¹ Njaji inaiki Jerosalén lricoperri nacadaa talricanaati carro Ocozia (Joacaz), Joram irri iwerriti, ima njaji papoco atsianai maatsiperri inocaperri nainai njaji árabenai naino piaca njaji lrienipe pjerritinaipe. Cayotsa talricanaatica Ocozia (Joacaz) Judá lrico, Joram irri, Judá italricana pia. ² Ocozia (Joacaz) irsopiakena venti do walria lripekirrica lriinita caojli pia lritalricanaataca Jerosalén lrico. Talía pia jlidoa iipitana, Omri iito. ³ Lrinaitja tsakja cayoji nanaitja capisho njaji Acab iipaneeta, jlidoatsa pia rsoaji icaite lrirso lrinaitjá carro njaji maatsirri. ⁴ Ocozia (Joacaz) inaitja maatsi Dio ipeyajle, Lrinaitja cayoji nanaitja capisho njaji Acab iipaneeta, ima icapiatsa njaji icaitecapeni jlinirrincuirri jiapodam, atee kjerreca lriwayao. ⁵ 5Lrinaitja cayoji nacaite capisho lrirso; Ocozia iawa Acab irri iapiya, Joram, nainoaca carro Hazael ikjoete, Aram italricanaa, Ramot lrikojle Galaad lrikoda. Mitsa, njaji arameonai nanaitja lriyaoniwa jliaji Joram. ⁶ Niini Joram idiawa Jezreel lrikojle lritapiacá carroa lriyaoni ioya nanaitjalri lriso njaji arameonai nainoacá cádanacoa Ramot lrico, lrinoaca cádanaco Hazael ikjoete, Aram italricanaa. Niini Ocozia (Joacaz), Joram irri, Judá italricanaa iáa icapa Joram iderse, Acab irri Jezreel lrikojle, ima cayaonica Joram. ⁷ Dio piatsa icadaa mayamí carro Ocozías (Joacaz) lria cadanaco lricapa Joram iderse. Lrioca cádanaco lriderse, lriawa Joram iinai nainoacá carro Jehú ikjoete, Nimsi irri, jliaji Dio iniwananda iwaketaoda Acab iipaneta. ⁸ Njite Jehú inaitja cádanaco cayoji Dio inaa capisho lrinaitjaca narso njaji Acab iipaneta, lricapa njaji Judá iapiyawanai njite njaji Ocozías (Joacaz) iwenaipe idenjicape pia Ocozías (Joacaz) irso; icaamitsa Jehú iinocana. ⁹ Jehú ianji ioma Ocozías (Joacaz); njite lrioketani lridawaacalri niini Samaria lrico, nadee Jehú iderse nainó carron. Nadawani, ima Jehú icaite: ''Icatsa Josafat irrica, jliaji iomalri Dio lricaolre rikjoite.'' Cayotsa corrinatsa Ocozías (Joacaz) iipaneta itaita pienatsa italricanaataca. ¹⁰ Njite rsoaji Ocozías (Joacaz) jidoa, Atalía darro ipitana, rocapa cádanaco mayamica rirri Ocozía (Joacaz), ronaa nainoca pjiomi njaji yempetipe Ocozía iipaneta lricope. ¹¹ Mitsa rsoaji Josabet, talricanaati Joram iito, Ocozía iweedoa, rsopa rodawa pada Ocozía (Joacaz) irrida Joás dalri iipitana. Rodawani teeco naoya njaji pana yempetipe Atalía inaalri nainoca, rodawa jliaji yempeti njite rsoaji itaoñacadani patawajle rico Dio iipana lrico. Cayotsa Josabet, talricanaati Joram iito, lriini jliaji sacerdote Joiada. Rodawani Talía ioya wadee roinocani. ¹² Lriofa pia nainai. lridawaacawa Dio iipana lrico sei walria, Atalía italricanaata cadana toa njepaite ricó.