini lripito catjawa Laquís lricojle, mitsa nameenaca paana atsianai iacape iomani Laquís lricojle, niinitsa nainoni. ²⁰ Nadee ketsa jliaji mayamdalri-mitsa caballo naco nadawá carroni David iyacalre rico, lriferrinaipem iinai. ²¹ Njite njaji inaiki Judá lricoperri njepa jliaji Azaría, Amasía irri irsocada toa diecisei walria lripekirrica nacadaa-carroni natalricanawani. ²² Azaría piena jliaji jirretalri tsenakja jliaji yacaalre Elat, lridieta tsenakjan Judá irso, mayami cayami jliaji talricanaati Amasía nacayoshotsa njaji lriferrinaipemi. ²³ Quince walria naco Amasía italricanaaca naco, Joás irri, Judá italricanaa, Jeroboam, Joás irri Irael italricanaa, lriniita lritalricanaataca Samaria lrico; cuarenta un walria lritalricanaataca nanaco. ²⁴ Lrinaitja maatsi Dio ipeyajle. Corrim lrimacaca njaji Jeroboam, Nabat irri ipecadoni, njaji imalri pia Iraelnai inaitjaca imatsicanawa ²⁵ Lridieta tsenakja Irael jipaitena iocacawa nacojle, Lebo Hamanat nakjoite teeco Manoa Arabá nacojle, cayotsa wa-Minalri iaco icaite capisho, na-Diote njaji Iraelnai, cayoji Lricaite capisho pia lrirsodalri profeta Jonás, Amitai irri inoma lrikjoite, Gat Hefer-dalri pia yofawa. ²⁶ Dio icapa capoa pia coanca njerrapitaca njaji Iraelnai, matsinjaa pia nerrapitaca, coshoca njaji narsoperri njite njaji corriperritsa narsoperrica, njite corri piatsa pacapa pada imanacocada njaji Iraelnai. ²⁷ Niini wa-Minalri icaite corricatsa jliatja-carroca Irael jalredaoca lrikjoite; icaamitsa lrimanacocana Jeroboam nakjoite, Joáas irri. ²⁸ Njite njaji Jeroboam inacoapana perri, njaji lrinaitjalri, jliida, coan piaca lrinoacawa oowi rico lridietá carro damasco, Hamat tsakja Judá ioya Irael irso tsenakja, pacapacanaa nadananda paperra lrico nanacoapana cawa njaji talricanaatinai Irael lricoperri. ²⁹ Mayami Jeroboam liferrinaipemi icayoshotsa, njaji talricanaatinai Irael lricope. Lrirri Zacaría nakja talricanaati lriarrontacao.