¹ Ezequia imeenaca iacoti narso pjiomi njaji Irael lricope njite judá, lrimeenaca tsakja paperra lridananda narso njaji Efraín poco njite Manasenai, nanó-carro Dio iipana lrico Jreosalén lricojle, nawaadá carro Pascoa wa-Minalri irso, na Diote njaji Iraelnai. ² Ima jliaji talricanaati, njaji naapiyawanai, pjiomi njaji iwacaacalrio Jerosalén lrico caacope piaca lrinaco njite pacoaca nawaopiakje lrinaco, niini nacaite nanaitjá-carro Pascua yaamapi kerri naco pawalria iniita carropi naco. ³ Ima corrin piacatoa nataita nanatjaca kjeya ima corrica aima njaji sacerdotenai jienitacapewa namatsicana ioya Dio irso, njite corri capoatoa nawacaacawa njaji inaiki aimadan Jerosalén lrico. ⁴ Njite jliaji talricanaati icaiterri narso njaji inaiki aimadan, matsia njemicani. ⁵ Niini nacaite, nadee-carro iacoti lrinaco pjiomi Irael lrico, Beerseba nakjoite, teeco Dan nacojle, nanó-carro njaji naiki aimadan nawaada-carro Pascoa wa-Minalri irso, na Diote njaji Iraelnai, Jerosalén lrico. Ima corrica nacapa aimaca njaji inaiki, cayoji lricaite capisho jliaji paperra nadananda. ⁶ Niini njaji ideecaperri iacoti naapiya njaji naapiyawanai naawa pjiomi Irael lrico njite Judá lrico tsakja jliaji paperra talricanaati idananda, talricanaati inaacalre. naaco narso: ''Jia Irael lricoperri, idia ioma wa-Minalri, Abraham, Isaac, njite irael iDiote, Lritaitá carroatsa lridiacawa inacojle jia yomjeperri talricanaatinai Asiaria lricope icaapi ioya. ⁷ Manaitjacatsawa nacayosho njaji iferrinaipemi o nacayosho njaji ikitsiñape, njaji inaitjalri maatsi Dio ikjoete, na Diote njaji iferrinaipemi, cayoji icapa capisho, Dio icadaa natsicaacacácarrowa. ⁸ Wadee mjepacaca jia iferrinaipemi icayosho; matsiapja icadaacawa iMinalri irso, inoena Lriofacawa lrico Matsiadalri, jliaji jlienitanda Lrirsowao maatsidalri ioya caidalriwetsa, iáa matsiadalri iMinalri Dio irso, Lriirroa kjaidadalri jiená-carro ioya. ⁹ Ima idiacadawa iMinalri iderse, njaji ideecape njaji ikitsiñape, ienipepenaipe presó-carrona kjenaa watsa nacapaca narso, icaaminaotsa nadiacawa njepaite ricojle. Ima jliaji iMinalri Dio, kjenadalrica icapaca parso njite pakjamica lrimatsiaca sho, niini corriotsa Jliená-carroca lriecoa ioya, idia Lrikjaolre.'' ¹⁰ Niini njaji ideecaperri iacoti njeyapawa yacaalre icoami njepaite riope njaji Efraín poco, Manase poco, pjiomi nerricoda njaji inipo iacapewa Zabulón lricojle, mitsa njaji inaiki icaamitsa necaaca naicao. ¹¹ Mitsa, padapena inaiki Aser poco nakjoite-perri, Manase, njite Zabulón perri kjenaa najiacacawa niini nanoca Jerosalén lricojle. ¹² Njite Dio ipadameta nacaolre njaji Judá lricoperri, nataitá-carro nanaitjaca cayoji talricanaati, njite njaji naapiyawanai itatja capisho nainai, ima nanaitjaca cayoji Dio icaite capisho narso. ¹³ Aima inaiki iwacaacawa Jerosalén lrico nawaada carroa lrico, nainjacawa Peetje Meewidalritsa, yaamapi keerri nacoda. ¹⁴ Icaamitsa naca njeta napeeco njaji altar jerosalén lricoperri, pjiomi njaji altar namjaitacawa incienso; napeco pjiomina onipaokja lrico Cedrón lricoda. ¹⁵ Njiité dalri, naino jliaji cordero Pascua icaonada, catorce jalredaoca naco yaamapi kerri nacoda pawalria irso. Njaji sacerdotenai njite njaji Levitanai capaiman najiacacawa, niini njenitaacawa namatsicanaa ioya Dio irso njite nadee ofrenda namjaitaji Dio iipana lricojle. ¹⁶ Neemawa papocope naoyawaca, cayotsa Moisé idananda icaite capisho, jliaji Dio irsiodalri. Njaji sacerdotenai nawitsica njaji irranati levitanai ianipe narso. ¹⁷ Ima aima pia catoa nanakjoite njaji iwacaacalrio corriperri piatoa jienitaacawa namatsicanaa ioya Dio irso. Niini njaji Levitanai naino jliaji cordero Pascoa icaoyanada naikjaote njaji corriperritoa iamtsietacawa njite corri pia nataita nainoca maaficalri nadeenipe Dio irso. ¹⁸ Aima nanakjoite njaji inaiki, aima nanakjoite njaji Efraín poco inakjoite perri, Manase, Isacar njite Zabulón perri, corrin piacatoa namatsietacawa namatsicanaa ioya, mitsa, caicayatsa nainja injaodati Pascua icaoyanadatsa, corrin nanaitja cayoji Moise idananda icaite capisho. Ima Ezequia itatja piaca nanaco, lricaite nanaco cayoji: ''Jliaji wa-Minalri matsiadalri, jliayapetacaotsa pjiomi maatsirri lrioya jliaji ¹⁹ icaitecada lricaolre rico lrioma caotsa lrirsowawa Dio, jliaji iMininalriti, na Diote njaji iferrinaipemi, ima corricatsa nanaitjaca cayoji narso capishotsa nanaitjaca njewa carro lri-rico wajle jliaji corricawatsa pacapa maatsidalri.'' ²⁰ Njite Dio jimica Ezequia irso, niini lrimatsietaca njaji inaiki aimadan. ²¹ Njaji inaiki aimadan Iraelnai iofacapewa Jerosalén lrico, nacatiimatacawa lrikjaote jliaji nainjacawa Petje Meewidalritsa siete jalredaoca icoa, catiima pjiomina. Njaji Levitanai, njite njaji sacerdotenai naa matsiadalri wa-Minalri irso jalredaoca icoam, nacanta njite natoca njaji nacantshopa kjemanipe wa-Minalri irso. ²² Caaco Ezequia itiimati rico narso njaji Levitanai idenjirri wa-Mionalri irso. Niini nainjacatsa jalredaoca icoami siete jalredaoca naco, naino maaficalri ofrenda imaodacakjeti ikjaote, njite nacaite tsakja namatsicana Dio irso, naDiote njaji naferrinaipemi. ²³ Njite pjiomi njaji inaiki iwacacalrio njerreta pja jalredaoca nacatimataaca carroa, catiima nanaitjacani. ²⁴ Ezequia, Judá italricanaa iáa ofrenda sho narso njaji iwacaca-capewa mil toro, siete mil oveja; njite njaji naapiyawanai naa tsakja narso njaji iwacaca-capewa mil toro tsakja, njite die mil oveja njite cabra tsakja. Njite aima sacerdotenai imatsietacawa Dio ipeyajle. ²⁵ Pjiomi njaji iwacaaca capewa Judá lricope, naapiya njaji sacerdotena njite Levitanai, njite pjiomi tsakja njaji Irael lricoperri iwacaacalrio, njite pjiomi njaji corri peritsa nakitsiñape inocaperri irael lrikjoite, njite njaji iofacapewa Judá lrico, pjiomi nacatimataacawa pekirritsa. ²⁶ Catiimana pekirritsa Jerosalén lrico, ima Salomón jiawajli , David irri, Irael italricanaa nakjoite corricawa pienatsa nanaitjaca caidalriji Jerosalén lrico. ²⁷ Njite njaji sacerdotenai njite Levitanai njenico nemawa nacadaa-carro iacoti matsiaperri nanaco njaji inaiki aimadan iwacaacalrio. Njemi pjiomi njaji nacaiterri, njite natatja nialre jirrawa eenolricojle, Dio iofalri nirse corricawatsa pacapa maatsirri.