¹ Siete walri oonia lripekirrica jliaji Joás lriniita caojlina lritalricanaataca. Coarenta walria oonia lritalricanaataca Jerosalén lrico. Sibia pia jlidoa iipitana, Beerseba darro pia. ² Joás inaitja cayoji Dio yoma capisho caidalritsa caafi cadanaco jliaji sacerdote Joiada. ³ Joiada ioma lrirsowao yaamama inaitjepe, njite njanirrica njaji lrienipe atsianai njite inaitjepe tsakja. ⁴ Njite njapodamina njaji jiyapalrio, Joas iwaopia namatsietacarro Dio iipana. ⁵ Lriwaketa pjiomi njaji sacerdotenai njite njaji levitanai, lriaco narso: ''Papia watsa pawalria icoam iacaotsa nayacalre rico pjiomi njaji Judá lricope iwaketacarro palraata nainai njaji Iraelnai imatsieta shopa iDiote iipana. Iniitena inaitjaca jliaji nocaterri irso.'' Mitsa njaji levitanai corrin nanatja catoa. ⁶ Niini jliaji talricanaati Joás iwana jliaji sacerdote Joiada, njite lriaco narso: ''¿Coadao corrin pinaitjaca jliaji nocaiterri pirso, pjitácarro levitanai ioya njaji palaraata njetaji naoya njaji Judá lricope njite naoya njaji Jerosalén lricope cayoji Moisé, Dio irsodalri icaite capisho poia njite njaji Iraelnai nawacaaca cadanacopia, lricaona jlialji pantiita naofacawa njaji Dio iacoami nadananda?'' ⁷ Ima njaji atalía ienipenaipe, rsoaji iinarro maatsídarro, romatsieketa piaca jliaji Dio iipana ima roaca njaji inaaniti matsiaperri Dio iipana lricope narso njaji Baalnai. ⁸ Niini jliaji talricanaati inaa nanaitjácarro apana patowa njite nacadaani pemajletsa pjewacawa Dio iipana lricojle. ⁹ Njite nacaite Pjiomi Judá lrico njite Jerosalén tsakja nadee carro palraata njaji inaiki cayoji Dio irsodalri Moisé icaite capisho narso njaji Iraelitanai jalrapocolri ricojle pia. ¹⁰ Niini pjiomi njaji caconaaperri, pjiomi njaji inaiki aimadan nacatimataacawa njite nadeeca napalraatani nacadaacarro lriricoda jliaji patowa akjerreca pakjamini, njite napkjantani. ¹¹ Njite cadana njaji caconaaperri, talricanaati irsoperri, levitanai iáa cadanaco narso jliaji patowa, njite nacapa cadanaco aimaca palraata lri-ricoda nadee, jliaji idanacada talricanati irsodalri njite jliaji caconaite, sacerdotenai yaapiyawalre irsodalri njepa nadee jliaji patowa njetácarro lriitada njite nadee tsenakja nacadaacarro lriofacawa lricotsa. Cayo minitsa nanaitjaca aima walria jalredaoca, nawaketácarro aima palraata. ¹² Niini jliaji talricanaati Joiada iapiya icadaa njaji palraata narso njaji idenjicape Dio iipana lrico. Njaji atsianai naoma idejicaope ipatsicacape, carrapinanai namatsietacarro Dio iipana, nainai tskja njaji idenjicape tsipalra sho njite bronce sho tsakja. ¹³ Njaji idenjicape nanaitja nadejicalre, njite matsia lrimotoca narso jliaji nadejirri; namatsieta jliaji Dio iipana cayotsa lricapacaaa shotsa, maatsicawapena nadia namatsieta matsia tsenakjan. ¹⁴ Nataita cádanaco namatsietaca, nadieta njaji palraata iitepem talricanaati irso njite Joiada tsakja. Nasho njaji palraata nanaa nanaitjaca naofaacarronape Dio iipana icaona, tsipalraapipe nadejishopa niini njite nadejishopa ofrenda: Cuchara, paana pja owirroapipe njite palratapipe tsakja. Namjaita njaji ofrenda Dio iipana lrico, cayominitsa nanaitjaca caafi cádanaco Joiada. ¹⁵ Pekirri kena Joiada, mayamini jliofacayamiwa aima jalredaoca; lrirso piakena ciento trenta walria lripekirrica lria mayamini. ¹⁶ Nadawani David iyacalre rico nadawacawa lricotsa njaji talricanaatinai, lrinaitja capoa matsia Irael lrico, lrinaitja matsia DIo irso njite Dio iipana irso tsakja. ¹⁷ Mayami cayami Joiada, njaji Judá iapiyawanai naawa talricanaati iderse njite nanaitja matsia talricanaati ipeyajle. Njite talricanati jimi narso. ¹⁸ Niini namaca naoyao jliaji Dio iipana, naferrinaipemi iDiote, njite naaca matsiadalri narso njaji Asera idiotenaipe njite paana idolonai. Lrikjaote jliaji maatsirri nanaitjalri Dio iirroa jiwa nanaco njaji Judá njite Jerosalén lricope tsakja. ¹⁹ Cayo cadana njaji inaiki, Dio imeenaca naikjaolre profeta nadietacarrona tsenakjatja namatsicana ioya; njaji profetanai nacaite cocaca njaji maatsirri inolri nakjoete njaji inaiki, mitsa corrin njemica narso ²⁰ Ikena Dio icaolrini iorroco Zacaria naco, inoparrotacada Joiada irri; Zacaria jinico lricaiytecarro njaji inaiki, lriaco irso: ''Cayo Dio icaiteca: ¿Coada imjepata Dio iaco lricadanda warso? Niini corriotsa matsiacarroca jia. Imaca capoa Dio, opina tsakja Lrimaca jia.'' ²¹ Mitsa njaji naiki nanaitja pada iwaopiakjeti Zacaria ikjoete, niini nainocani jiipada sho Dio iipana iyacalrecoa lrico talricanaati inaacalre. ²² Cayotsa Joas, Judá italricanaa imaodaca lrioya jliaji matsiacalri Joiada, Zacaria jinirri inaitjalri pia lrirso. Opinakja lriino Joiada irri. Mayami cadanaco Zacaria, lriaco Joas irso: ''Dio icapa jliaji pinaitjalri, njite Jlia watsa itatja piinai lricoada.'' ²³ Niini pawalria iwayacacawa, Aram italricanaa iawa naapiya njaji lritsolrodaonaipe Joas ikjoete. Naocawa Judá lrico njite Jerosale lricojle; naino pjiomi naapiyawanai njaji inaiki, njite nameenaca pjiomi nanaanipem lrirso jliaji talricanaati Damasco lricoda. ²⁴ Yamadapena pjatsa njaji tsolrodaonai arameonai inolri pia, mitsa Dio icadaa njamácarro njaji tsolrodaonai aimadan pja naoya, namaca capoa Dio njaji Judánai, naferrinaipe iDiote. Cayotsa Dio icadaa Joas icaoñaca njaji maatsirri lrinaitjalri. ²⁵ Nadia cadanacoena njaji arameonai, naino pjalrajlaimi jliaji talricanaati Joas. Njite njaji lrirsoperri nanaitja pada iwaopiakjeti lrikjoete nainó carroni lriino capoa sacerdote Joiada ienipenaipe. Nainoni mayamin lriorsoacarroita lricotsa; nadawani David iyacalre ricotsa, mitsa teecojletsa nadawani nadawacawa njaji talricanaatinai. ²⁶ Icatsa njaji inaiki iwaopialri coancarro nainocani: Zabad, Simeat irri, Amon darro, njite Jozabad, Simrit irri, Moab darro. ²⁷ Njite nanaaco njaji Joas ienipe inacoapanaperri, njaji inoparrotakjeti lrikjoete perri, lrinaacawa namatsietaca Dio iipana, pacapacana lri-ricoda jliaji paperra talricanaatinai inacoapanaperri. Njite lrirri Amasia nakja italricanata jliapodam.