¹ Josafat, Judá italricanaa idia iocawa lriipana lrico Jerosalén lricojle matsiatsawa. ² Njite inoparrotacada Jehú, Hanani irri, lriawa lricapaaca carro talricanaati Josafat iapiya, njite lrico lrirso: ''¿Coada pikitsindata jliaji inaiki matsidalritsa? ¿Capja matsiatsa pakitsindataca jliaji jipondatacada Dio? Njite cayo capoa pinaitjaca, Dio iiroa jiwaca pinaco. ³ Mitsa, niini pada pimatsiaca, pipeeco capoa Asera iema carrona pjipaite ioya, njite picadaacawa pioma carro Dio picaolre rico.'' ⁴ Josafat iofa piawa Jerosalén lrico; njite lrimoto tjenakja lripieta naikjaolre njaji inaiki Bersebá nakjoite, teeco lriocawa awacada cawa Efraín poco iyada, lricadaa tsenakja nadiá carro naoma wa-Minalri, nja nirrinaipemi iDiote. ⁵ Lricadaa inaiki icaitecape nanaco njaji inaiki pjiomi nerricoda njaji yacaalre taimí perri Judá lricope, caimitsa lrinaitjaca nacoanaa njaji yacaalre. ⁶ Niini Josafat iaco narso njaji ianjicape inaiki naco: ''icapa matsia njaji inaitjalri, ima corricatsa atsianai irsoca jliaji icaiteca nanaco njaji inaiki, mitsa inaitjacani Dio irso. Jliacatsa iinai icaite cádanaco pada naco. ⁷ Niini panaya irsotsa icadaacacawa Dio irso ifió carro lriiwana. Icaite cádanaco pada naco, icapaotsa matsia coanca, ima corrin pacapa iwaopiakjeti maatsidalri Dio iinai, corrin pacapa matsia cawa pacapa apjetsida irso apada ioya o pjepacawa nakjoete nacaoñaca shopawa na matsicana ioya.'' ⁸ Njite Jerosalén lrico, Josafat icadaa padapena nanakjoite njaji levitanai, padapena sacerdotenai, njite padapena nanakjoite njaji Iraelnai iapiyawanai naapaneta icoam cayotsa piaca oopii shotsa, nja carro icaite naacona njaji inaiki Dio naco, namatsieta carro iacoti. icatsa njaji iofacapeo jerosalén lrico. ⁹ Lricanantana cayoji, lriaco narso: ''irsotsa identijica icaolre ajádalri sho Dio irso, wadee imacacani. ¹⁰ Nano cadaa iderse njaji iyacalre ricope pada iino capoa nakitsinda, o naikjaote cadaa njaji iacoti kjaidaperri, o naikaote njaji iacoti Dio icadanpe, o naikjaote cadaa njaji iacoti icaite cape coanca paofacawa, o naikjaote cadaa njaji iacoti papoco caconaperri icaitenda inaco pada ikjaote, irsotsa icaitecana wadee camatsicanacanaa Dio ipeyajle, wadentja Dio írroa jiwaca nanaco njite nanaco njaji nakitsiñape. Inaitja cadaa cayo corriotsa irsocarroca maatsicalri. ¹¹ Jliaji sacerdotenai iapiyawalri Amaria, jliawatsa ianjii inaco, njite nanaco njaji Dio idenjikjeti Dio nacope. Njite Zebadia, Ismael irri, jliaji Judá poco iapiyawalri, jlia watsa ianjíi nanaco njaji talricanaati inacoperri. Nja tsaca njaji levitanai nadenjicaotsa irso. Ikjaidatacawa njite inaitjaotsa cayoji nacaite capisho irso, njite Dio watsa ikitsindata njaji matsiaperritsa.''