¹ Njite apana inarro lriino jliaji apada neenipe nacjoite njaji inoparrotacape rono Eliseo iderse, njite roaco lrirso cayoji: ''Jliaji noinirri idenjicada pirso oopi mayamini, njite pianjintsa lrinaco jliaji pirsodalri ifiocaitaca wa Minalri iiwana. Njite panaya njaji iacapem lrirso palrata nano nedee carro njaji yamee noenipe iempetipe toa narso perri carrona.'' ² Niini Eliseo iaco rorso: ''¿Coajintja nokitsindataca pjia? ¿Picaite njomi cocaca pirsolri piipana lrico? Njite roaco lrirso: ''Njoa pirsodarro, cotsa cocaca nosolri noopana lrico, icaamitsa norsolrica apana aceite iarrodam. ³ Njite Eliseo iaco rorso: ''Panaya warsa pimoto padanajle piomá carro pjita toa nainai njaji picodapi perri aceite iarroda meetadaperri. Pjita toa nainai cosho catsa pitaita pjitaca. ⁴ Njite pjiewaotsa piipana lrico naapiya nja pienipe, pitaotsa pipananoma, njite piarroatsa aceite nawawa lrico njaji aceite iarroda meetadaperri pjiomi; njite picadaotsa teecojle njaji pacjamperrina ⁵ Icamina roacawa Eliseo ioya, rsoewa roopana lrico naapiya nja roenipe njite roita ropananoma. Njaji roenipedape nadee rorso nja aceite iarroda meetadapemi ropacjanta-carrona aceite sho. ⁶ Pacjam caami pjiomi njaji aceite iarroda meetadapem pia, roaco roenipeirso: ''Idee pja norso naarrodao.'' Mitsa roenipe iaco rorso: ''Corrinatsa pacapa narroda metadapemi.'' Njite yaami tsacja aceite iarrocao. ⁷ Njite roá lriderse jliaji Dio irsodalri. Niini lriaco rorso: ''Warsa pia piwende njaji aceite picawiña-carro picoenton, njite lritem sho, piofa shopaotsa naapiya nja pienipe. ⁸ Papia jalredaoca Eliseo jiyapawa yacaalre Sumen ricojle roofalri niinio apama iinarro caconaadarro; Rsoaji inarro roinai Eliseo lrinja-carro roinai. Caidalri manatsa Eliseo jiyapa cádanaco niinio, lrirso manatoa lrinjaca roinai. ⁹ Niini roaco rsoaji inarro roinirri irso: ''Picapa, panaya noanjii matsia atsia mamatsicanaadalrica Dio irsodalri jliaji jiyapalri mana waapana lrico. ¹⁰ Wanaitjaotsa pemáa-carro-wajle tsoodalritsa wapana naco Eliseo irso, wacaotsa lri ricoda pacoa pemáa-carroita, njite pada lampara. Lrino cádanacoatsa waderse, lrimaa-carroatsa niini. ¹¹ Eliseo ipieta cádanaco jiyapaca nirse, lriofaa toa lri ricodena jliaji nanaitjanda lripia lrimáa-carro-wajle lriwafetá carro niini. ¹² Eliseo iaco lrirso dalri Giezi irso: ''Piwana rsoaji inarro Sunamita.'' Njite lriwana cádanacono, rooca roemawa lricoemajle. ¹³ Eliseo iaco lrirsodalri irso: ''Picaite rorso cayoji: Aima jirrapitinaaperri pjiyapalriwa inaco pitaitá carro picoadataca fa. ¿Coajintja wa taita wa kitsindataca pjia? Wa taita caacoca fa pinaco talricanaati iapiya o lriapiya jliaji na comandanten njaji tsolrodaonai.'' Njite roaco rsoepecan: ''Cotsa coca canacairri norso ima nokitsiñape inaica noofawa.'' ¹⁴ Niini Eliseo iaco lrirsodalri irso: ''¿Coca naco tsacja wataita wakitsindatano? Njite Giezi iaco lrirso: ''Rsoaji inarro, cotsa rorsoenca roenipe, njite pekirrinatsa roinirri.'' ¹⁵ Niini Eliseo jiepani, lriaco: ''Piwanano.'' Niini lriwana cádanacono, rooca roemawa pantinomajletsa. ¹⁶ Eliseo iaco rorso: ''Cayo kenaotsa pawalria naco, picodaitacaotsa pada pienipe.'' Njite roaco lrirso: ''Corrina, macashatatsa njoa pirsodarro, pjia Dio irsodalri. ¹⁷ Mkitsa rsoaji inarro romotoeta pada roenipe cayo walria nacotsa pada camoi nacojle, cayotsa Eliseo icaite capisho rorso. ¹⁸ Njite jorre dalri pja kena jliaji iempeti, a papia jalredaoca lriawa jlinirri iapiya naniwacawa lrico lripania njaji lrinaikite. ¹⁹ Niini lriaco jliaji iempeti jlinirri irso: ''Caiwica njowida lrico, caiwica njowida lrico.'' Njite jlinirri inaa pada lrirsodalri ideecani jlidoa iderse. ²⁰ Jliaji lrirso dalri jipa cádanaco ideeni jlidoa iderse, icaamitsa lriofaca lriorsipada naco jliaji iempeti atee mayacanca jerri lriicao, njite icaamitsa mayamicani. ²¹ Njite jlidoa jipa idee rorsoetá carro jliaji iempeti lrimaa-carroita naco jliaji atsia Dio irsodalri, roita lriicao niini njite romoto lrioya. ²² Rowana roinirri, njite roaco lrirso: ''Pimeenaca noicjaolre apepena nanakjoite njaji pirsoperri, njite pimeenaca tsacja apana burro noá carro kjeya lriderse jliaji atsia Dio irsodalri njite nodiá carro tsacja kjeya. ²³ Mitsa roinirri iaco rorso: ''¿Coadadao pioma piaca lriderse jliadaaca jliaji? Ima corritoa walripi keerrican njite corri tsacja sabado catoan. Niini rsoepacan: ''Matsia watsa lrimotoca norso pjiomi'' ²⁴ Njite ropapi paofa-carroita borro nacó njite roaco narsodalri irso: ''Kjeya pideeca fa; wadentja noicjaoteca corrica kjeya poicadaca waawa, ajantja njoa cadatsa inaa pidietaca jliida.'' ²⁵ Cayotsa roacawa lricjaolre jliaji atsia Dio irsodalri Awacada Car,elo lricojle. Niini jliaji atsia Dio irsodalri icapano tecjoite toa, lriaco lrirsodalri Giezi irso: ²⁶ ''Picapa ronoca rsoaji inarro Sunamita. Pinaitja matsiacalri warsa pia picoadatano. Pitatja pjiomiono matsia cadatsano, roinirri njite roenipe tsacja.'' Njite rsoaji inarro rocaite matsia catsa pjiomi. ²⁷ Rooca cádanacoena lriderse jliaji atsia Dio irsodalri awacada nacojle, rsowa rorsoawa lripa icodapi. Giezi itsomitano jlienita-carrono lrioya, mitsa jliaji atsia Dio irsodalri lriaco lrirso: ''Corrina, picadaa catsano, ima rsotaca rocaolre pekirritsa, njite jliaji wa Minalri corrin lricadaa noanjii lrinaco jliaji imatsicanaati rsoyapalri, njite corritoa coca lricaiteca norso. ²⁸ Njite roaco lrirso: ''¿Capja notatja piaca piinai noenipeo, no minalri? Njite nocaite pia pirso wade pimañeta catsa njoa.'' ²⁹ Niini Eliseo iaco Giezi irso: ''Pjietacawa pia-carroa roopana lricojle rsoaji inarro, njite pjipa pidee jliaji njopajico picaapi ricó. Picapa cadaa pada atsia piajialri, matatjatsani, njite ape itatja cadaa pjia, mjeepatsani. Piocaotsa picadaa njopajico lriecoa naco jliaji iempeti.'' ³⁰ Mitsa jlidoa jliaji iempeti iaco Eliseo irso: ''Nocaite pirso yacoti ajádalri sho wa Minalri nacó. Corritsa nodiá carroca corri cadaa pino noinai.'' Niini icaamitsa Eliseo iaca roinai. ³¹ Njite Giezi iawa kjeya napeyajle, njite lrioca kjenao lricadaa Eliseo jipajico lriecoa nacó jliaji iempeti, mitsa jliaji iempeti corrin caacocani corrin tsacja jlimica. Niini Giezi idiawa jliapodamrsewa lrioketaacá carro Eliseo iapiya, njite lricapa kenani lriaco lrirso: ''Jliaji iempeti corrin lricafiacawa.'' ³² Niini mayandalrica jliaji iempeti, Eliseo ioca cádanaco panti ricojle, njite lriorsoacatoawa lrimáa-carroita naco toa. ³³ Niini Eliseo ioca jiewao njite lritaacawa lriapiya jliaji iempeti njite lritatjaca wa Minalri iinai. ³⁴ Eliseo iorsoawa lriwawa naco jliaji iempeti; lricada lrinoma lrinoma naco jliaji iempeti, lricadaa nja lritjí lritjí nacó, lricadaa nja lricaapi lricaapi nacó. Lriorsoawa matsia lrinaco jliaji iempeti, njite icaamina lrinita kena jamoca lridaki jliaji iempeti. ³⁵ Njite Eliseo jinico yemajiwa lrimaa carowajle iwaipoco naco njite lridiá tsenacja lriorsoawa matsia lrinaco jliaji yempeti. Icaamina lritsijaca siete walria jliaji yempeti njitena lrimjeco nja lritjí. ³⁶ Eliseo iwana lricjaolrewa Giezi, lrinaa-carro Giezi iwanaca jlidoa jliaji iempeti. Niini rsoewa cádanaco lrimaacarrowajle rico, Eliseo iaco rorso: ''Pinoena pidee jliaji pienipe'' ³⁷ Icaamitsa rsowaca rorsoawa jlipa icodapi, rocoaja jiipai nacojle, njite rsopa roenipe romotó carro lriapiya. ³⁸ Njite dalri Eliseo idia tsenacjao Gilgal lricojle. Mitsa njaji inaiki ninperri aima njerrapitaca, niini neenipe njaji profetanai naofaacawa lripeyajle. Niini Eliseo iaco lrirsodalri irso: ''Piofeta jliaji palangana macaapi dalri pja piyana-carro naijao njaji profetanai ienipe. ³⁹ Pada nanacjoite imoto lriomá na kiníkerre lrico paniati nayanan iiwio. Njite lrioketaca aima yorromo maapana canaaperritsa, niini jlirretaca lritsayan inomapi lridee carro pja aima. Nayoana napeeco carro nayanan lrico, mitsa corrin nanji coamperrica njaji yorromo. ⁴⁰ Njite pomaca kena naorrocoetani nainja-carroena. Mitsa wiasho pjena, nainja cadanatoa, njemata cjaida, naaco:''¡Pjia, atsia Dio irsodalri, alriji pada capoá dalri iinocada pja wayanan rico!'' Njite corrinatsa nataita naijacani. ⁴¹ Mitsa Eliseo iaco narso: ''Idee norso harina.'' Njite lripeeco nayanan lrico, lriaco narso tsenacja: ''Ipienana narso njaji inaiki nainjá carro.'' Njite corrinatsa pacapa capoa dalri nayanan rico. ⁴² Ape atsia ino Baal Salisa njite lricjaolre jliaji atsia Dio irsodalri. Lridee lrirso vente petjetape cebadape lri tsacon rico, lriniitaji jlitaca lri pania ioya, njite lridee tsacja pana lri pania iinaca walripe toa. Njite lriaco lrirso: ''Pia watsa njaji narso njaji inaiki naija-carro.'' ⁴³ Giezi iaco Eliseo irso: ''¿Coajintja nokeñjawaca cien inaiki nasho njaji? Mitsa Eliseo iaco lrirso: ''Piena narso naija-carro, ima wa Minalri icaite nainja caotsa kenipinaa njite lrimaca pjatoa.'' ⁴⁴ Niini Giezi icadaa narso nainjá carro; niini nainjaca, njite lrimaca pja toa cayotsa wa Minalri icaite capisho.