¹ Manases isopiakena doce walria lriniita caojli pia lritalricanaataca; cincuenta y cinco walria lritalricanaataca Jerosalén lrico. Hepsiba pia jlidoa iipitana. ² Lrinaitja maatsi Dio ipeyajle, lrinaitja pjiomi njaji mapeyocanaaperri nacayosho njaji apaana inaikinai Dio ipeecoji Iraelnai ipeyajle. ³ Ima jlirreta tsenakja pjiomi njaji njerretanda yenondalripe jlinirri ezequías ipeecoji pia. Lrinaitja yenondalripe jiipada sho Baal irso, jlirreta tsakja Asera iema-carrona, lrinaitja cayoji Acab inaitja capisho pia, jliaji Irael italricanaa pia. Lria matsiadalri narso pjiomi njaji jiwirsida eenolricojle perri. ⁴ Manases jirreta jiipada yenondalripe idolonai irso Dio iipana lrico, Dio icaite cadaana pia: ''Caidalriwetsa niinica noipitana Jerosalén lrico.'' ⁵ Jirreta tsakja jiipada yenondalripe narso njaji jiwirsida eenolricojleperri yamemape Dio iipana iyacalrecoa lrico. ⁶ Lrimjaita lrienipe tiyee rico; lrinoparrota demonionai ianjikje sho, lrinaitja malrirricalri, njite lria naikjaolre njaji caacoperri naapiya njaji mayamperrim njite naapiya tsakja njaji icaolriti maatsiperri. Lrinaitja aima maatsiperritsa Dio ipeyajle, cayotsa lrikerroataca Dio. ⁷ Lricadaa Asera jinapjiam lrinaitjanda Dio iipana lrico. Dio icaite cadaana pia lrinaco jliaji panti David irso njite lrirri Salomón irso, cayoji: Lri-ricoda pantica jliaji njite Jerosalén lrico, jliaji yacaalre noniwananda norsowao nanakjoite njaji Irael poco, nocada cawaotsa nipitana niini caidalriwetsa. ⁸ Corrinatsaotsa nocadaa-carroca nanjicawa macadatsa njaji Iraelnai lrioya jliaji jiipai nocadanda narso njaji iferrinaipemi, mitsa njeepa cadaa cayekjatsa pjiomi njaji nonaalri nanaitjaca, nanaitja cadaa njaji iacoti kjaidaaperri norsodalri Moise icadaji narso nanaitjá carro.'' ⁹ Mitsa njaji inaiki aimadan corrin njemica lrirso, njite Manases ideena nanaitjá-carro maatsi, maatsí pja naoya njaji apaana inaiki Dio ipeecoji Iraelnai ipeyajle. ¹⁰ Niini caacoca Dio nanakjoite njaji lrirsoperri profetanai, cayoji: ¹¹ Coada Judá italricanaa, Manases, inaitja pjiomi njaji maatsiperritsa, maatsinaa pja naoya njaji amorreonai, njaji lripjeya perritoa iofaawa, njite lrima Judánai inaitjaca imatsicanawa nasho njaji idolonai, ¹² caishopa jliaji wa-Minalri, Iraelnai italricanaa, icaite cayoji: ''Nodeecaotsa aima maatsiperri Jerosalén naco njite judá tsakja, coca cadaotsa itaita jimicani corriotsa lritaitá carroketsa jlimica matsia. ¹³ Njorsa caotsa itsakja Jerosalén naco nowishopani, jliatsa jliaji njorsalri pia Samaria naco nocaite cádanaco lriacona, njite jliaji jimiñacada nopeecolri Acab iipaneta ikjoete nocaite cádanaco naacona; ¹⁴ Nopiyocaotsa jliaji Jerosalén ipirra, cayoji pada atsia jiatja capisho parrato. Lriyofieta pjiomi jliaji parrato jliatja cádanaconi. Nomenatacaotsa njaji neetepemi nanakjoite njaji noyaarrope, nocadaacaotsana njepondape icaapi ricona, ¹⁵ nanaitja capoa njaji maatsiperritsa Nopeyajle, njite nakerroataca Njoa. naferrinaipemi imotoca ikjoete Egipto lrikjoite atee panajiete toa.'' ¹⁶ Mitsa Manases iinoca aima inaiki mikjapantsa. Lripakjanta Jerosalén mayamperrim lriinoji sho. Lrinaitja cayoji pakjan capoena nasho njaji imatsicanaati lricadaalri Judánai inaitjaca imatsicanawa, nanaitja cádanaco maatsi Dio ipeyajle. ¹⁷ Njaji paana Manases inacoapanaperri, pjiomi njaji lrinaitjalri, pjiomi njaji imatsicanaati lrinaitjaji, paoketacana lri-ricoda jliaji paperra nadanacawa nanaco njaji talricanaatinai Judá lricope. ¹⁸ Mayami Manases lriferrinaipemi iinai, njite nadawani lriipana ipaniapji lricotsa, paniapjida Uza-dalri iipitana. Njite lrirri Amón nakja talricanaati jimao jliapodam. ¹⁹ Amón irso piakena ventido walria lriniita caojli lritalricanaataca; yamawalria lritalricanata Jeroslén lrico. Mesulemet pia jlidoa iipitana, Haruz iito Jotba darro. ²⁰ Lrinaitja maatsi Dio ipeyajle, cayotsa jlinirri Manases icayosho. ²¹ Amón inaitja pjiomi njaji imatsicanaati jlinirri inaitjaji, lria matsiadalri narso njaji idolonai jlinirri inaitjaji, lritoda lriorsipada narso. ²² Lrimaca lrioyawa Dio, na-Diote njaji jlinirrinaipemi, corrin lrinaitja cayoji Dio ioma capisho. ²³ Njaji Amón irsoperri nema lrikjoete niini nainocani lriipana lricotsa. ²⁴ Mitsa njaji ianiki Judá lricoperri naino pjiomi njaji iemacapem talricanaati Amón ikjoete, njite nacadaa Josía, Amón irri natalricanaawa lriarrontacao. ²⁵ Njaji Amón inacoapanaperri, njaji lrinaitjaji, paoketacana lri-ricoda jliaji paperra Judá italricanaanai inacoapanaperri naco. ²⁶ Njaji inaiki nadawani irrirrí-rico lriyadape Uza ipaniapjida lrico. Njite lrirri Josía nakja italricanata jliapodam.