¹ Nataita cayami nadenjica Salomón irso jliaji Dio iipana njite jliaji talricanaati dapana caconaadalri, njite pjiomi njaji lriomaji nanaitjaca lrirso, ² wa Minalri icañjatacawa Salomón irso yamapioa shopena, cayotsa lricapa capisho Gabaón ricó. ³ Niini wa Minalri iaco lrirso: ''Njominina jliaji piomalri pitatjá cádanaco noinai. Njoenitjenina noyadao jliaji panti pinaitjanda norsowao, Nocadaa carro noipitana niini caidalriwetsa. Nirse catsaotsa nocapa caidalriwetsa nocaolre ricjoite jecoapicoam. ⁴ Njite pjia, pinaitja cadaa matsia picaolre ricjoite cayoji pjinirri David icayosho, pinaitja cadaa cayoji lrinaa capisho pinaitjaca, pjiepa cadaa noaco njite njaji iacoti nocadalri inaitjá carro, ⁵ njitenaotsa nocadaa corri carroatsa canacai pada pinacjoite dalri italricanaata cada nanaco njaji Iraelnai caidalriwetsa, caitsa nocaite capisho pia pjinirri David irso, nocaite cádanaco lrirso cayoji: ''Corriotsa coancaojli pacapa pada pinacjoite dalri corridalriotsa italricanaataca Iraei naco.'' ⁶ Mitsa pimaca cadaa njoa, o njaa cadaa nja pienipe, corrí njeepa noaco njite njaji iacoti nocadaalri irso inaitjá carro, njite natoda naorsipada naa carro matsiadalri narso njaji idolonai, ⁷ niiniotsa noyaamitacaotsa njaji Iraelitanai lrioya jliaji jiipai nocananda narso; njite jlaji panti pinaitjanda noipita icaona, nopecoatsani corricawenatsa nocapan, njite nanaco njaji Iraelnai pjiomiotsa icaaca naicao, pjiomi njaji paana inaiki napaianieta caotsana. ⁸ Jliaji templo matsiadalri napecoatsa jliwao, njite pjiomi njaji jiyapacapewa lricodapi corriotsa nanji coanca njite necaawatsa lriicao. Natatjacaotsa: ¿Coada pa cayo Dio inaitjaca jliaji panti lrirricoda jiipaica jliaji?'' ⁹ Panaotsa jiepana: ''Namaca capoa na Minalri Dio, jliaji jitalri piana njepaite ricjoite njaji Egiptonai, njite naawa njapodam njaji corriperritsa diocana, natoda naorsipada naacarro narso matsiadalri. Cayoshopa Dio icadaa pjiomi njaji maatsirri nanaco''. ¹⁰ Vente walria naco oonia Salomón iwayaketa inaitjaca pjiomi njaji panti yenonnipe, jliaji Dio iipana, njite talricanaati dapana caconaadalri. ¹¹ Njite Hiram, Tiro italricanaa, iá pia Salomón irso nja jaico cedro, cipre njite owirro tsacja; pjiomo njaji Salomón iomalri lriinai. Niini Salomón icadaa Hiram irso vente yacaalre jiipai Galilea ricope iofaawa. ¹² Hiram íno Tiro ricjoite lricapá carro njaji yacaalre lricadaji lrirsho, mitsa Hiram corri lripeyona. ¹³ Njite Hiram iaco Salomón irso: Njaji yacaalre picadaji norso nokitsin, corrim matsiacana.'' Niini Hiram icadaca lriipitanao Jiipai Cabul dalri, icatsa lriipitanaca panajiete toa. ¹⁴ Hiram imeenaca pia Salomón irso wadeepe coatro mil kilo owirro. ¹⁵ Naikjete njaji idenjikjeti jirrapitinaperri Salomón iwakeeta idenjicaope jidaati rico: nanaitjá carro Dio iipana, talricanaati dapana, nanaitjá carro jliaji Milo, njerretá carro Jerusalén idanawa, njite nanaitjá carro nja yacaalre Hazor, Meguido njite Gezer tsacja. ¹⁶ Faraón, Egipto italricanaa ia pia inoacawa nacoete njaji Gezer ricope, niini lrinona, lrimjaita njaji cananeonai nayacalre ricotsa. Njite Faraón icadaa jliaji yacaalre lriito irso, Salomón iino, lricadaa rorson robodan rico. ¹⁷ Niini Salomón inaa njerretaca tsenacja Gezer njite tjewacajle lrina njereetaca Bet Horón tsacja, ¹⁸ Baalat njite Tadmor tsacja jalrapocolri rico Jodá jipaite rico, njite pjiomi njaji yacaalre lriyape lrimatsieta carroda lrinjaope, ¹⁹ njaji yacaalre lrimatsieta carroda nja carreta lrinoaca shopao, njaji yacaalre naofa carrodao njaji lrinaikite ianjicape caballo naco, njite pjiomi njaji cocacatsa lrioma pia lrinaitjaca Jerusalén rico, Libano lrico njite nerricda njaji jipai lriajimpe inaco. ²⁰ Njite njaji inaiki namacaji nanacjoite njaji amorreonai, hititanai, ferezeonai, heveonai, jeboseonai, njaji corri perritsa Iraelnai cana, ²¹ pjiomi njaji nanacjoite perri iofacape njapodam njepaite rico, njaji corri perritsa Iraelnai iwayaketa pia iinocana pjiomi; Salomón icadaa idenjicaope lrirso jidaati rico, cayo minitsana panajiete. ²² Mitsa nanacjoite njaji Iraelnai, corrim Salomón icadaa nadenjica jidaati rico. Mitsa lricadaa lritsolrodaocana, ikitsindatacapen, caconaaperri lrirsoperri, caconaaperri tsolrodaonai, comandante carrona lrirso ianjicape nanaco njaji lricaballon imaimaca oowi icaonape. ²³ Nanacjoite njaji, kiniento cincoenta njaji caconaaperri iapiyawanai ianjicape icapa njaji idenjicape Salomón idenjicalre naco. ²⁴ Njite rsoaji Faraón iito royacawa David iyacalre ricjoite lrirricodajle jliaji panti Salomón inalri nanatjaca rorso. Njitena lrinaa nanaitjaca jliaji Milo. ²⁵ Madalripia pada oonia naco Salomón imjaita mana maaficalri njite ofrenda imawadacakjeti naco tsacja lrinaco jliaji altar lrinaitjanda wa Minalri irso, lrimjaita incienso lricaiteshopa wa Minalri ikitsindajican ajádalri. Cayotsa lritaita matsia jliaji panti macade nadenjí carroena lrirricoda. ²⁶ Salomón inaa tsacja nanaitjaca jorre iita macafianipe Ezión Geber rico, tsoomi Elot ioya Manoa Irrai pan inomapi naco, Edom jipaite rico. ²⁷ Hiram imeenaca lrirsoperri idenjicaope Salomón irsoperri iinai nerricoda njaji iita macafianipe, ita iyocomaiwa ianjiicape ianjicawa manoa rico. ²⁸ Naawa Ofir ricojle napiya njaji Salomón irsoperri. Nadieta njite catorce mil dociento ochenta kilo owwirro talricanaati Salomón irso.