¹ Josía irsopiakena ochowalria lriniita caojli lritalricanaataca; trenta uno walria lritalricanata pia Jerosalén lrico. Jedida pia jlidoa iipitana, Adaía iito, Boscat lricoda. ² Lrinatja matsia Dio ipeyajle. Cayotsa lrinaitjaca lriferrim David inaitja capisho, corrin jlienawa Dio ioya. ³ Njite papia nacojle, dieciocho walria caami talricanaatica Josías, lrimeenaca Safán, Azalía irri, Mesulam irri, jliaji idanacaita Dio iipana lricojle, lriaco lrirso cayoji: ⁴ Warsa piawa Hilcia ikjaolre, jliaji sacerdote iapiyawalri, njite pinaaotsa lriniwetaca njaji palraata nadeji Dio iipana lricojle, jliaji iwapacape palraata jlitalri nainai njaji inaiki aimadan. ⁵ Pinaotsa lricadaa-carroca nacaapi rico njaji idenjicaperri, ianjicape lrinaco jliaji Dio iipana, nacadaa-carro narso njaji idenicape iofalriwa Dio iipana lrico, namatsieta-carro njaji coancawapeca maatsi Dio iipana lrico. ⁶ Picaitenaa nacadaa-carro palraata narso njaji carrapinanai, pantitoanai, narso njaji ipatsicacape caalri, njite nawenta shopa tsakja jaico, jiipada nayoaji matsia naitá carro jalraamicawape naco Dio iipana lrico.'' ⁷ Corrin natatjaca nainai coanca nadenjica nasho nja palraata naji narso, ima njaji idenjicaperri nadenjica matsia nasho nja palraata. ⁸ Hilcías, jliaji sacerdotenai iapiyawalri iaco lrirso jliaji idanacaita Safán: ''Nooketaca jliaji Paperra pacapacawa njaji iacoti Kjaida perri wa-Minalri iipana lrico.'' Niini Hilcías iaca jliaji Paperra Safán irso, njite lrileeni. ⁹ Njite Safán idee jliaji Paperra talricanaati irson, njite lricaite pja lrirso cayoji: '' Njaji pirsoperri namatsieta Dio iipana lrisho jliaji palraata wacadaalri narso, njite nacadaana narso njaji idenjicape iwapacape icapa matsia-carrotsa jliaji Dio iipana.'' ¹⁰ Njite Safán, idanacaita iaco tsakja talricanaati irso: ''Jliaji sacerdote Hilcías lria tsakja norso pada Paperra.'' Niini Safán ileecani talricanaati irso. ¹¹ Niini talricanaati jimi cádanaco njaji iacoti kjaidaperri, lritsafaa lritsayani. ¹² Niini jliaji talricanaati inaaca jliaji sacerdote Hicías, Ahicam irso, Safán irri, Acbor, Micaías irri, Safán, jliaji idanacaita, njite lrirso jliaji talricanaati irsodalri Asaía, lriaco narso cayoji: ¹³ Warsa iáwa itatjá carro jimio Dio iinai noikjaote, nanaco njaji inaiki aimadan njite pjiomi Judá naco, wanjíi carro nanaco njaji iacoti lri-ricodape jliaji paperra waoketanda. Ima oopica wakerroata jliaji wa-Minalri wakjoete. Matsinaa lriirroa jliaji wa-Minalri, ima njaji waferrinaipemi corrin njemica narso njaji iacoti lricaiterri jliaji paperra, feepa-carrontja matsia pjiomi njaji iacoti nadanalri coan piaca warsotsa feepacan. ¹⁴ Niini jliaji sacerdote Hilcías, Ahicam, Acbor, Safán njite asaías, oopi naawa Hulda ikjaolre, rsoaji inoparrotacada, Salum iino, Ticva irri, Hahas irri, jliaji iwapacada nacadacawa tsaya, rofaa piawa walricoe cawa nanaitjaca Jerosalén lrico, ikena caacocana roapiya. ¹⁵ Niini roaco narso: ''Cayo lricaiteca jliaji wa-Minalri, na Diote njaji Iraelnai, picaiteotsa lrirso jliaji atsia imeenacalri jia noderse, ¹⁶ cayo lricaiteca: ''Wadepena nodeeca maatsidalri lrinaco jliaji jiipai, njite nanaco njaji lrinaikitena, ima cayo nacaiteca njaji iacoti lri-ricodaperri jliaji paperra, lrileerri jliaji Judá italricanaa. ¹⁷ Ima namacaca njoa njite namjaita tsakja incienso narso njaji idolonai, nakerroataca njoa nasho njaji maatsirri nanaitjalri. Niini opica nakerroata njoa naikjaolrewa, njite corriotsa yaami carroca njoa noirroa ioya.'' ¹⁸ Mitsa lrirso jliaji Judá italricanaa, jliaji imeenacalri jia ajerreji lritatjá carro jlimio coancaotsa Dio inaitjaca, icaiteotsa lrirso cayoji: ''Jliaji wa-Minalri, na Diote njaji Iraelnai, cayo lricaiteca nanaco njaji iacoti pjimirri ianaco, ¹⁹ maatsidalrim capoa pianjiacacawa, pianjiaca capoa corricatsa coca pjia Dio ipeyajle, pjimi cádanaco njaji nomatsietalri lripia jliaji jiipaica jliaji njite njaji lrinaikitena, ima nocadaaca nanaco maatsiperri corri carroetsa cocacana, njite pitsafaa capoa pitsayani, njite piiyaca Nopeyajle, niini Njomica pirso. Ikatsa wa-Minalri icaiteca cayo. ²⁰ Pjimi matsia nocaiteca pirso, corriotsa picapá carroca maatsidalri noderriotsa lrinacojle jliaji jiipai, njite nanacojle njaji inaiki, mayamiotsa pjia imawadacakjeti rico.'' Icaamitsa nadiacawa talricanaati iderse.