¹ Njite Salomón iwaketa njaji pekipenai caconaaperri Irael ricope, njaji caconaaperri nacoana njaji Irael iipaneta, panti icoam iapiyawanai tsacja pjiomi Irael ricope nanó carro lricjaolre Jerusalén rico, nadee carro jliaji arca wa Minalri inaitja shopam iacoti naapiya Sión ricjoite, jliaji David iyacalre. ² Pjiomi njaji atsianai Irael ricope nawacaacawa talricanaati Salomón ipeyajle nacatimataaca carroda lrico, siete keerri nacó pawalria irso lriiitana Etanim. ³ Nano pjiomi naji pekipenai caconaaperri Irael ricope, njite njaji sacerdotenai njepa jli arca. ⁴ Njepa nadee wa Minalri iarcan, njite jliaji panti nawacaaca carroda lrico, pjiomi lritada. Sacerdote letivitanai idee pjiomi njaji lriitada. ⁵ Talricanaati Salomón njie pjiomi naji inaiki Irael ricope nawacaacawa arca ipeyajle, nainoca oveja, buey tsacja maniweeta canaatsa. ⁶ Njaji sacedotenai njeeta jliaji arca wa Minalri iacoarrom iarroda lriofa carroda lricojle, patawajle lriwawa lricojle pja lriso jliaji panti macade lriipitana corricawatsa pacapa maatsidalri, napje iapjite njaji kerubinnai. ⁷ Njaji kerubinnai napiajleta nanapje arca iofacawa nacojle, naitá carro jliaji arca njite njaji jaico owirroapo nawaakje shopani. ⁸ Jalripaperrica njaji jaico owirroapo nawakje carrona, coada nataita piatsa nacapacana lrirricjoite jliaji macawajle mamatsicana cafeete, mitsa corri decja nataita nacapacana padana lricjoite. Njite nincatsa atee pajiete. ⁹ Corritsa cocaca lriitada jliaji arca, icaamitsa njaji yamaita jipada Moise icadaji lrirricoda Horeb ricó, wa Minalri inaitja caojli iacoti naapiya njaji Iraelitanai namoto caami Egipto jipaitena lricjoite. ¹⁰ Njite namoto cádanaco njaji sacedrotenai mamatsicacawa lricjoite, ikeena iyadaoca ipacjantaca jliaji wa Minalri iipana. ¹¹ Lricjaote jliaji iyadaoca njaji sacerdotenai corri nataita neemacawa nadenjicarro niini, ima Dio imatsiaca ipacjantaca lriipana lrico. ¹² Njite Salomón icaite cayoji: ''WA MINALRI icaite lriofácaotsa cadaocacawa lrico, ¹³ mitsa nonaitjenina pirso piofacawa lrico matsiadalri, Piofá carroatsa niini caidalriwetsa.'' ¹⁴ Niini Salomón icaboco icapa caicjaolre njaji aimadan iwacaacalrio Iraelitanai lricadaa carro nanaco iacoti matsiadalri, njite neema catoa njaji aimadan iwacaacalrio Iraelitanai. ¹⁵ Salomón icaite: ''Waca matsiadalri wa Minalri irso na Diote njaji Iraelnai, ima jliida shotsa lrinaitja njaji lricaitenimpia njonirri David irso,cayoji: ¹⁶ ''Jliadaa nacjoitetsa njotaca njaji nonaikite aimadan Egipto lricjoite, corri noanjica nooma nayacale rico nja apaana inaiki tsa naoya najai Iraelnai nonaitjá carronta noopanao niini, niiní carro Noipitana caidalriwetsa. Mitsa, icamitsa noniwanaca David jlia carro italricanaata nanaco njaji nonaikite aimadan Iraelnai.'' ¹⁷ Njite njonirri David icaolre ricó, lrioma pia lrinaitjaca pada pana panti wa Minalri iipitana icaoya, na Diote njaji Iraelnai. ¹⁸ Mitsa wa Minalri icaite njonirri David irso: ''Matsia jliaji piwaopialri picaolre ricó piomacawa pianitjaca pada pana panti noipitana icaoya ¹⁹ mitsa, corriotsa pjia carrocaotsa inaitjani, pada pienipe inocada pinacjoite, ljiá watsa inaitja jliaji pantio noipitana icaoya.'' ²⁰ Opi wa Minalri inaitja cayoji lriacoarrom shotsa, ima njoaca njonirri David jiapodamdaca italricanaataca Irael nacó, cayotsa wa Minalri icaite capisho pia. Nonaitjenina jliaji panti wa Minalri iipitana icaoya, na Diote njaji Iraelnai. ²¹ Nonaitja pawajle panti ricó arca iofaa carrodao, lriofalri irricoda jliaji wa Minalri iacoarrom lrinaitjalri naapiya njaji fanirrinaipemi jlita caamina Egipto lricjoite. ²² Ikena Salomón iemawa wa Minalri ialtarni ipeyajle nacapawerrico pjiomi njaji Iraelitanai iwacaacalrio, njite lripiajleta nja lricaapi yenonse. ²³ lriaco cayoji: ''Nominalri, na Diote njaji Iraelnai, corrim pacapaca pada caidalrimtja picayosho eenocoma lrico jle o jiipai nacojle cantja, jliaji corridalritsa imatadaca lriacoam narso njaji lrirsoperri inaitjacape nacaolre ricjoite cayoji pioma capisho. ²⁴ Pinaitjenina njaji picaitejim njonirri pirsodalri David irso, Njaji Picaitejim Pinoma sho, oopina pinaitjana picaapi cjaidaadalri sho panaya. ²⁵ Niini panaya no Minalri, na Diote njaji Iraelnai, pinaitja jliaji picaitenda pirsodalri David irso, jliaji njonirri picaite cádanaco cayoji: ''Matsia cadaotsa njaji pinacjoite perrii nanaitja cadaa cayoji Nooma capisho, corriotsa coancaojlica pacapaotsa pada pinacjoite dalri corridalriotsa italricanaataca Irael naco pjiapodam. ²⁶ Cayoshopa panaya, pjia naDIote njaji Iraelnai, notatja piinai ajadalri carroatsa njaji iacoti Picaiterri pia pirsodalri David irso, jliaji njonirri. ²⁷ Mitsa, ¿Capja ajadalrica Dios itaita iofaacawa anji jalredaoca lrico? ima jliaji jalredoca cajliaji corri lritaita jlipaca pjia, corri tsacja eeno cantja? ¡Omami kena jliaji panti nonaitjanda! ²⁸ Cayo cadanatsa, pinaitja matsiacalri, pjimi pirsodalri irso, njite jliaji lritatjalri piinai. Pjia no Minalri Dio; pjimi coanca, njoa pirsodalri iiyaca notatja cádanaco piinai paanaya. ²⁹ Nooma picapaca lricjaolre jliaji templo deepi rico njite jaalrewerrico, lrinacojle jliaji picaitenda inaco cayoji: ''Niini caotsa noipitana njite niini tsacjaotsa njoa.'' Pjimí carroatsa pirsodalri irso njite narso njaji pinaikite aimadan natatja cádanaco piinai anjí. ³⁰ niini, pjimiotsa pirsodalri irso cocaca lritatjalri piinai, njite narso njaji pinaikite wa tatja cádanaco piinai lrirricoda pantica jliaji, Pjimiotsa warso Piofalri njiteo, eeno lricjoite, njite njaji wacaitenda pirso, picaotsa jliyapaca pjioya matsia. ³¹ Pada atsia inaitja cadaa maati lricodapidalri irso njite pada inaa lricaiteca iacoti ajadalri sho, njite jliepa jliaji lrinaalri lrinaitjca ajerreji lrirricoda pantica jliaji, ³² pjimiotsa lrirso eenolricjoite, njite pinaitja cayoji coanca picapaca nanaco njaji pirsoperri, cocacadaa irso maatsicalri, lrideecaotsa lrinacoa jliaji imatsicanaati, njite jliaji corridalritsa irso imatsicanaa, picadaa mamatsicanaatsani, ima corrica lrirso maatsicalri. ³³ Nacoema jiameeta cadaa njaji pinaikite aimadan Iraelnai nanaitja capoa maatsi Pirso, mitsa nadia naoma Pjia, nacaite Pirso namatsiacnaa, njite nacaite pjiatjá carro naoya namatsicanaa natatja cádanaco piinai lrirricoda pantica jliaji, ³⁴ pjimi cádancoena pjiomi, pinaitja matsiacalri, pjimi narso eenolricjoite njite pjiatja naoya namatsicanaa njaji pinaikite aimadan Irael. Picadaa tsenacja nadiá carro njepaite ricojle Picadandam narso njaji napjeyadampe pia. ³⁵ Piita cadaa njaji eenocoma njite corri iiya jiwacao jiipai nacojle nanaitja capoa maatsi Pirso njaji pinaikite aimadan Iraelnai, mitsa náno natatjá carro piinai lrirricoda pantica jliaji, nadia carro naoma Pjia, njite namaca naoyao namatsicanaa pjirrapiteta caaminana, ³⁶ njitenaotsa pjimica narso eenolricjoite, pjiatjaotsa naoya namatsicanaa njaji pirsoérri, njaji pinaikite aimadan Irael. Picananta caaminana coanca narsotsa nanaitjaca, Picadenaotsa iiya jiwá carro njepaite naco, lrinaco jliaji jiipai picadanda narso njaji pinaikite aimadan nayadao. ³⁷ Niini cadantja maawitacai jalredaoca lrico, o ipoati cadantja, mayamicantja nja paniati o yorri injacape nja paniati; o pada nacoema iomacadaa iinocana nayacalré ipananoma lrico njepaite rico, o nini cadaa imatsikeetacape paniati o ipoati cadaa; ³⁸ njitentja padatsa inaiki o pjiomi njaji inaiki aimadan Iraelnai natatja piinai, njite nanjíi nacoanaa njaji imatsicanaati nacaolre ricoda njite napiajleta nacaapi lriemacawa icjaolre jliaji panti macadee. ³⁹ Pjimiotsa narso eenolricjoite, piofalri njiteo. Pjiataotsa naoya namatsicanaa njite pinaitja narso cayoji natatja capisho, njite picadaotsa nacoadao njaji inaiki nacioanaa nanaitjanda ikjaote. Pianjintsa nacaolre ricó, ima icaamitsa Pjia, padatsa Pjia ianjiicada nacaolre rico njaji inaiki jalredaoca lricope. ⁴⁰ Pinaitja cayo nafió carroatsa piiwana caidalritsa naofaa cádanaco jalredaoca lrico lrirricoda jliaji jiipai Picadaalri narso njaji waferrinaipemi. ⁴¹ Jlia tsacja jliaji inaiki corridalritsa wanacjoite dalri Irael, inocada pada jiipai nacjoite, lrino cadaa pada jiipai tecjoite dalri nacjoite piipitana icjaote, ⁴² njemi capoa piipitana cjaidádalri, picaapi cjaidádalri yeenondalri; lrino cadaotsa lritatja lrirricoda pantica jliaji, ⁴³ pinaitja matsiacalri pjimiotsa lrirso eenolricjoite, Piofalri njiteo, njite Pinaitja cayoji lritatja capisho piinai. Pinaitja cayo naanjíi carroatsa Piipitana naco pjiomi njai inaiki aimadan jalredaoca lricoperri, cayotsa nanaitja capisho njaji pinaikite aimadanIraelnai. Pinaitja cayo nanjíi carroatsa Pjiaca lriminalri jliaji panti nonaitjalri. ⁴⁴ Wacadantja, naaca nainoacawa njaji Pinaikite aimadan nacjoete njaji nacoema, akjerrecatsa pimeenaca naawaji, njite natatjanta piinai, Pjia wa Minalri, njite nacapa lriicjaolre jliaji yacaalre piniwananda njite jliaji panti nonaitjanda Piipitana isro ⁴⁵ Pjimiotsa eenolricojle jliaji natatjalri, naomalri piinai, njite pikitsindataotsana nainoacalri icjaote. ⁴⁶ Wacadantja nanaitja capishontja namatsicanao Picjoete, ima corri catsa pacapa pada mamatsicanaalritsantja, njitentja keeroa capoa Pjia nacjoete picadana nacoema icaapi ricona, njite nacoema ideeca presona teeco o tsoomi. ⁴⁷ Njite nanjintja kjerrerseca nadeena njepaite ioya, njitentja nadia nawaopia namatadaca Pirso, njite naoma cadaa Pikindatacana njepaite ricjoite njaji ideecape presona. Njite caite cadantja: ''Ajádalri corrica wanaitja matsia niini wanaitjaca maatsi. Corritsa wanaitjaca cayoji waofacaa shitsa. ⁴⁸ Njite wacadantja nadiaca Picjaolre nacaolre ricjoite njite nacafica sho njepaite ricjoite njaji nacoema ideecapena, njite natatja cádanaco nacapa lriicjaolre jliaji njepaite, Picadanda narso njaji naferrinaipemi, Lricjaolre jliaji yacaalre piniwananda Pirsowao, njite lricjaolre jliaji panti nonaitjanda Piipitana irso. ⁴⁹ Pjimiotsa narso natatja cádanaco piinai, natatjanda piinai eenolricojle, piofaalri nirse, pikitsindata nanaco njaji naomalri. ⁵⁰ Pjiatja naoya namatsicanaa njaji Pinaikite aimadan nanaitjanda picjoete, pjiomi jliaji imatsicanaati namacoadatalri isho njaji iacoti piifarrolri nanaitjaca. Kjenaa picapaca narso njai pinaikite napeyajle njaji nacoema, kjena carroatsa nacoema icapaca tsacja narso njaji pinaikite aimadan. ⁵¹ Ikatsa pinaikiteca njaji, piniwanaji pirsowaona, njaji piyomjetaji Egipto lricjoite, tiyee cjaidádalri namoyetacawa tsipalra ricjoite. ⁵² Notatja piinai piwapá carroatsa picapa njaji notatjalri piinai, njoa pirsodalri, njite natatjanda tsacja njaji pinaikite aimadan Iraelnai, Jorrenantja pjimí carro coanca naiyaca pirso. ⁵³ Ima Pjienitaji canaa nanacjoite njaji paana jalredaoca lricope Piyape carrona nacoadatá carro njaji picaiteji narso, cayoji picaite capisho jalrami pirsodalri Moise nacjoite, Pjia wa Minalri, pjita caojli pia Egipto lricjoite njaji fanirrinaipemi." ⁵⁴ Cayopia Yami Salomón itatjaca nanaco njaj lriomalri wa Minalri iinai, jlinico lriemawa jliaji itoda cada iorsipada wa Minalri ialtarni ipeyajle, jlirretacatoa lricaapi yenonrsewa. ⁵⁵ Jlinico lriemawa njite caacocani cjema lricadaa cádanaco iacoti matsiadalri nanaco njaji Iraelnai iwacaacalrio, lriaco narso: ⁵⁶ ''Iáa matsiadalri wa Minalri irso, ima lricadaa kena nawafeetacao njaji inaiki aimadan iraelnai, corri lrimatada pada iacoti, lrinaitja njaji lriacoam Lrinaitaji lrirsodalri Moise iapiya. ⁵⁷ Wainai catsaotsa jliaji wa Minalri, cayotsa Lriofaa capisho nainai tjaji wapjeyadapempia. ⁵⁸ Corriotsa lricadaa carroca fa, corriotsa lrimaodacá carroca waoya, Lricadaotsa waomá carroni wacaoolre ricjoite, waofáa carro cayoji lrioma capisho, njite wanaitjá carro njaji lrinaalri wanaitjaca, icadaacape wanaitjaca matsia lriaco lrico, njaji Lrinaalri nanaitjaca njaji fanirrinaipemi. ⁵⁹ Tsoomi carroatsa wa Minalri ioya njaji iacoti notatjaji lriinai, njaji nomotoetalri lripeyajle jliaji wa Mionalri lriinai catsaotsana deepi rico njite jaalrewerrico tsacja, lrikitsindatá carroatsa njoa lrirsodalri lrinaco jliaji noomalri, njite lrikitsindatá carro tsacja njaji lrinaikite aimadan Iraelnai lrinaco jliaji naomalri, lrinaco jliaji canacairri narso jalredaoca icoami, ⁶⁰ nanjíi carroatsa njaji inaiki pjiomi jalredaoca lricoperri jliaca na Minalri, Diocani, ¡Njite corrí pacapa pada pja lrioya! ⁶¹ Icaamitsa, matsiá catsa icaolre wa Minalri irso, wadee imacaca njaji lrinaalri wanaitjaca, cayotsa lrioma waofaacawa panaya sho.'' ⁶² Niini jliaji talricanaati njite pjimi njaji Iraelitanai nainoca maaficalri wa Minalri irso. ⁶³ Salomón icadaa wa Minalri irso ofrenda imaodacakjeti naco, niini lriinoca wa Minalri irso: ventidomil buey, njite ciento ventemil oveja. Cayotsa nacaiteca jliaji wa Minalri ipana jliaji talricanaati naapiya njaji Iraelnai. ⁶⁴ Jliadatsa jalredaoca jliaji talricanaati, lricaite wa Minalri irso jliaji yacalrecoa pamoyoá dalri panti macade icoemjeté dalri, lrimjaita niini matsiá nja maaficalri, paniati iekje, njite neeti njaji maaficalri nanacjoite njaji ofrenda imaodaca kjeti nacope, ima jliaji altar bronce dalri iemalri wa Minalri ipeyajle corri lricoaca, tsoodalri catsani namjaitá carrontja niini pjiomina, njaji paniati iekje njite njaji ofrenda imaodaca kjeti naco. ⁶⁵ Niini Salomón injaca naapiya jliawajli, lriinai tsacja pjiomi njaji Iraelnai, aimadan njaji iwacaacalrio, nemao Lebo nacjopite, teeco njenaa onipaocja lrico Egipto ricoda, neema niini wa Minalri ipeyajle siete jalredaoca, napieta tsenacja siete jalredaoca tsenacja niini meemaca niinio catorce jalredaoca pjiomi. ⁶⁶ Njite ocho jalredaoca naco Salomón imeenaca nadiawa njaji inaiki aimadan, njite nacaite lrinaco iacoti matsiaperri nadia caroyaweena naapana lricojle. Nadia lrioya nacaolre joiwí dalri, catiimá dalri iapiya naapana lricojle naicjaote njaji matsiaperri wa Minalri icañjatalri lrirsodalri David irso, njite narso njai lrinaikite aimadan Iraelnai.