¹ Njite jliaji talricanaati, lrimeenaca inaiki ideecape iacoti narso njaji pekipenai caconaaperri Judá lricope njite Jerosalén nawacaaca-carrowa. ² Njite jliaji talricanaati iawa Dio iipana lricojle, naa tsakja lriinai njai atsianai Judá lricope njite Jerosalén lricope tsakja iawa lriinai; nja tsacja njaji sacerdotenai, profetanai, pjiomi tsooperri toa, pekipenai tsakja. Ikena lrileeca narso jliaji Paperra naoketanda Dio iipana lrico coanca nacaiteca njaji iacoti Lriacoam naco naapiya. ³ Ikena talricanaati jinicoca iemawa panti ipje icodapi lrinaitja-carro pada iacoti Dio ipeyajle, lricaitecawa Dio irso, lrinaitja caotsa cayoji Dio ioma capisho, njite jlepacaotsa njaji iacoti kjaidaperri, njaji iacoti icaitecape coan carro paofacawa matsia, njaji iacoti pacapampe paicawa lricaolre rikjoite, njite pjiomi lricafica sho, lricaite jliepacaotsa njaji iacoti Dio iacoam nadananda lri ricoda jliaji Paperra. Niini njaji inaiki nacaite njeepa catsakjaotsa njaji iacoti, Dio iacoam. ⁴ Niini talricanaati inaa jliaji sacerdote Hilcías njite njaji lrinacojleda perri, njite njaji iwapacape pantinoma, njetá carro Dio iipana lrikjoite pjiomi njaji iarropetidape nanaitjaji Baal irso njite Aserá irso tsakja, nanaitjaji tsakja narso njaji jiwirsida eenolricojle perri. Njite lrinaa namjaitacana padanajle Jerosalén ioya, awacada cawa, Pacoacaita cawa jiipai Cedrón lrico, njite lrinaa nadeeca njaji nawayolrepemi Betel lricojle. ⁵ Lrinaa nainoca njaji sacerdotenai idenjicape idolonai irso, njaji Judá italricanaanai icadaji namjaitá carro incienso nanaco njaji nanaitjaji yenondalripe nerricoda njaji yacaalre Judá lricoperri, njite Jerosalén iwaida nacojle. Nja tsakja njaji imjaitacape incienso Baal irso, jeerri irso, keerri irso, jalredaoca icoma irso njite narso njaji jiwirsida eeno iecoa nacope irso. ⁶ Lrinaa namotoitaca asera iemacarrona Dio iipana lrikjoite, Jerosalén ioya, namjaitá carro pacoacaita cawa lrico jiipai Cedrón lrico. Lrinaa namjaitacana atee lriwalrope mitsa iofawa, njite lridee lripeecona naicaonam naco njaji inaiki mayamperrim. ⁷ Lrinaa tsakja napeecoca jliaji patawajle Dio iipana lricoda cawilrecawa njaji inaitjepe atsianai iapiya naashopa matsiadalri idolonai irso, nanaitjacawa tsakja Asera itsayaniwa tsakja. ⁸ Lrinaa tsakja namotó carro njaji sacerdotenai Judá lrikjoite, lrinaa-carro napeecoca pjiomi njaji nanaitjaji yenondalripe namjaitacawa incienso njaji sacerdotenai, Geba lrikjoite Bersebá nacojle. Lrinaa tsakja napeecoca njaji yenondalripe nanaitjanda Josué ipananona nacojle, jliaji iwapacaita pia yacaalre, jliaji iemalriwa patojliemjete pjewacawa lrico lrirso jliaji yacaalre. ⁹ Njaji sacerdotenai iwapacape njaji yenondalripe, corri piatsa nacadaaca nadejica lrinaco jliaji Dio ialtarni naco Jerosalén lrico, icaamitsa naijaca naapiya njaji peetje mewiperri. ¹⁰ Josías ipeeco Tofet, lri-ricodadalri jliaji jiipai pacoacaita cawa Ben Hinon dalri, wadee niini catoa pada ideecada neenipe o naito namjaitá carro Moloc irso. ¹¹ Lrinaa nadeeca njaji caballo nacadaaji njaji talricanaatinai Judá lricope na-diote Jeerri irso, nacadaji pjewa cawa Dio iipana lrico, tsoomi Natán Melec imacawa pia icodapi, jliaji iwapacaita nawacaacacawa. Josías inaa tsakja namjaitaca njaji carretafiape nacadaji tsakja na-diote jeerri irso. ¹² Talricanaati Josías, inaa tsakja napeecoca njaji yenondalripe nanaitjanda njaji Judá italricanaanai lritapje naco jliaji Acaz imaacawa lrico, njite njaji yenondalripe Manasas inalri pia nanaitjaca Dio iipana lrico, yameemape peemajicawa. Josías inaa nabitita cana njite lrinaa nadeeca napecona pacoacaitacawa Cedrón lricojle. ¹³ Josías inaa napeecoca pjiomi njaji yenondalripe jeerri imotokemajle Jerosalén irso, atsiajliema naojle lrirso jliaji awacada Salomón, Irael italriccanaa inaitjalri maatsi niini, ima lrinaa piaca nanaitjaca niini neema-carronao njai idolonai, Astarod, jliaji idolo mapeyocanaadalri nayada njaji sidonionai; Quemot irso tsakja, jliaji idolo mapeyocanaadalri nayada njaji Moab; Milcom irso tsakja, jliaji idolo mapeyocanaadalri amonitanai iyada. ¹⁴ Lrinaa napecoca paitapena njaji jiipada nanaitjashopa panti ipje, lrinaa nayacaca Asera iemacarrona njite lrinaa napakjantaca niini inaiki iapipem sho. ¹⁵ Josías inaa tsakja napeecoca matsiape jliaji altar Betel lricoda njite jliaji yenondalri Jeroboam, Nabat irri, jliaji imalri pia Iraelnai inaitjaca imatsicanawa inaalri pia nanaitjaca. Lrinaa namjaitaca jliaji altar njite jliaji yenondalri niini corrinatsa coca iofawa niini. Lrinaa tsakja namjaitaca Asera iemacarronam. ¹⁶ Lriemaji cadanatoa lricapa, lricapa niinica mayamperrim icaonam tjewacajliacawa. Niini lrimeenaca lrinaikite nirse naniwa-carro njaji mayamperrim iapipem; njite lrinaa namjaitacana nanaco njaji altar, lrimatsiketa-carro dekjena matsiapena. Ima cayopiatsa Dio icaiteca lrinoma lrikjoite jliaji atsia Dio irsodalri, lricaite pia lrinaco lripjeya toa cayocaniji panaya sho. ¹⁷ Njite lriaco narso: ''¿Cocao jliaji pacapanda catjinaa nocapalri? Njite njaji atsianai atsianai yacaalre lricope naaco lrirso: ''Icatsa lriicaonamca jliaji atsia Dio irsodalri inocada pia Judá lrikjoite, jliaji caacolri pia lrinaco jliaji pinaitjalrina Baal ialtarni naco ikjoete.'' ¹⁸ Niini Josías iaco: ''Picadena lrimaodaca. Corrin coca itaita icarsetaca nja lriapipem.'' Niini nacadaacatsa mananitsa njaji lriapipemi, lriapipem icodapitsa jliaji profeta inocadam pia Samaria lrikjoite. ¹⁹ Josías inaa napeecoca pjiomi njaji panti yenondalripe nacope nanaitjanda nanaco njaji yacaalre Samaria lricope, nanaitjaji njaji talricanaatinai Irael lricope, njaji imalri nakerroataca Dio naikjaolrewa. Lrinaitja njaji ninperri cayotsa lrinaitja capisho njaji Betel lricoperri. ²⁰ Lrinaa nainoca pjiomi njaji sacerdotenai iwapacape njaji altar yenondalripe naco, njite lrimjaita inaiki iapipemi nanaco. ikena Josías idiacawa Jerosalén lricojle. ²¹ Njite jliaji talricanaati lricaite narso njaji inaiki, lriaco narso: ''Inaitja jliaji Pascua iwaadacarrona jliaji wa-Minalri Dio, cayoji lricaite capisho jliaji Paperra Dio iacoarrom.'' ²² Piketem pia nainjaca Pascua lrico njaa caojli piatoa ianjíi Irael naco njaji Juenai, ima corri piatsakja nanaitjenca njaji talricanaatinai Irael lricope corrin tsakja njaji Judá lricope. ²³ Icaamitoa nanaitjaca napieta dieciocho walria naco talricanaati caami Josías, Dio irso, Jerosalén lrico. ²⁴ Josías imeenaca tsakja naawa njiteo njaji caacoperri mayamperrim iinai o nainai njaji caolriti maatsiperri. Lrimeenaca tsakja naawa njaji irsocape daama naapana lrico, isoape idolonai njite pjiomi njaji naji irso matsiadalri corriperritsa matsiaca pacapa irso Judá lrico, njite Jerosalén tsakja, ima cayo lricaiteca jliaji paperra nadanacawa njaji iacoti kjaidaperri, sacerdote Hilcías ioketalri Dio iipana lrico. ²⁵ Josías ipjeya toa, corripiatsa pacapa pada talricanaati caidalriji lricayosho, jliaji idialri ioma Dio lricaolre rikjoite, lri cafica sho, njite lriwaopiakje sho tsakja; jliaji inaitjalri cayoji lricaite capisho njaji iacoti kjaidaperri Moisé idananda. Njite corrinatsa pada talricanaati Josías jiapodam inaitja coyoji lricayosho. ²⁶ Cayo cadaana tja Josías inaitja, corrin yaamica kerroaca Dio, ima kerroaca matsinaa Judá ikjoete Manases icadaa capoa naaca matsiadalri narso njaji corriperritsa diocana. ²⁷ Niini Dio icaiteca cayoji: ''Nopeecocaotsa Judá corricawajleotsa nocapani, cayoji Nopeeco capisho njaji Iraelnai. Nopeecoatsa na lrioya jliaji yacaalre Jerosalén, noniwananda pia norsowao, njite lrioya jliaji panti noaiteri inaco: ''Niinicaotsa Noipitana iofawa.'' ²⁸ Njite njaji paana Josías inacoapanaperri, pjiomi njaji lrinaitjalri, pacapacana lri-ricoda jliaji paperra talricanaatinai Judá lricope inacoapanaperri. ²⁹ Papia nacojle, Faraón, Egipto italricanaa iawa inoacawa asirionai italricanaa ikjoete ooni Eufrate ikjaolre. Niini talricanaati Josías iawa inoacawa Nacao ikjoete, mitsa Nacao iino Josías Meguido lrico. ³⁰ Njite njaji Josías irsoperri nadee jliaji mayandalrina njeeco carrona lrico Meguido lrikjoite Jerosalén lricojle, nadawá carroni irrirri lripiawalre ricotsa. Njite njaji inaiki Judá lricope, njepa Josías irritsa Joacaz, naarro lrinaco aceite nacadaa-carroni natalricanawa jlinirri jiapodam. ³¹ Joacaz irsopiakena ventitre walria lriniita caojli pia lritalricanaataca, madalripitsa lritalricanaataca Jerosalén lrico. Hamutal pia jlidoa iipitana; Jeremía iito Libna lricoda iofawa. ³² Joacaz inaitja maatsi Dio ipeyajle cayoji nacayoshotsa njaji lriferrinaipemi inaitja capisho pia. ³³ Faraón Necao ipapini cadena sho Ribla lrico njepaite njaji rico njaji Hamat, wadee lritalricanaataca Jerosalén lrico. Njite Necao inaa Judaanai icaoñacani tre mil treciento kilo sho palraata njite trenta y tre kilo sho owirro. ³⁴ Njite Faraón icadaa Eliaquim-carro talricanaati, jlinirri Josías jiapodam, njite lricadaa Joacim nakja Eliaquim iipitanawa. Mitsa Necao ideeni teeco Egipto lricojle, nirsetsa mayamini. ³⁵ Joacim icaoña palrata sho, owirro sho Faraón irso. Njite lriadaa pja nacaoñá carro palraata sho Egipto irso, njite narsopiatsa njeepaca coanca Faraón icaiteca narso. Lritatja nainai njaji inaiki nacoamitsa nacaoñá carro palraata sho, owirro sho, lriá carro Faraón Necao irso. ³⁶ Joacim irso piakena venticinco walria lriniita caojli pia lri talricanaataca. Once walria lritalricanaataca Jerosalén lrico. Zeduba pia jlidoa iipitana, Pedaía iito, Ruma lricoda. ³⁷ Joacin inaitja maatsi Dio ipeyajle cayotsa nacayosho njaji lriferrinaipemi.