¹ Njite siete walria nacojle, jliaji sacerdotenai iapiyawalri Joiada imeenaca inaitja iacoti nainai njaji comandantenai irsocape cien inaiki narsoperri: Azaria, Joram irri, Ismael. Jonatán irri, Azaria, Obed irri, Manases, Aida irri njite Elisafat, Zicri irri. ² Njewawa Judá lrico njite nawaketa pjiomi njaji levitanai njite pjiomi njaji inaiki Judá lricoperri, nja tsakja njaji napiyawanai oopi ricotsa naapaneta nakjite njaji Iraelnai. Nano pjiomi Jerosalén lricojle. ³ Pjiomi njaji inaiki nanaitja pada iacoti lriapiya jliaji talricanaati Dio iipana lrico. Joiada iaco narso: ''Icapa, jliawatsa italricanata jliaji talricanaati irritsa, cayotsa lricaite capisho jliaji wa-Minalri David iipaneta naco. ⁴ Cayoatsa inaitjaca: pamoyoa ipamoyoaca naco nanakjoite njaji sacerdotenai, levitanai inoape idenji sabado lrico, nawapaotsa pantinoma. ⁵ Njaotsa njaji nakitsiñape pamoyoa perri nawapacaotsa talricanaati dapana lrico, njite nja papoco nawapacaotsa jliaji pantinoma macapeki. Njite pjiomi njaji inaiki nawacacaotsa Dio iipana iyacalrecoa naco. ⁶ Macadaa tsaotsa pada jiewacawa Dio iipana lrico, icaamitsaotsa njaji sacerdotenai, levitanai idenjicapeotsa niini. Nataita njewacawa ima mamatsicanaacana, mitsa nja paana inaiki inaitja cayoji Dio icaite capisho lriaco lrico. ⁷ Njaji levitanai narsotsa nadanataca jliaji talricanaati, nacoana njaji atsianai njepaca nainoaca shopawa nacaapi rico. Coca cadaa jiewawa panti ricojle, lrirsotsa mayamican. Iwapaotsa jliaji talricanaati jliewa cádanaco njite jliewa cádanaco tsakja.'' ⁸ Niini pjiomi njaji levitanai njite pjiomi njaji Judá lricope nanaitja cayoji Joaida, sacerdotenai iapiyawalri icaite capisho. Nacoanamtsa nadeeca nanaikite, njaji idenjirriotsa sabado lrico njite njaji corri perritoa idenji sabado lrico tsakja, ima jliaji sacerdotenai iapiyawalri corrin jlienitacantja toana. ⁹ Njite Joiada, sacerdotenai iapiyawalri, lridee narso njaji comandantenai namolroconiwa, nadanaita tsoitepe njite macaitepe tsakja lriyapemtoa jliaji talricanati David nacadaji Dio iipana lrico. ¹⁰ Joiada icadaa tsolrodaonai iwapacaperri, nacoanaa njepaca nainoaca shopawa nacaapi rico, neemawa atsia jliemjete njite inarroemjete Dio iipana irso, altar icodapi njite jliaji Dio iipana, nawapaca jliaji talricanaati. ¹¹ Ikeena nadeeca jliaji talricanaati Ocozía ienipem, Joás, njite nacadaa jliwida naco corona, njite naa lrirso jliaji Dio inaitja shopam iacoti. Ikena Joiada naapiya nja lrienipe narro jliwida naco aceite jlia carroena talricanaati. Njite naaco: ''¡Wia watsa lriofaacawa jliaji talricanaati!'' ¹² Njite Atalía jimi cádanaco namaolrena njaji inaiki aimadan njecojicawa naaca matsiadalri lrirso jliaji talricanaati, rono naderse Dio iipana lricojle. ¹³ Niini rooca rocapa lriemacawa jliaji talricanaati panti ipje icodapi Dio iipana lricoda, cayotsaji nanaitja capisho mana oopi, njite njaji capitamanai njite njaji ipjia cape trompeta neemacawa talricanaati icodapi. Pjiomi njaji inaiki Irael lricoperri nacatimataacacawa njite napjiaca na trompetani, njite njaji icantacape nakjemataca pjiomi njaji natocaji, njaa iinita canción naapiya nashopa matsiadalri. Niini Atalia itsafaaca rotsayani njite rowanaca kjaida: ''¡Neemaca nokjoete, neemaca nokjoete!'' ¹⁴ Njite jliaji sacerdote Joiada, lrinaa njaji comandantenai irsocaperri cien nanaikite, njaji yajicape nanaco njaji tsolrodaonai aimadan, cayoji: ''Yaa imotoitano naojiete njaji iwapacapeno. Pjiomi njaji iomacape idaanatacano, icadaa nainocano matseeta sho.'' Ima lriaco pia jliaji sacerdote narso: Macadatsa nainocano Dio iipana lrico.'' ¹⁵ Niini njaji inaiki neemacawa yamemape nanaitja capisho inipo rorso, roa carro niini caballo ipananoma lricojle, iacadawa talricanaati dapana lricojle, icatsa nainocano niini. ¹⁶ Njite Joiada inaitja pada iacoti nainai njaji ianiki njite jliaji talricanaati, nacaitecawa wa-Minalri inaikitecana. ¹⁷ Ikena naacawa njaji inaiki Baal iipana lricojle napeeco carroni. Nawikji Baal ialtarni, jlinapjiami, njite naino pjiomi Matán, Baal isacerdoteni nanacotsa njaji lri-altar perre. ¹⁸ Joiada icadaa caconaperri Dio iipana lrico njaacarro ianjíi njaji sacerdotenai levitanaitsa, njatsa njaji David icadajitsa nawapácarro Dio iipana lrico, imjaitacaope ofrenda Dio irso, cayotsa lricaite capisho Moisé ipaperran lrico, nacanta cayawa itiimati rico, cayoji david icananta capisho piana. ¹⁹ Joiada icadaa iwapacaope Dio iipananoma lrico, wedee njewacawa nirse njaji corriperritsa imatsietacawa Dio ipeyajle namatsicana ioya. ²⁰ Ikena Joiada iawa naapiya njaji comandantenai cien perri inaikite, njaji caconaperri, njaji iwapacaperri njite pjiomi njaji inaiki naorrocoetá carro jliaji walridalri talricanaati Dio iipana lrikjoite talricanaati dapana lricojle, njeewawa napananoma lrico njaji iwapacaperri talricanaati dapana. Ikena Joás iofacawa naofacarroda naco caconaadalri njaji talricanaatinai. ²¹ Niini nacatimataacawa pjiomi njaji inaiki aimadan, njite namawadacatsa njaji inaiki yacaalre rico. Njite rsoaji Atalía, nainono matseta sho.