¹ Njite jliaji talricanaati Ezequías jimi cádanaco jliaji nacaiterri lrirso, lritsafáa lritsayani, njite lritaacawa tsaco wanam sho lria-carroa Dio iipana lricojle. ² Njite lrimeenaca Eliaquim, jliaji ianjicada talricanaati dapana naco, Sebna tsakja, jliaji idanacaita njite napekipenaite njaji sacerdotenai, pjiomi iñampacacapewa tsaco wanam sho, inoparrotacaita Isaía iderse, Amos irri. ³ Lriaco Isaías irao: ''Cayo lricaiteca jliaji talricanaati Ezequías: Icatsa jliadaa jalredaoca cajliaji nincawa jirrapitakjeti, imenata kjeti, macoada kjeti tsakja, ima lriocaca njenaana jiicó carro njaji iempetipe, mitsa mjaidakenana namotoitá carrona. ⁴ Wadetsa pa pi-Minalri Dio jimica coanca caacoca jliaji comandante iapiyawalri, jliaji Asiria italricanaa imeenacalri lriometá carro jliaji Dio caafidalri, njite pi-Minalri Dio iemacaotsa lrikjoete jlimi capoa coanca caacocani. Panaya pitatja kjaida Dio iinai nanaco njaji neetepem matsiaperri aperritoaji.'' ⁵ Niini njaji talricanaati Ezequía irsoperri naocawa Isaía iderse, ⁶ njite Isaía iaco narso: ''Icaiteotsa i-minalri irso cayoji: Cayo lricaiteca jliaji wa-Minalri: ''Macadatsa lrifietaca pjia jliaji iacoti pjimirri, naikjaote njaji iacoti namacadawalreta shopa njoa njaji Asiria italricanaa irsoperri. ⁷ Nocadaotsa lrinaco pada icaolreti jlimí carroatsa pada iacoti lrinakjoite, njiteotsa lridiawa jlipaite ricojle. Nocadacaotsa pada iino carroni matseta sho jlipaite ricotsa. ⁸ Lridia cádanco jliaji comandante yaapiyawalri Asiria italricanaa iderse, lrioketani lrinoacacawa Libna ikjoete, jlimi capoa talricanaati imotocawa Laquís lrikjoite. ⁹ Njite Senaquerib jimica Tirhaca, Etiopia italricanaa njite Egipto tsakja nawacaacawa nainoaca-carro lrikjoete, niini Asiria italricanaa imeenaca tsenakja iacoti Ezequía irso: ¹⁰ ''Picaite Ezequía irso, Judá italricanaa, cayoji: ''Macadatsa pi-Diote imañetaca pjia, lricaite cadaa pirso cayoji: Corriotsa Asiria italricanaa iyadacaotsa jliaji Jerosalén.'' ¹¹ Pianjintsa coanca nanaitjaca njaji Asiria italricanaa njaji jalredaoca lricoperri, nawayaketacana matsiape. Corriotsa pjiacarrocantja yomj nooya. ¹² Nadiote njaji jalredaoca lricoperri corrin namanacota njaji jiipai njonirrinaipemi iwayaketalrina: Gozan, Harán, Reset, njite Edén Telasar lrico. ¹³ ¿Capja icapatoa akjerreca njaji talricanaatinai Hamat, Arfad lricoperri njite njaji talricanaatinai nerricodaperri njaji yacaalre Sefarvain, Hena njite Iva?'' ¹⁴ Ezequía jipa ilee jliaji paperra nadenda lrirso njaji idecaperri iacoti. Niini lriacawa Dio iipana lricojle njite lripiajletacan Dio ikjaolreni. ¹⁵ Ikena Ezequía itatjaca Dio iinai, lriaco: ''Pjia, na-Minalri njaji tsolrodaonai iaimaperri, na-Diote njaji Iraelnai, Pjia iofacada piofacarroda naco napecolrico njaji Querobinai, icaamitsa Dio-ca Pjia nanaco pjiomi njaji talricanaatinai jalredaoca lricoperri. Icatsa Pjia inaitjalri njaji eenocoma njite jalredaoca tsakja. ¹⁶ Pimjeco njaji pjinacolrico, no-Minalri, pjimi carro. Pimjeco njaji pitjí picapacarro, pjimí carro njaji iacoti Senaquerib imeenacalri, coanca lricaaca lriicao jliaji Dio caafidalri. ¹⁷ Ajádalri, no-Minalri, njaji talricanaatinai Asiria lricoperri nawayaketaca njaji inaiki jalredaoca lricoperri, njite namatsikeetaca njepaite tsakja. ¹⁸ Namjaita tiyee sho njaji na-diote, ima atsianai inaitjaji catsana jaicopada sho, jiipada sho tsakja. Niini oopica Asirionai iwayakeetana. ¹⁹ Niini panaya, pjia wa-Diote, piyomjetaca fáa Asirionai ioya, notatjaca Piinai caiwirricotsa, nanjíi carroatsa njaji talricanaatinai jalredaoca lricoperri, icaamicatsa Dio-ca Pjia, Pjia wa-Minalri.'' ²⁰ Njite Isaía, Amos irri imeenaca iacoti Ezequías irso cayoji: ''Cayo wa-Minalri icaiteca, na Dio-te njaji Iraelnai: ''Picaite capoa njomi pitatja cádanaco noinai lrinacoapana jliaji Asiria italricana Senaquerib, Njominina pirso. ²¹ Cayo wa-Minalri icaiteca lrinaco: ''Rsoaji walridarrotoa Sión iito corrin roomaca pjia, niini rocaaca piicao romenata capoa pjia. Corrin tsoo roomaca pjia. ²² ¿Cocao jliaji piometalri? ¿Coca ikjoete caaco pjia maatsi, njite coca ikjoete pjirreta picapa pipadalreca lrico? ¡Dio ikjoete pinaitja cayo! ²³ Opi piometa jliaji waMinalri nanoma lrikjoite njaji pirsoperri, njite picaite cayoji: Norso capoa aima-carro noinoca shopao njorrawa jiipana yenondalri-naco, yenon cawa pjaa Livano naco. Noocacaotsa njaji cedro yenondalripe pjaa, njite njaji jaico cipre naniwananipem niinperri. njoewaotsa teeco corricawatsa coca jiewawa, coshoca jliaji awacada matsiadalri. ²⁴ Njokjenina ooniapji, opina noirsenina naonite nja apaana inaiki. Nometatena naonite njaji Egipto lricope njoipa coda shotsa. ²⁵ Corrin pianjíi opi rikjoite catsa nowaopia lrinaco jliaji coancaotsa nonaitjaca. Jliaji jiyapalrio panaya, njoatsa iwaopia lrina oopi rikjoite; pjiacarro iwayaketa njaji yacaalre taimí perri corri carroenatsa cocacan. ²⁶ Njaji lrinaikitena corrinatsa kjaida cana, corrinatsa nataitaca njite capaimanicana. Cayoketsana malritsi jipolre perri sho, njaji itaoñacape panti naco o yarroatim rico, namacawa lripjeyatoa natawiñacao. ²⁷ Mitsa noanjii matsia piofa cádanaco, pi-moto cádanaco, pjiewa cádanaco, njite coanca keerroaca pjia nokjoete. ²⁸ Kerroa capoa pjia nokjoete, njite njomi capoena pipadalreca naco, nocadacaotsa nopoirre pjitaco naco, njite nocadaotsa pinoma lrico jliaji corri dalriotsa icada piacawa; No-cadaa-carroatsa pidiawa lri ricodatsa jliaji inipo pinolri njiteo.'' ²⁹ Nocadaotsa pianjíi carro ajádalrica njaji iacoti nocaiterri pirso: Lrinaco walriaca jliaji njite pawalria nacojle pinjacaotsa njaji paniati imotocaperri jiwacatsa. Mitsa madalriwalria nacojlena isoenaotsa iapanaca inja-carroena nainaca, iapanaotsa camjerro injacarro lriinaca. ³⁰ Jliawatsa jliaji yomjedalri Judá inakjoite perri iitepen, capalricaotsani njite lrirsoatsa lriinaca. ³¹ Ima namotocaotsa Jerosalén lrikjoite njaji yomjeperri namacaji, nano tsakja njaji yomjeperri Sión lrikjoite. Cjaidadalri capoa jliaji wa-Minalri lricadaotsa cayoca. ³² Cayo lricaiteca jliaji wa-Minalri lrinaco jliaji talricanaati Asiria lricoda: ''Corriotsa lrinó carroca lri-ricoda jliaji yacaalre, corrin tsakjaotsa lriyawitá carroca apjewi lri yawitjiaco ajerreji. Corrin tsakjaotsa lrinó carroca ajerreji lridanaita iapiya, o jlica cantja lridanawa lrikjoete. ³³ Lridiá catsaotsa lri-ricokjatsa jliaji inipo lrinolritsa niini. Corriotsa lriofáa-carroca lri ricoda jliaji yacaalre. Icatsa lricaiteca jliaji wa-Minalri. ³⁴ Ima njoawatsa idanata jliaji yacaalre norsowao, njite lrikjaote jliaji norsodalri david.'' ³⁵ Njite apapia pada deepi naacojle, wa-Minalri inageleni iawa inoacawa nakjoete njaji asirionai nawacacalrio niini, lriino niini ciento ochenta mil tsolrodaonai. Niini nacafia cádanaco piyompinaco toa njaji atsianai, nacapa aima mayamperrim iorsoacawa macadatsa. ³⁶ Niini Senaquerib, Asiria italricanaa imaca njaji Iraelnai lridiá carro lriipana lricojle, njite corrin lrimotocawa Nínive lrikjoite. ³⁷ Njite papia nacojlena, lriofaa cadana toa lria matsiadalri lri-diote Nisroc irso lripananaa lrico, njaji lrienipe Adramelec njite Sarezer nainoni matseta shoni. Njite napitowa jiipai Ararat lricojle. Njitedalri lrirri Esar Hadón nakja jimao talricanaatican lriarrontacao.