¹ Njite natai camina pjiomi, pjiomi njaji Iraelnai nirse perri, naawa Judá iyacalre ricojle njite nawitita njaji pantipje shoperri nanaitjaji jiipada sho, naoca tsakja njewao njaji topji Asera iemacarrona, namatsiketa pjiomi njaji yenondalripe, pjiomi njaji altar Judá lricope, Benjamín lricope, Efraín lricope, njite Manase lricope, napeeco pjiomina. Njitedalrina pjiomi njaji inaiki aimadan Irael lricope nadiawa nacoanam naofacawa lrico nayacalre ricojle. ² Ezequía icadaa nadejica papocope coancadanacopeca apapoco jimao idenjica nanakjoite njaji sacerditenai njite njaji levitanai. Lricadaa namjaitá-carro ofrenda, njite njaji ofrenda namatsietaca shopa naapiyawaaca, naa-carro matsiadalri njite nacaite matsia wa-Minalri naco, naa-carro Lrirso Panti Macade ipananoma lrico. ³ Ezequía iáa tsakja ofrendawa lripirra ipe nakjoite tsa, neeti tsakja; icatsa njaji ofrenda namjaitaope piyompinaco njite dainoma, njite cayo tsakja nanaitjaca njaji oifrenda namjaitaope nawafeta carrodaa lrico, walripi keerri naco, njite njaji paana nacatimataaca carroa lrico cayoji wa-Minalri idana capisho narso nanaitjá-carro. ⁴ Mitsa Ezequia inaa njaji iofacapewa Jerosalén lrico naa-carro jliaji narsolritsa naaca narso njaji sacerdotenai njite njaji levitanai, nataitá-carro nadenjica namaodacatsa nanaitjpacarro cayoji Dio iaco icaite capisho. ⁵ Njaji inaiki aimadan Iraelitanai, njemi cádanacotsa jliaji talricanaati inaalri nanaitjaca, ikeena naaca aimasho napania nakjoite nainitanda naniwaca comaana, jaico tjedaa ianaa walriajaitoa, aceite, mapáa, pjiomitsa njaji naniwampe nakinkerre lrico. Nadee diezo pjiomi nacotsa aimashotsa. ⁶ Njaji Iraelitanai njite njaji Judanai, iofacapewa Judá lrico nadee tsakja nadiezmoni na-vacan nakjoite njite na-ovejan, njite nanakjite njaji njenitaji naMinalri Dio irsope, aima nawaketacana. ⁷ Madalripi kerri naco pawalria irso nainita caojli pia nawaketaca aima sho njaji naope, njite yaami nawaketacana siete keerri naco pawalria irso. ⁸ Ezequia njite njaji naapiyawanai naacádanaco naderse njite nacapa aimaca njaji nawaketaji, icaamits nacaiteca iacoti matsiaperri wa-Nimalri naco njite nanao njaji inaiki aimadan Irael lricoperri. ⁹ Njite Ezequia itatja jimio njaji sacerdotenai njite levitanai nanaco njaji nawaketampe toa. ¹⁰ Njite jliaji sacerdotenai iapiyawalri Azaria, Zadoc iipanate inakjoitedalri, jiepani, lriaco lrirso: ''Nanitaca ikjoete nadeeca ofrenda Dio iipana lricojle njaji inaiki, wainja matsia njite corrin canacaica warso, aima tsakja njaji neetepem toa, ima Dio icadaa matsiadalri narso njaji lrinaikite aimadan. Njite icatsa neetepemca njaji picapalri wawaketaca aimatoa. ¹¹ Niini Ezequia inaa namatsieta pjaaca nacadaacawa Dio iipana lrico, njite nanaitja cayo. ¹² Nataita cayami namatsietaca napieta tsenakja nadeeca na-ofrendani, na-diezmoni, pjiomi njaji Dio iyaaperri. Njite Conania, levitatairri, icatsa jliaji iajirrica nanaco njaji namatsietaji, njite lrinacojledatsa lriwerri Simei. ¹³ Njite Jehiel, Azaria, Nahat, Asael, Jerimot, Josabad, Eliel, Ismaquia, Mahat njite Benaía icatsa njaji Conanía njite lriwerritsa Simei iajínipe inaco, talricanaati Ezequia icadaji, Azaria iapiya, jliaji iajirri Dio iipana naco. ¹⁴ Njite Coré, Imna irri levitatairri, jliaji iwapacada pantinoma jerri imotokema nakjoite, icatsa jliaji iajirrica nanaco njaji ofrenda nacadaji njaji ianiki Dio irso nacaolre rikjoitetsa, jliacatsa ianjii coanca lricadaaca njaji ofrenda wa-Minalri irso, njite njaji ofrenda matsiaperripjaa. ¹⁵ Icatsa njaji lriajinipe inaco: Edén, Miniamin, Jesúa, Semaía, Amaría njite Secanía, sacerdotenai iyacalre rico. Nacadaa nadejicalrewa corricawatsa nataita nanaitjaca maatsi, nataitá-carro naaca njaji ofrenda narso njaji nakitsiñape papoco, papoco irso, cosho catsa namaimaca. ¹⁶ Naa tsakja narso njaji atsianai irsocape madalriwalria toa napekirrica naco, njaji nadanaji iipitana nadanacawa neepitana pjiomi paperra lrico nacadaalri Dio iipana lrico coca iipaneta inakjoité-dalricani, cayoji nadana capisho jalredaoca icoami neepitana nano cádanaco nadeji nadejicawa lrico njite coca inaipococa. ¹⁷ Nacadaa nadeji njaji sacerdotenai coancatsa naoketaca naferrinaipemi ipaperranim, cayo tsakja nanaitjaca njaji levitanai irsocapena vente walria napekirrica nakjoite ipeyajle, kjerrecawaca nadeji njite coca inaipococa. ¹⁸ Njeeta tsakja nainai neenipe tsodalripe toa, naninai njite neenipe atsianai, inaitjepe pekipenaina, caiminitsa pjiomi naofacawa lrico, ima matsiaperricana njenitaaca capoa njawaacatsa maatsidalri ioya Dio irso. ¹⁹ Njite njaji sacerdotenai, Aarón inakjoite perri njaji irsocape nakinikerre yacalre icoami naofacawa lrico, iofacape nainai njaji levitanai irsocape tsakja neepitana paperra lrico, nacadaa tsakja naa-carro nainai nanakjoite njaji ofrenda narso njaji atsianai sacerdotenai. ²⁰ Cayominitsa Ezequia inaitja pjiomi Judá lrico. Lrinaitja matsiape minitsa li-Minalri Dio ipeyajle, corrin jlienaca Lrioya lrinaitjá-carrontja maatsi. ²¹ Lriniitaca icoam pada iwaopiakjeti lridejí-carro Dio iipana lrico, lricapa cádanaco njaji Dio yaaco, njaji lrinaalri nanaitjaca, coanca lrirsotsa lrinaitjaca lriomá-carro lri-Diote, lrinaitjani lricaolre rikjoite, njite matsia lrimotoca lrirso.