¹ Njite dieciocho walria oonia talricanaati caami Josafat, Judá italricanaa, Joram, Acab irri iniita italricanaataca Irael nacó, Samaria lrico; lritalricanata Irael naco doce oonia. ² Lrinaitja tsacja maatsi Dio ipeyajle, mitsa corrin lrinaitja cantja cayoji jlinirri jlidoa inaitja capisho; ima lripeeco jliaji jiipada nacaitenda matsiadalrica nacawa pia matsiadalri Baal irso jlinirri inaitjanda pia. ³ Mitsa lrinaitja njaji imatsicanaati Roboam, Nabal irri inaitjaji, jliaji imalri pia Iraelnai inaitjaca imatsicanawa; corrim Joram imaodaca naoya. ⁴ Njite cadana, Mesa, Moab italricanaa, lritawiña oveja. Lrirso pia lriaca Irael italricanaa irso cien mil oveja, njite neeyo njaji cien mil cordero. ⁵ Mitsa mayami caami Acab, jliaji Moab italricanaa iema lricjoete jliaji Irael italricanaa. ⁶ Niini jliawajli jliaji talricanati Joram iawa Samaria lricjoite lridee carro pjiomi njaji tsolrodaonai iraelita oowi rico. ⁷ Joram imeenaca iacoti Josafat irso, Judá italricanaa, lriaco lrirso cayoji: ''Jliaji Moab italricanaa iemaca nocjoete. ¿Capjaotsa pinoca noinai oowi rico lricjoete?'' Nini Josafat jiepani, lriaco: ''Noeniotsa piinai. Picaitecatsa cocaca njaji piomalri wanaitjaca, njaji nonaikite, no aballon nawapaketsa njemi cocaca njaji piomalri wanaitjaca.'' ⁸ Njite Joram iaco Josafat irso: ''¿Cjaite rico cjantja inipo wataita waaca naicjaolre wainó carrona?'' Niini Josafat jiepani: ''Lri rico cjaa jliaji inipo iáa cada jalarapocolri Edom ricoda.'' ⁹ Niini njaji talricanaatinai Irael ricoda, Judá njite Edom naawa pacjaa siete jalredaoca. Mitsa corri naoketa ooni natsolrodaonai irso, na caballon irso njite narso nja paana maaficalri tsacja. ¹⁰ Niini jliaji talricanati Iael ricoda iaco narso: ''¿Capja wa Minalri ideeca lricadaa-carro fa madalridade talricanaatinai lricaapi rico jliaji talricanaati Edom ricoda?'' ¹¹ Mitsa Josafat iaco: ''¿Capja corrica pacapa pada inoparrotacada Dio iyada, wataita-carro watatjaca Dio iinai lrinacjoite?'' Pada talricanaati Irael ricoda isodalri iaco: ''A wainai Eliseo, Safat irri, jliaji ikitsindatacada pia Elia.'' ¹² Njite Josafat iaco: ''Lri caite mana njatsa njaji Dio inaalri lricaiteca.'' Niini Irael italricanaa, Josafat, njite Edom italricanaa naawa Eliseo icjaolre. ¹³ Njite Eliseo iaco Irael italricanaa irso: ''Cotsa coca norsolri piinai.'' Warsa piawa pjinirri njite pjidoa iprofetanaipe iderse.'' Njite Irael italricanaa iaco lrirso: ''Corrina, ima Dio ideeca fa madalridade talricanaatinai Moab icaapi rico. ¹⁴ Njite eliseo jiepani, lriaco: ''Caafidalrica jliaji wa Minalri, jliaji noemalri ipeyajle, a capoatsa jliaji Judá italricanaa, Josafat, nooma capoa nonaitjaca matsia lrirso nomi pirso, corri cadantja corrintja nocapa mitsa pirso. ¹⁵ Panaya idee norso pada itocaa-cada. ''Niini lri tooca cádanaco lri arpan jliaji itooca cáda, Dio jiida iofaa Eliseo nacó. ¹⁶ Lriaco narso: ''Cayo lriaco jliaji wa Minalri. Inaitja aima ooni iofaa-carroda lri ricoda jliaji pacoacaita cawa jiipai meetadalri. ¹⁷ Ima wa Minalri icaite cayoji: Ima corriotsa icapa-carroca caolricani, corri tsakja iiyao, mitsa pakjami caotsa ooni sho jlaiji pacoacaita cawa jiipai, njite irra caotsa ooni, jia, ivacan njite pjiomi iipirra. ¹⁸ Mjerrapitina dalritsa njaji Dio ipeyajle. Lricadaa tsacjaotsa jiameeta-carro njaji moabitanai. ¹⁹ Jinicoatsa nacjoete njaji yacaalre matsiaperri, taimí perri idaana, iocaotsa njaji jaico matsianipe, itaotsa njaji ooniapji, iita tsacjaotsa jiipada sho nincawa jiipai matsiadalri.'' ²⁰ Niini piyompinaco toa, tsoomi carroena namjaitacawa maaficalri Dio irso, ooni jiecoa Edom lricjoite; niini pacjamica ooni sho jliaji jiipai. ²¹ Njite pjiomi njaji moabitanai njemi cádanaco nanaco njaji talricanaatinai inolri inoacawa nacjoete, nawacaacawa pjiomi, pjiomi njaji itaicapene ideeca inacoa nainoaca shopawa, niini naaca nawapa njepaite iocacawa. ²² Njite nacafiawa piyompinaco toa niini jerri icananialre icanaca ooni iecoa naco. Moabitanai icapa cádanaco jliaji ooni napeyajle, njite nacapaca jliaji ooni irraicani irranati sho. ²³ Njite njemataca: ''¡Irranatica jliaji! ¡Oopi nainoacawa njaji talricanaatinai njawaca waacatsa! ¡Panaya jia Moab ricope, warsa waa feta warsowao nayarromi!'' ²⁴ Naoca cádanaco naicjaolre kema njaji iraelitanai, iraelitanai imoto naicjaolre kjeyanadatsa nainó carro njaji moabitanai, niini napitoca napjeya. Njaji tsolrodaonai Irael ricope ipinietana njepaite rico cawa, nainó carrona. ²⁵ Iraelnai imatsikeeta nayacalre, njite nincawa jiipai matsiadalri, nacoanaa njaji atsianai napeeco padape jiipada njite cayotsa naita jliaji jiipai matsiadalri. Naita pjiomi njaji oniapji njite naoca njewao njaji jaico matsianipe. Icaamitsa Kir Hareset rico corri nacarseta pada jiipada. Mitsa njaji tsolrodaonai irsocape nainoaca shopa naino yecakja sho jliaji jiipai niini namatsicacani. ²⁶ Talricanaati Mesa, Moab ricoda icapa cádanaco corri ketsa nataita nacoema icjoete, jlipa lridee seteciento atsianai ianjicape inoacacawa matseta sho naa-carro lripjeya lricjaolre jliaji talricanaati Edom ricoda, mitsa corri nataita. ²⁷ Niini jlipa lriino lrirri pjerriti, jliaji italricanaatalrintja jliapodam, lrimjaitá carron akjerreca lriwayacao yacaalre iwaida naco. Ikena kerroaca matsina Iraelnai icjoete. Njite njaji tsolrodaonai iraelitanai corri naino jliaji talricanaati Mesa, icaamitsa nadiacawa njepaite ricojle.