¹ Salomón idenji naapiya lriipanao trece walria oonia. ² Lridenji naapiya jliaji ''panti Caconaa dapana Awacada Libano lricoda.'' Coarenta cinco metro jliwalripaca, venti do metro pamoyoa pja pada inacojle lriwawalrico, njite trece metro pamoyoa pja pada inacojle lrineyonca. Njerretan coatro cja naco topji cedro macanepe naco, njite cdero tsacja nja lricoanjaipe. ³ Neemeta madalricja topji lricaona jliaji panti, kince pacja naco, caitsacja nanaco nja paana, niini coarenta cincoca namaimaca pjiomi nja tupji. Nacadaa coanjai iorsowa napolrico naco nja topji, njite nanaco nja coanjai nerroeta tabla cedroitape. ⁴ Nanaitja nja ventanapeco nacjoetewaca, madalricja nacawa. ⁵ Pjiomi njaji pantinoma irrocarrona njite njaji ventana irrocarrona nanaitjana capatsitape pacoacá dalri pjiomi, njite nacadaa pacjatsa naacawa njaji madalricjan njite capa nacjoetewaca. ⁶ Salomón inaa nanaitjaca jliaji pewacawao lrirso pantimonao sho cayotsa lriyenonca shotsa jliaji pánti, ventido metro pamoyoa pja pada naco lriyenonca, njite trece metro pamoyoa pja pada naco lriwawalrico; njite neemeta pja paana tupji lricoemjete nayatá carro pja jliaji panti itsipjenapi. ⁷ Salomón inaa nanaitjaca patawajleo nacadaalriotsa niini lriofaacarrodao, lricaitecawa lrico naaconao njaji inaiki. Lrinaa nacawainitaca pjiiomi cedro sho, pjiomi papjoacawa lriwawalrico tsacja. ⁸ Njite jliaji Salomón iipana catsa, lrinaitjalri jlipaitena ricotsa jliaji talricanaati dapana; nanaitja lricapacana cayotsa lricayosho jliaji talricanaati dapana. Cayo tsacja lrinaa nanaitjaca roopanawa rsoaji Faraón iito, rsoaji Salomón jitalri iinowa. ⁹ Nanaitja pjiomi njaji panti jiipada cacoada perri sho namatsietanda, nayoanda matsia, pacoaca namacadalrica, nayoaji tserre sho njite naketitana matsia neecoa nja jiipada. Nacadaa nja jiipada jliipoco nacjoite jliaji panti, caitsa jlirracawa pjiomi yenonrsewa nanco njaji panti. Pjiomi lriwawalrico, lriocawa nawacaacawa lrico njaji inaiki. ¹⁰ Macadalripe njaji jiipada njite cacoada perri tsacja njaji nacadaalri jliipocoa jliaji panti, tre metro pamoyoa pja pada naco namacadalrica njite coatro metro njawalripaca. ¹¹ Nanacoena nacadaa jiipada cacoada perri, namatsietanda matsia, nayoanda matsia pacoaca pjiomi, njite coanjai cedronape. ¹² Lriwai jliaji talricanaati dapana, nacadaa madalricjaa jiipada nanacowaaca nayoaji matsia, njite pacja tsacja cedonape sho. Cayo tsacja nanaitjaca lriwaiwa jliaji yacalrecoa iwawalricoda lriemalri niinio jliaji Dio iipana, njite pjewacawa lrirso tsacja. ¹³ Salomón imeenaca iacoti Hiram irso Tiro rse, niini lrinoca Salomón iderse. ¹⁴ Jliaji Hiram, apama madoiyoam irricani nanacjoite njaji Neftalí poco; njite jlinirri ape atsia Tiro dalri pia, pada cayecadalri ianjicada idenjicada bronce. Lrirso pia jorre lriyeca lriwapiakje rico lrinjíi carro lridenjica, njite lrianjíica coanca lridenjica idenjikjeti macadalripe bronce sho. Lrino Salomón iderse lridenji carro bronce sho talricanaati irso. ¹⁵ Hiram inaitja njaji yamana topji macanepe bronce sho, nacoana narsoca ocho metro njite cincofi pja pacapjiwida nanaco nayenonca, cinco metro njite pada inacojle pja inaco namacanica matojledaperri. ¹⁶ Njite lrimatsieta matsia natsapewaniwa njaji yamanape topji, lriketitana matsiana. Njite narsoca njaji tsapewa yanada metro njite paita pacaapi lrinaco nayenonca nacoana. ¹⁷ Lriña nja tsipalra njite lrinaitja tsacja cadena lricadaa carro namatsiacao nja topji ndajintjete, sietepe nasoca nacoana. ¹⁸ Hiram inaitja tsacja pana matojledadape lricadaa carro namatsiacao nanaco njaji tsapewaitape topji nacope. ¹⁹ Natsapewan njaji topji nashopiaca paita metro njite coatrofi pja pacapjiwida lrinaco lriyenonca, njite Hiram inaitjana potira jinapjiam sho. ²⁰ Nanaco minitsa njaji yaamanade topji, napjitetsa nja natsapewan, nerroeta pacja nerroa nanaco dociento matojledadarrope, pjiomi lriwaida naó. ²¹ Jlirreta nja topji pjewa cawa lrirso jliaji panti macade Dio iipana. Jliaji topji atsiajliema dalri iemawa lricadaa lriipitanao Joaquín, njite jliaji inarroemadalri lricadaa lripitanao Boaz. ²² Potira jinaana lricadaa natsapewaniwa njaji topji namatsiacao. Cayopiatsa lriwaketa lrinaitjaca njaji topji. ²³ Hiram inaitja tsacja broncepe sho paapi ooni iarrodao, irsocada coatro metro njite pamoyoa pja pada naco lrinoma imacaiteca, lriyenonca irso pia yamada metro njite paita pja pacaapi lrinaco, njite pjiomi lrimacaiteca matojledá dalri lrirsopiaca trece metro njite amoyoa pja pada naco. ²⁴ Lrinomapi iapjite jliaji ooni iarroda lricadaa matojleda darrope irroa, irrocape lrinacotsa jliaji ooni iarroda, lricadaa papocotsa die matojleda darrope yamaita pacaapi natecoca naoyawaaca. ²⁵ Lrinaitja tsacja doce buey jinaana lricadaa carro nanaco jliaji oonio iarroda. Lricadaa naiwapjitaacacawa njaji buy lrinaitjaji, madalrina icapa jerri imotolri njiteo, madalrina icapa jerri ipatojliemajle, madalrina icapa jerri jiewalri icjaolre, njite madalrina icapa atsiajliemajle jerri irso. ²⁶ Coatrofi pacapjifida jlipandaca jliaji ooni iarroda, Hiram inaitja lrinopaio jliaji ooni iarrodao copa inomapi sho, lricadaa carro lrinomapicja imotoa potirapje sho. Jliaji ooni iarrona jlipa pia coarenta coatro mil litro ooni. ²⁷ HIram inaitja tsacja carreta fiape broncepe sho. Njaji carretata fiape narsoca pada metro coatro pja pacaapi lrinacojle njawalripaca, njite pada metro yamaita pacaapi lrimacaiteca, njite pada metro tsacja yamaita pacaapi lrinomapi iyenonca. Cayo minitsa pjiomi njaji carretata fiape lrinaitjaji. ²⁸ Cayo pia lrinaitjaca nadaanawa njaji carreta fiape, ²⁹ nanaco njaji lriwai lriparrema nacope lrinaitja leon jinapjiam, buey jinapjiam, kerobin jinapjiam tsacja. Njite naicao njaji njenapjiapem, naapjite tsacja lrinaitja corona shoperri lripatsicaji martillo sho. ³⁰ Nacoana njaji carreta fiape lrinaitja narso coatro pocope njaipao broncepe sho njite caitsacja nerrocarronao. Njite natawana naco lrinaitja njepaacacarronao njaji lriipa yacawa lrinaitjaji itsipococaéwa irroacacape tsa lripe ricotsa pjiomi. ³¹ Nanomapi icao njaji carreta Hiram inaitja ponchera iarropocoa nadee carrodao ooni irsocada sesenta siete centimetro lrinoma imacaiteca, njite coarenta cinco centimetro lriyenonca lrinomapi iicao jliaji carreta. Lrinaitja matsia lridana jliaji ponchera iarropoco. Njite njaji carreta iwai njite jliaji papjoa cawa pacoaca dalripe pjiomi. ³² Lricadaa njaipa peema carrona iapjite, njaji njaipa irrocarrona, njaipa tsacja njite nerrocawao pjiomi naawa lriipe ricocatsa jliaji carrta fia. Njaipa iyenonca narsoca sesenta siete centimetro nayenonca. ³³ Lrinaitja njaipao tsopocotsa njaipao capisho njaji carreta fiape tsofaianpetsa. Tsipalrape minitsa pjiomi jlipa. ³⁴ Hiram inaitja tsacja pjepaaca carrona natonjiwi naco lriwawa lrico njaji carreta fiape, caiminitsa pjiomi. ³⁵ Lriwai iwayacacawao Hiram icadaa pacja broncepe matojledadalri irsocada paita pacaapi iyenonca nanomapiwa, njite njaji papjoa carrona iicao njaji nerro carronao naapiya njaji lriwai padatsa lriyataca pjiomina. ³⁶ Nanaco njaji pacoaca dalripe njite nerro carrona naco tsacja, Hiram inaitja nadanao kerobin jinapjia, león jinapjia njite nanakjepi jinapjia pacapa cawa matsiana, njite njaji lridanaji lrinaitja nawaida naco itsipococapewa resorte shoperri lridanajitsa. ³⁷ Cayopia Hiram inaitjaca njaji die carro fiape, pacoacatsa namacadalrica njite nacapacanaa tsacja. ³⁸ Hiram inaitja tsacja die tanquenape ooni iarrodao boncepe sho. Apana tanque itaita ideeca ochociento ochenta litro ooni. Narso pia nacoana pada metro njawalripaca njite ochenta centimetro namakaiteca. Lrinaitja nacoanaa narso njaji die carreta fiape lrinaitjajina. ³⁹ Lrinaitja cinco carreta fiape inarroemjete panti macade irso, njite cinco tsacja atsia kemjete. Ima jliaji ooni iarrona macani lricadaa lriemawa lritonjiwi icjaolre jliaji panti macade jerri jiewa kemajle. ⁴⁰ Caitsa Hiram inaitjaca njaji ooni iarronape, nacamorriashopa njite njaji ooni iarrodao tsoapipe naarro carrodao ooni napania iicao. Cayotsa Hiram iwayakeeta inaitjaca pjiomi njaji idenjikjeti talricanaati Salomón irso lrirricodape jliaji Panti Macade Dio iyada: ⁴¹ njaji yaamana topji macanipe, natsapewan pacoacaperri icapacanaa ooni iarroda shoperri, njite njaji nawaipoco corrarra shoperri idaanatacape natsapewan njaji yaamanade topji. ⁴² Lrinaitja coatrociento matojledadarrope naicaona njaji yamapocope corrarra shoperri icapacanaa. Lricadaa yamacjaa nerroa nacoana njaji corrara shoperri nanaco njaji ooni iarroda shoperri njaji topji itsapewan, ⁴³ njaji die carrofiape, njaji die ooni iarronape iofaacape nanaco njaji carrofiape naco. ⁴⁴ Lrinaitja tsacja jliaji ooni iarrona macani lricadaalri iofaa nanaco njaji buey lrinaitjaji; ⁴⁵ Hiram inaitjana njaji poncherapipe, nacamorria shopao, pjiomi njaji ooni iarrodao, bronce sho lriketitaji matsia lrirso jliaji talricanaati Salomón iipanao njitelricaona jliaji panti macade Dio iyada. ⁴⁶ Salomón inaa napatsicaca caalri sho nanaitjashopao pacoacaitacawa lrico ooni Jordán naco, Sucot ioyawaca Saretaán iapiya. ⁴⁷ Corri Salomón inaa nawica coshoca njamiñaca njaji Hiram inaitjaji pjiomi ima jorrecaketsa njaji lrinaitjaji, njite jorre calretsa njaji bronce nawaketaji. ⁴⁸ Salomón inaa nanaitjca Dio iipana itadao owirro sho: Jliaji altar, jliaji mesa sacerdotenai icada carrodao jliaji peetje njenetanda Dio irso iwirro pjiomi. ⁴⁹ Lrinaa nanaitjaca lampara iofaa carrodao owiro matsiaperri sho lricoemjete jliaji patawajle corricawatsa pacapa tsoo imatsicanaati, cinco pema, cinco tsacja pema. Nanaitja potira jinapjia, njaji lampara, njite njaji njepashopao owirro mitsa sho pjiomi. ⁵⁰ Nja copa, njaji napishopao nja lampara, njaji poncherapipe, nacamorriashopao, njite njaji namjaita carroda incienso nanaitjana owirro matsiaperri sho. Njaji pantinoma irro carrodao lri ricodape jliaji patawajle corricawatsa pacapa tsoo imatsicanaati nanaitjana owirro sho pjiomi, cayo tsacja nerrocarrona njaji pantinoma pjewacawao lrirso jliaji nawacaaca cawao lrirricoda jliaji panti macade. ⁵¹ Cayotsa njaji idenjicaperri Salomón irso nataita nedenjica jliaji Dio iipana cayoji lrinaa capisho nadenjica. Njite Salomón inaa nadeeca pjiomi njaji jlinirri David jienitaji Dio irso, njaji palraatape, owirro, naofacarrodape lricadaa carrona namatsieta carroda lrico Dio iipana lrico.