¹ Dieisei walria naco talricanaat caami Peka, Ramalía irri, Acaz, Jotam irri iniita italricanaatca Judá lrico. ² Vente walria naco lriniita lritalricanaatca, diecisei walria lritalricanaata Jerosalén lrico. Corrin lrinaitja matsia wa-Minalri Dio ipeyajle, lrinaitja capisho pia jliaji lriferrim David. ³ Ima lrinaitjaca nanaitja capisho njaji Iraelnai italricanaa; lrimjaita pada lrienipe tiyee rico lricadaa caroni ofrenda namjaitanda sho. Lrinaitjaca maatsi nanaitja capisho nja paana inaiki pada jiipai nacope, njaji Dio ipeecoji napeyajle njaji iraelitanai. ⁴ Lrimjaita maaficalri njite incienso tsakja nanaco njaji yenondalripe, nápolrico naco njaji jiipana, jaico macanipe, caafiperritsa iapjite. ⁵ Njite Razin, Aram italricanaa, njite Peka, Remalía irri, Iarel italricanaa, naawa nainoacácarro Jerosalén lricoperri ikjoete. Nayofieta jliaji yacaalre, Acaz fie mitsa, corrim nataita njepacan narsowaoni. ⁶ Jliawajli pia Aram itaricanaa, lridieta Aram irso jliaji yacalre Elat, njite lripeeco njaji inaiki Judánai Elat lrikjoite. Niini njaji arameonai nanoca naofawa Elat lrico, jliawajli nakjoite atee panajiete. ⁷ Njite Acaz imeenaca iacoti Tiglat Piliser irso, Asiria italricanaa, lriaco: ''Icatsa pirsodalrica njoa, pienipe shodalri. Pino pikitsindatana, manacó carro njoa Talricanaati Aram lricoda ioya, njite lrioya jliaji talricanaati Irael lricoda tsakja, ima nainoacacawa nokjoete.'' ⁸ Ikena, Acaz jipaca nja palraata njite njaji owirro lrioketaji Dio iipana lrico njite nanakjoite njaji inaaniti dape cacoadaperri talricanaati dapana lricope, lria-carrona regalo sho Asiria italricanaa irso. ⁹ Njite jliaji Asiria italricanaa jimi Irael italricanaa irso, niini Asiria italricanaa inoca Damasco lrikjoite lrinoacá carro Aram ikjoete, niini jliametacana njite lrideeca preso njaji inaiki Aram lricope lriyacalre-rse Kir. Njite lriino jliaji talricanaati Rezin, aram italricanaa ¹⁰ Talricanaati Acaz iawa Damasco lricojle lricapá carro catsa jliwactsa jliaji talricanaati Tiglag Pileser, Asiria italricanaa. Damasco lricojle lricapa apana altar njite lripeyo lricapacani, niini lrimeenaca sacerdote Urías irso jlinapjiam, njite lrimeenaca tsakja narso njaji idejirriotsani coca shocaotsa nanaitjani. ¹¹ Ikena sacerdote Urías inaitja jliaji altar cayotsa jlinapjiam sho talricanaati Acaz imeenacalri Damasco lrikjoite. Lritaita lrinaitjaca jliaji altar talricanaati Acaz idiaca ipjeya yocawa Damasco lrikjoite. ¹² Niini jliaji talricanaati Acaz idia cádanaco iocawa Damasco lrikjoite, lricapa jliaji altar, niini lritsomitacani njite lrimjaitaca maaficalri lrinaco. ¹³ Lriá njaji lri-ofrendan maaficalri lrimjaitanda njite lriá tsakja comaana, lriarro tsakja ofrenta sho niini irraodati, njite lriwitsiketa tsakja maaficalri iirrana altar nacó ofrenda imaodacakjeti iyadape. ¹⁴ Njite jliaji altar broncepe iemalri pia Dio iipana ipeyajle, oopi lridee njiten lriemacawa pia Dio iipana ipeyajle, lrioyawaca jliaji altar njite jliaji Dio iipana lricadaa-carro lriemawa lri-altarni icodapitsa, lri-parrema nacojle inarroemjete. ¹⁵ Njite talricanaati Acaz inaa jliaji sacerdote Urías cayoji: ''Pimjaitaotsa lrinaco jliaji altar nonaalri pinaitjaca njaji ofrenda piyompinaco nacope njite njaji ofrenda comaana shoperri dainomajle nacope tsacja; njite njaji ofrenda comaana talricanaati iyape, njite na-ofrendan tsakja njaji inaiki, njaji comaana nacadanda ofrenda sho, nairraoda tsakja. Iwitsiketaotsa altar naco nerranapem njajimaaficalri nacadaji ofrenda sho, njite pjiomi neerrana njaji maaficalri nainoji. Njite icaamitsaotsa noomaca jliaji altar broncedalri notatja cádanacoatsa Dio iinai lrikitsindatá carro njoa.'' ¹⁶ Sacerdote Urías inaitja cayoji lrinaa capisho lrinaitjaca. ¹⁷ Njite talricanaati Acaz icarseta njaji ooni yaronape, njaji naofa-carrona tsakja naoya njaji naofacawa pia kjaipapocope; lriorrocoeta tsakja jliaji ooni yarona yofalri pia nanaco njaji vaacana broncepe lricadaacarroenakja lriofawa jipacoa nako lrinanda nanaitjaca lripia. ¹⁸ Lricarseta tsakja jliaji inipo nanaitjanda matsia sabado ipiawalre Dio ipana-lricoda, cayo tsakja jliaji talricanaati ipananoma pemajledalri Dio iipana irso, lricjaote jliaji talricanaati Asiria lricoda. ¹⁹ Njaji Acaz inaitjaji inacoapanaperri, pjiomi njaji lrinaitjaji paoketacana lri-ricoda jliaji paperra nadanacawa Judá italricanaanai inacoapanaaperri naco. ²⁰ Mayami Acaz nacayoshotsa njaji lriferrinaipemi njite nadawani nacodapita David iyaalre rico. Lrirri Ezequías nakja talricanaati jliapodam.