¹ Ventisiete walria naco Jeroboam italricanaaca naco, Irael italricanaa, Azaría, Amasía irri, Judá italricanaa iniita italricanataca. ² Azaría irsopia diecisei walria lriniita cádanaco lritalricanaataca. Cincoenta y do walria lritalricanaataca nanaco Jerosalén lrico. Jecolía pia jlidoa iipitana, Jerosalén lricoda iofawa. ³ Lrinaitja matsia Dio ipeyajle, lricapa lricapa lricawa jlinirri, njiyte lrinaitja cayoji Amasía inaitja capisho. ⁴ Mitsa njaji yenondalripe corripiatsa lripeecona. Niini njaji inaiki namjaita piacatsa maaficalri nanaco njite incienso tsakja. ⁵ Dio icadaa talricanaati idaki naco pada irrenati, lricadaa weepem lridaki nako, niini nacadaa piacani padapana lricotsa teecotsa naoya njite cayotsa mayamican. Niini Lrirri Jotán piacatsa yofaawa talricanaati dapana lrico caicarro jliapiaca italricanaata nanaco njaji inaiki. ⁶ Njite njaji paana Azaría inacoanaperri, pjiomi njaji lrinaitjalri, pacapacana lriricoda jliaji paperra nadanacawa nanacoapana njaji taricanaatinai Judá lricope. ⁷ Mayami azaría nacayoshotsa njaji jlinirrinaipemi; nadawani lriferrinaipemi icodapitsa David iyacalre ricó. Njite lrirri Jotam italricanata jliapodam ⁸ Trenta ocho walria naco talricanaati caami Azaría, Judá italricanaa, Zacaría, Jeroboam irri iniita italricanataca nanaco njaji Iraelnai Samaria lrico; lritalricanata nanaco sei keerritsa. ⁹ Lrinaitja maatsi Dio ipeyajle, cayotsa nanaitsa capisho pia njaji jlinirrinaipemi. Corrin lrimacaca lrioyawa njaji Jeroboam, Nabot irri ipecadoni, jliaji imalri pia Iraelnai inaitjaca imatsicanawa. ¹⁰ Njite Salum, Jabes irrí iema Zacaría lrikjoete, niini lriinocani nacapatsa njaji inaiki aimaadan. Cayo carro jliakenakja talricanaati jliapodam. ¹¹ Njite nanaco njaji Zacaría inacoapanaperri pacapacana lri-ricoda jliaji paperra nadanacawa nanaco njaji talricanaatinai Irael lricopem. ¹² Icatsa lriocacawa jliaji iacoti Dio icaiterri pia Jehú irso, lricaite cádanaco lrirso cayoji: ''Coatro comaotsa pinakjoite-perri italricanata-caotsa Irael naco.'' Njite icatsa lriocakenawa anjí. ¹³ Niini Salum, Jabes irri iniita italricanaataca trenta nueve walria naco talricanaati caami Azaría, Judá italricanaa. Icaamitsa lritalricanaataca aapapitsa keerri Samaria lrico. ¹⁴ Ima Manahem, Gadi irri, lriawa Tirsa lrikjoite Samaria lricojle lrinoacá carro Salum ikjoete, icatsa lriinoca Salum niini, Jabes irri, Samaria lrico. Lrino caamini, jlienakja jimao talricanaatican jliapodada. ¹⁵ Njite nja apaana Salum inacoapanaperri, njite coan piaca lriinoca jliaji lri talricanam, paoketaca lri ricoda jliaji paperra Iraelnai italricanaa inacoapanaperri. ¹⁶ Njite Manahem iáa inoacawa yacaalre Tifsa ikjoete, njite nakjoete njaji lricodapí perri. Lrinoaca tsakja nakjoete njaji iofacapewa Tirsa jipaite jinaa iocacawa nacojle corricapoa namjecolripia yacaalre ipanana. Lriinona, njite lrimataca nawawa pjiomi njaji inaitjepe kewedamperri iofaacape nirse. ¹⁷ Trenta nueve walria naco talricanaati caami Azaría; judá italricanaa, Manahem, Gadi irri iniita italricanaataca Irael naco; lritalricanaata Samaria lrico die walria. ¹⁸ Lrinaitja maatsi Dio ipeyajle. Caafi cádanaconi, corrin lrimacaca lrioyawa njaji Jeroboam, Nabot irri ipecadoni, jliaji imalri pia Iraelnai inaitjaca imatsicanawa. ¹⁹ Njite Pul, Asiria italricanaa, lríno lrinoacá carro Iraelnai ikjoete, niini Manahem iáca Pul irso treinta coatro mil kilo palraata, Pul ikitsindatá carroni kjaidá carro lritalricanaataca nanaco njaji Iraelnai. ²⁰ Manahem jita jliaji palraata lricaoña shopa Pul naoya njaji Iraelitanai irsocape aima palraata jidaati rico. Narso pia naaca lrirso seisciento gramo palraata lriacarro lrirso jliaji Asiria italricanaa. Niini jliaji Asiria italricanaa icaboco idia njepaite ioya. ²¹ Njite nja paana Manahem inacoapanaperri, pjiomi njaji lrinaitjaji, paoketaca lri ricoda jliaji paperra Iraelnai italricanaa inacoapanaperri naco. ²² Cayotsa mayamica Manahem lriferrinaipemi icayoshotsa njite lrirri Pekaía nakja talricanaati jliapodadao. ²³ Cincoenta walria naco talricanaati caami Azaría, Judá italricanaa, Pekaía, Manahem irri iniita italricanaataca nanaco njaji Iraelnai Samaria lrico. ²⁴ Lrinaitja maatsi Dio ipeyajle. Corrin lrimacaca lrioyawa njaji Jeroboam, Nabot irri ipecadoni, jliaji imalri pia Iraelnai inaitjaca imatsicanawa. ²⁵ Pekaía irsopia pada caconaite lrirsodalri Peka dalri iipitana, Remalia irri. Papia nacojle, Peka njite lriinai cincoenta atsianai galaaditanai, Argog, njite Arie tsakja naino jliaji natalricanaa Pekaía Samaria lrico, taimicawa lrico talricanaati dapana lricotsa. Icatsa Peka iinoca Pekaía, niini jliakenakja talricanaati jliapodadao. ²⁶ Njite nja paana Pekaía inacoapanaperri, pjiomi njaji lrinaitjaji, paoketaca lri ricoda jliaji paperra Iraelnai italricanaa inacoapanaperri naco. ²⁷ Cincoenta y do walria naco talricanaati caami Azaría, Judá italricanaa, Peka, Remalia irri iniita italricanaataca nanaco njaji Iraelnai, Samaria lrico; vente walria lritalricanaataca nanaco. ²⁸ Lrinaitja maatsi Dio ipeyajle. Corrin lrimacaca lrioyawa njaji Jeroboam, Nabot irri ipecadoni, jliaji imalri pia Iraelnai inaitjaca imatsicanawa. ²⁹ Peka caojli pia Irael italricanaa, Tiglat Pileser, Asiria italricanaa jita pia lrioya njaji yacaalre Ijón, Abel Bet Maaca, Janoa, Cedes, Hazor, Galaad, Galilea njite pjiomi njepaite njaji Neftalí poco. Lridee njaji lrinaikitena Asiria lricojle. ³⁰ Niini pia jliaji Oseas, Ela irri, lriema Peka lrikjoete, Remalía irri. Lria lrikjaolre maatsicalri rico njite lriinoni. Niini jliakenakja talricanaati jliapodada, ventewalria naco talricanaati caami Jotam, Uzía irri. ³¹ Njite nja paana Peka inacoapanaperri, pjiomi njaji lrinaitjaji, paoketaca lri ricoda jliaji paperra Iraelnai italricanaa inacoapanaperri naco. ³² Yamawalria naco talricanaati caami Peka, Remalia irri, Irael italricanaa, lriniita lritalricanata jliaji Jotam, Azaría irri, Judá italricanaa. ³³ Lrirso piakena venticinco walria lripekirrica lrinita caojli pia lritalricanaataca; diecisei walria lritalricanaataca Jerosalén lrico. Jeredua pia jlidoa iipitana, Sadoc iito. ³⁴ Jotam inaitja matsia Dio ipeyajle. Lrinaitja pjiomi njaji natsiaperri jlinirri Azaría inaitjaji pia. ³⁵ Mitsa corrim lripecoca njaji yenondalripe. Niini njaji inaiki namjaitacatsa maaficalri nanaco njite njaji incienso tsakja nanaco njaji yenondalripe. Jotam inaitja lripananomao jliaji Dio iipana njeewa cawa pjiomi. ³⁶ Njite nja paana Jotam inacoapanaperri, pjiomi njaji lrinaitjaji, paoketaca lri ricoda jliaji paperra Judá italricanaa inacoapanaperri naco. ³⁷ Jliawajli pia, Dio imeenaca Rezin, Aram italricanaa njite Peka, Remalía irri Irael italricanaa Judá icjaolre nainó carroni. ³⁸ Mayamiketsa Jotam nacayoshotsa njaji lriferrinaipemi njite nawani nacodapitsa, lriferrim David iyacalre rico. Njite lrirri Acaz nakja italricanata jliapodam.