¹ Ezequía iniita italricanaataca lrirso caojli pia venti cinco walria lripekirrica naco; ventinueve walria lritalricanaataca Jerosalén lrico. Abias pia jlidoa iipitana, Zacaria iito. ² Lrinaitja matsia Dio ipeyajle, lrinaitja cayotsa lrinaitja capisho pia jliaji lriferrimi David. ³ Lriniita carrowalri lrico, lriniita cádanaco lritalricanaataca, keerri inita carropi naco pawalria irso, Ezequia imjeco njaji Dio ipananoma njite lrimatsietana. ⁴ Lridee njaji sacerdotenai njite njaji levitanai, lriwaketana yacalreecoa lrico jeerri imoto kema. ⁵ Lriaco narso: ''¡Jimi norso jia levitanai! Jienitacawa maatsidalri ioya jiwacawaacatsa Dio irso, njite jienita tsakja maatsidalri ioya jliaji wa-Minalri iipana, na-Diote njaji iferrinaipemi, njite idee teeco njaji maatsiperri lrioya jliaji mamatsicanaacawa ioya. ⁶ Ima njaji waferrinaipemi nanaitja maatsi wa-Minalri Dio ipeyajle; namaca piacani, nacabocoetaca neecoa wa-Minalri iofacawa ioya, icaamitsa nadajitetacani. ⁷ Naita lripananoma pjeewa cawa lrico njite nayalriketa njaji lricamarranaa; corrin namjaita incienso, corrin tsakja naa ofrenda na-mjaitanda corricawa pacapa imatsicanaati naDiote irso njaji Iraelnai. ⁸ Caishopa Dio iirroa jiwacawa jiwa piacawa nanaco njaji Judá lricope njite nanaco njaji Jerosalén lricope, niini Dio icadaa cayoji icapa capisho, pada pafiocawa lrico, coanca maatsi nanaitjaca narso, njite corritsa cocaca iomana. ⁹ Caishopa calretsa nainocana matseeta sho, njite naikjaote tsakja presoca njaji weenipe, waitonaipe njite njaji waninaipe tsakja. ¹⁰ Niini panaya nocaolre rico, nooma nonaitjaca pada iacoti wa-Minalri iinai, na Diote njaji Iraelnai, lrirroa kjaidadalri iáa-carro teeco waoya. ¹¹ Jia noenipenaipe, ajena iinoca jia panaya, ima jliaji wa-Minalri lriniwanaca jia iemá-carro lripeyajle, iáa-carro lrirso matsiadalri, Lrirsoperri-carro jia, njite imjaitá-carro Lrirso incienso.'' ¹² Niini njenicocawa njaji levitanai: Mahat, Amasia irri, Joel, Azaria irri, nanakjoite njaji coatitanai; nanakjoite tsakja njaji Merarinai, Cis, Abdi irri, Azaria, Jehalelel; gersonita inakjoite perri, Joa, Zima irri, Edén, Joa irri; ¹³ Elisafan ienipe inakjoite perri, Simri, njite Jeiel, njite Asaf ienipe inakjoite perri, Zacaria njite Matania; ¹⁴ Hamán ienipe inakjoite perri, Jehiel njite Simei; Jedutún ienipe inakjoite perri, Semaia njite Uziel tsakja. ¹⁵ Nawaketa pjiomi nakitsiñape, njenitaacawa namatsicanaa ioya njawaacatsa, ikeena njewacawa cayotsa talricanaati inaa capisho nanaitjaa, ima cayoca wa-Minalri iaco icaiteca, natjá-carro wa-Minalri iipana. ¹⁶ Njaji sacerdotenai njewao Dio iipana iwawalricojle napiyó-carroni; namotoita pjiomi njaji dofenaa-perri naoketaji Dio iipana lrico yacalrecoa lricojle. Njite njaji levitanai nadeecana onipaokja Cedrón lricojle. ¹⁷ Nainita pia njenitacawa maatsidalri ioya Dio irso lriniitacadaa jliaji walripi keerri pawalria iniita-carropi naco. Niini ocho jalredaoca naco lrinaco minitsa keerri, naocawa wa-Minalri ipananomajle. Njite ocho jalredaoca naco pja tsenakja, njenita Dio iipana matsiperri ioya. Niini diecisei jalredaoca naco lrinaco jliaji kerri pawalria initacarropi naco, nataita pjiomi. ¹⁸ Niini naawa talricanaati Ezequia iderse, talricanaati dapana lricojle, naaco lrirso: ''Opona wapiyo matsia Dio iipana, njite jliaji altar wamjaita carroda naco ofrenda, njite wacadaa pjiomi njaji padejishopa niini, caitsakja jliaji mesa pacadacawa jliaji peetje Dio icapacawa lrico njite pjiomi njaji padejishopa niini. ¹⁹ Icatsa cayo wamatsietaca njite fenitana maatsiperri ioya pjiomi njaji talricanaati Acaz jienitalri pia njite corri caojli pia lrinaitjaca matsia jlia caojli pia talricanaati. Njite panaya, icatsa wacadaacana Dio ialtarni ipeyajle.'' ²⁰ Njite jliaji talricanaati Ezequia, lricafiawa piyompinacotoa lriwakeetácarro pjiomi njaji naapiyawanai njaji yacaalre lricoperri; lria naapiya Dio iipana lricojle. ²¹ Nadee nirse sietena toro, sietena carnero, sietena oveja, njite sietena cabra atsianape nacadaope ofrendao namatsicanaa ikjaote njaji inaiki aimadan talricanaati iwapaji, lrikjaote jliaji Dio iipana iwawalricojle, njite Judánai tkjaote tsakja. Talricanaati Ezequia inaa njaji sacerdotenai, njaji Aarón ienipe, nainó carro njaji maaficalri lrinaco jliaji altar Dio iyada. ²² Ikeena nainoca njaji toronape, njite njaji sacerdotenai njepa pjiomi njaji nairrana nawitsicá-carrona altar naco. Naino tsakja njaji Carnero, njaji oveja njite pjiomi nairranapemi njaji maaficalri nainoji, nawitsiketana altar naco. ²³ Nadee njaji cabra atsianape ofrenda sho namatsicanaa ikjaote, nacadaana talricanaati ipeyajle njite napeyajle njaji inaiki aimadan; ikeena nacadaaca nacaapi nanaco. ²⁴ Njite sacerdotenai iino njaji cabra atsianape, njite nacadaa neerrana ofrenda sho namatsicanaa ikjaote altr nco naitá-carro namatsicanaa pjiomi njaji Iraelnai, ima jliaji talricanaati icaite piana nacadaa-carro ofrenda namjaitanda njite pada ofrenda namatsicanaa ikjaote pjiomi njaji Iraelnai. ²⁵ Ezequia icadaa njaji levitanai wa-Minalri iipana lrico, njepa nakjemata njaji parratoitape shoperri, arpa, jaicoitape, nacada neema matsia coanca David iipaneta ino-capisho, Gad, icapacaita talricanaati icao, njitena jliaji inoparrotacaita Natán, ima cayopia wa-Minalri icaiteca narso nanakjoite njaji profetanai. ²⁶ Nemao njaji levitanai, njepa nanacoa njaji David itocaji, njite njaji sacerdotenai njepa trompeta. ²⁷ Ezequia inaa namjaitá-carro maaficalri altar nacó Dio irso. Nainiita cádanaco namjaitaca ofrenda Dio irso, nainita tsakja nacantaca Dio irso trompeta sho, pacoacatsa nainai njaji David itocaji pia, Irael italricanaa. ²⁸ Pjiomi njaji iwaketaacalrio naa matsiadalri Dio irso, njite njaji icantacaperri, nacantaca, njite njaji ipjiacape trompeta, napjiaca trompeta; cayominitsa nanaitjaca akjerreca lriwayacawa jliaji ofrenda. ²⁹ Nataita cayami nanaitjaca jliaji ofrenda, jliaji talricanaati njite pjiomi njaji lrinaiperri nacoanjawa naacarro matsiadalri. ³⁰ Njite talricanaati Ezequia, njite njaji naapiyawanai nacaite levitanai irso nacanta-carro nacawa matsiadalri Dio irso, David iacoarrom sho njite Asaf, inoparrotacaita iacoarrom sho tsakja. Nacanta matsiadalri itiimati rico, njite nacoanjawa naa-carro matsiadalri. ³¹ Njite Ezequia iaco: ''Panaya dekja opina jienitacawa maatsidalri ioya Dio irso jiwaacatsa. Inoena ajerreji, ideena maaficalri iinoada njite ofrenda tsakja matsia capoena Dio iipana.'' Niini njaji iwacaca capewa nadee maaficalri nainoaope ofrenda sho nashopawa matsiadalri, njite pjiomi njaji pomenaperri nacaolre rico nadee ofrenda namjaitaoda. ³² Ikapiatsa namaimaca-ca njaji ofrenda namjaitaoda njaji iwacaacalrio, setenta torona, cien carnero, njite dociento cordero atsiana. Pjiomi njaji maaficalri ofrenda namjaitaoda wa-Minalri irso. ³³ Njaji ofrenda matsiaperri njenitaji lriicaona icapiatsa namaimaca-ca seisciento buey njite tremil oveja. ³⁴ Mitsa yamadan pjacatsa njaji sacerdotenai nacó-carro neya njai maficalri ofrenda namjaitaope, niini njaji nakitsiñape, levitanai, nakitsindatana akjerreca nataita pjiomi. Akjerreca nawayaketa njenitacawa maatsidalri ioya Dio irso pjiomi njaji sacerdotenai, ima njaji levitanai corrin taarra cantjana njenitaaca cádanacoa namatsicana ioya Dio irso naoya njaji sacerdotenai. ³⁵ Njite aima tsakja njaji maaficalri namjaitaji; namjaitana neeti showaacatsa, icatsa ofrenda nacaitecawa pacoacacatsa nawaopiakje wa-Minalri iinai, Niini pia tsakja jaico tjeda-ianaa namjaitaca icoam njaji ofrenda namjaitaji. Niini jliaji wa-Minalri ideejicanaa opi nacadaa tsenakja matsia lri-ricoda. ³⁶ Catiima pekirritsa Ezequia, njite tsakja njaji inaiki, ima Dio imatsieta tsenakja njaji inaiki, kjeya capoa nanaitjaca njaji idenjikjeti.