¹ Niini pia ape atsia lriipitana Naamán, na-comandantecan njaji tsolrodaonai aimadan Aram italricanaa irsoperri, ape atsia lri-talricanaa ipeyonda icapacan, ima lrinakjoite, Dio icadaa aimawalria Aram lrikoperri jiametaca nakoema. Atsia cjaidadalrica, mafio-cádalritsa jliaji Naamán, mitsa lrirso piaca pada irrenati lridáki nako, weepepem tjeewacaperri lridaki nako. ² Njaji arameonai nano pia aimasho nainoacá carro Iraelnai icjoete niini njepaca nadee apana inarro njite. Njite rsoaji iinarro rodejĩca rorso rsoaji Naamán iino irso. ³ Niino rsoaji idejĩcada roaco rominarro irso: ''Noomantja no-minalri iacawa lriderse jliaji inoparrotacada yofalriwa Samaria lriko. Lritapé carro no-minalri ioya jliaji weeperri lridaki nakope.'' ⁴ Niini Naamán yaawa talricanaati iderse lricaité carro talricanaati jimi njaji yakoti rocaiterri rsoaji inarro nadenda Irael lrikjoite. ⁵ Niini jliaji talricanaati Aram lrikoda iaco lrirso: ''Warsa peda piawa, njite nomeenacaotsa papje paperra lrirso jliaji talricanaati Irael lrikoda.'' Icamina Naamán iawa njite jlipa lridee lrinaiwa trenta mil palrataitape, sei mil owirroitape njite diema tsaya. ⁶ Lridee tsacja jliaji paperra Irael italricanaa irsoape icaite cada cayoji: ''Picapa cadaotsa jliaji paperra, piajĩwatsa nirse kena jliaji norsodalri caconaite Naamán, nomeenaca piderse pitapé carron lrioya jliaji weepem lridaki nakope.'' ⁷ Jliaji talricanaati Irael rikoda lri-lee cayami jliaji paperra, lri.tserrenta lritsayani, lriako: ''¿Capja lriwaadaca Dioca njoa, noinó carro o nocadaa-carro nacaficao, ima jliaji atsia lrioma notapeca pada atsia lrioya jliaji wepem lri-daki ioya? Nowaada lriometaca njoa wainoacá carro. ⁸ Niini jliaji atsia, Dio irsodalri Eliseo, jlimi cádanko lri-tserrentaca lri-tsayan jiaji talricanaati, lrimeenaca yaakoti lrirso, lriako cayoji: ''¿Coada pitsafa pi-tsayani? Pimeenaca noderse jliaji atsia, lriají carro niinica pada profeta Irael riko.'' ⁹ Niini Naamán iawa lriderse naapiya pjiomi njaji lri-caballoni njite njaji natsoetají njapodada, njite lrioca lriemawa Eliseo ipananoma ikoawajle. ¹⁰ Njite Eliseo imeenaca iakoti pada lrirsodalri iinai, lriako lrirso: ''Warsa pia piapjoawa siete walria Ooni Jordán lriko, niiniotsa matsiaca piedapa; njite matsiacaotsa pjiomi pidada lriko.'' ¹¹ Mitsa kerroaca Naamán, njite lriako lriá cádanako njiteo: ''Nowada pia, lrino cantja noderse, lriema cantja nokodapi njite njomi tsantja lrinomataca lri-Minalri Dio iipitana, njite jliyapeta cantja lri-caapi sho no-daki nako njite ikenantja matsiaca njoa lrioya jliaji wepem nodaki nakópe. ¹² ¿Capja korrica matsiapeki pjaaca njaji ooni Abaná njite Farfar tsacja Damasco lrikope? Ajadalri matsiaperri pjacana naoya njaji ooni Irael lrikoperri. Nopitacantja nerrikodatsa njaji waonite njite matsia cantja njoa'' Niini lricabokoca lridiá carro njite lri-rroá lriko. ¹³ Njite njaji Naamán inaikite, natsomitacani, naako lrirso: ''Pjia wa-talricanaa, lrinaa cadantja pinaitjaca pada jirrapitinaa-dalri jliaji inoparrotacada, wanjíi pinaitja cantja. Omamiken lrinaca pinaitjaca jliaji korridalritsa jirrapitinaca panaitjaca, icaamitsa lrinaa piapjoacawa ooni riko njite icaamitsa matsiaca pjia.'' ¹⁴ Niini Naamán yorroko ooni riko njite lriapjoaca siete walria ooni Jordán lriko, cayotsa lricaite capisho lrirso jliaji atsia Dio irsodalri. Ikena matsiaca tsenacja lriipe, cayoeka lripe yempetida iipe sho, icaamitsa matsiacani lri-rrena ioya. ¹⁵ Njite naamán idiacawa lriderse jliaji atsia Dio irsodalri naapiya njaji lrinaikite, niini lrioca-ca lriemawa lricoemajle. Naamán iako lrirso: ''Panaya decja noanjíi korrica pacapa pada Dio pjiomi jalredaoca lriko, icaamitsa ají Irael lriko. Niini pinaitja matsiacalri norso, pjipa nopjeya pada inaaniti macoadadalritsa pirsodalri ianda pirso.'' ¹⁶ Mitsa Eliseo iako lrirso: ''Ajádalrica caafidalrica jliaji wa-Minalri, jliaji noemalri ipeyajle, korriotsa njopá carrocana pipjeya.'' Mitsa Naamán ipiajleta-tja cjaida lrirso, mitsa Eliseo icaite korrica. ¹⁷ Niini Naamán iako lrirso: ''Picadaa pedaa nodeecarro jiipai nanako njaji yamana mula, nopatjaa-carroatsa nonaitjalriotsa niini altar Dio irso, ima njoa pirsodalri icaamitsaotsa nomjaitacaotsa maaficalri ofrendasho wa-Minalri Dio irso. ¹⁸ Icaamitsaotsa nooma wa-Minalri jiyapetaca, njoá lrirsodalri ioya imatsicanaa, noá cádanako no-talricanaa iinai Rimón iipana lrikojle lriá carro lrirso matsiadalri nirse, ima jlipaaca caotsa nonaapa nako njite nocoanja caotsa niini Rimón iipana lriko, icaamitsa jliaji nomalri wa-Minalri jiyapetaca lrioyao jliaji matsirri nonaitjalri, njoá lrirsodalri.'' ¹⁹ Njite Eliseo iako lrirso. ''Pimawadacatsa piacawa.'' Ikema Naamán idiacawa. ²⁰ Njite kjeya catoa lriacawa jliaji Naamán, lriaco lrirsowaca jliaji Giezi, Eliseo irsodalri, jliaji atsia Dio irsodalri: ''Jliaji no-minalri, korritsa koca jlita pjatsa lrioya jliaji Naamán, arameo-tairri, korricapoa jlipa lripjeya njaji inaaniti lrideji lrirso. Caafidalrica jliaji wa-Minalri, njoeko caotsa Naamán jiapodam njotá carroatsa kocacatsa lrioya.'' ²¹ Ikena Giezi iawa Naamán jiapodam. Naamán icapa cádanako pada jiekoca naicjaolre, lriorroko jlieko carrona nakjoite lrikoadatá carron, njite lriako lrirso: ''¿Matsiatsa pjiomi?'' ²² Njite Giezi iako lrirso: ''Ajã, matsiatsa pjiomi, jliatsa imeenaca njoa jliaji no-minalri, cayo lricaiteca: ''Picapa nanoca noderse yaame yempetipe toa, neenipe njaji profetanai, inocaperri awacada cawa naofacawa lriko njaji Efraín poko. Pinaitja matsiacalri, piá narso tre mil palrataitape njite yamapoko tsaya.'' ²³ Njite Naamán jiepani, lriako: ''Matsiatsa noaca pirso sei mil palrataitape'' Naamán ipiajleta caiwi rikotsa Giezi irso, niini lripapica lrirso yamada tsako lriko njaji palrata, njite yamapoko tsaya njite lricadaana yamada lrirsoperri nako nadee carron, niini nadeeca njaji palraata tsako lriko Giezi ipeyajle. ²⁴ Njite Giezi ioca cádanakoena jiipana ípolriko, jlita naoya njaji palraata, njite lridawana panti riko; lrimeenaca naawa teekoa njaji Naamán irsoperri, icaamitsa nadiacawa. ²⁵ Njite Giezi ioca cádanako jiewawa, lriemawa Eliseo ipeyajle, njite lritatja jlimioni, lriako lrirso: ''¿Kjerre piatoa piajiwa, Giezi?'' Njite Giezi jiepani: ''Njoa pirsodalri, korripiatsa akjerreca noajiwaji.'' ²⁶ Mitsa Eliseo iako Giezi irso: ''¿Capja korrica piwaada nocaolrini iaca piinai, nocapatsa Naamán icabokoetaca lri-caballoni lrikoadatá carro pjia? Kotsa waomacawa catoa nainai palraata, tsaya cantja, napaniapji olivo cantja o uvapji cantja, oveja, buey, o waoma cantja warsoperri nainai. ²⁷ Niini panaya, jliaji wepem Naamán idaki nakoperri pia, pidaki nakoenacjaotsa nerroa njite nanako njaji pinakjoité perri caidalriwenatsa.'' Cayotsa Giezi iawa Eliseo ioya, njite wepem lridaki nako, jaalrecani aboni-calrisho lridada nako.