¹ Cayotsa Salomón iniita inaitjaca jliaji panti macadapana wa Minalri irso. Lrinaitjani coatrociento ochenta oonia jiapodan namoto caami Egipto jipaite ricjoite lricjoite njaji Iraelitana, coatro oonia caami talricanaatica Salomón Irael nacó, yaamapi keerri naco pawalria irso lriipitana Zif. ² Icatsa lrimacadeca jliaji panti Salomón inaitjalri wa Minalri irso: ventisiete metro jliwalripaca, nueve metro lrimacaiteca, njite trece metro inacojle pja lriyenonca. ³ Njite jliaji pjewacawao lrirso jliaji panti macade lrirsopiaca nueve metro jliwalripaca, cayotsa lrimacaiteca shotsa jliaji panti, njite coatro metro inacojle pja lrwawa lricojleo jliaji panti macadapana. ⁴ Lrinaitja njaji ventana irrocarrodao lrirso jliaji panti tsoopeco pja padanjete dalri icjaolre keema lriwawalrico kema ioya. ⁵ Njite lriwaida naco jliaji panti, lriwainacotsa, lrinaitja pacjaa naacawa lritawajleo jliaji panti, lriyofieta lritawajle sho pjiomi jliaji panti. ⁶ Jliaji patawajle initacoma lrirso piaca yamada metro njite paita pja pacaapi jalripadalri lrimacaiteca, jliaji patawajle pamoyoa coma lrirsopiaca yamada metro njite yamaita pja pacaapi lrimacaiteca, njite jliaji pikeetem coma lrirsopiaca madalrida metro njite pamoyoa paita pacaapi irso lrimacaiteca. Salomón inaa pia nacadaa carro namoto pjaacawa njaji coanjai jiwidana pjemajlewa panti macade irso pjiomi lriwaida naco, wadentja namatsícaca lriwai nadenji cádanaco njaji panti coma. ⁷ Njerreta pia jliaji panti nasho njaji jiipada macadalripe nayoampe namatsietajina matsia. Niini njerreta cádanaco jliaji panti nasho nja jiipada corrin pjemi cantja nañaaca martillo sho, nayoá cantja yooca sho o pada pjanta tsipalra nadenji shopa. ⁸ Lriyekema nacó jliaji panti niini pia pada pantinoma tjewacajle coma naco, njite dalri pjerrawa pamoyoa coma naco, caitsacja pikeetem coma nacojle. ⁹ Cayotsa Salomón inaitja jliaji panti kjerreca lritaita pjiomi, Lricawainita matsia tabla cedroitape sho macaitepe jipandape sho. ¹⁰ Nacoana njaji panti coma lrinaitjaji, narso piaca yamada metro njite paita pja pacaapi lrinacojle nayenonca naco, njite pjiomi njaji coanjai cedro sho lrinaitjana. ¹¹ Njite caacoca wa Minalri Salomón irso cayoji: ¹² ''Lrinaco jliaji templo pinaitjalri, pinaitja cadaa cayoji nacaite capisho njaji iacoti icaitecape cocaca njaji parsolritsa panaitjaca njite pinaitja matsia, corri pimaca njaji iacoti ianjíicaada panaco njite pinaitja cayoji nacaite capisho, nininaotsa nocaiteotsa pirso jliaji noacoam piapiaya nonaitjalri pjinirri David iapiya. ¹³ Nofaacaotsa napecolrico njaji Iraelnai njite corriotsa nomacá carrona.'' ¹⁴ Njiini Salomón inaitja jliaji panti naapiya njite nawayakeeta pjiomi. ¹⁵ Njite lridenji naapiya lriwai naco jliaji panti lriwawa lrico kema, lriita matsia tabla cedroitape sho. Lriita pjiomi panti iwawalrico njite lriicao tsacja jaico sho mitsa jliaji pati iwawalrico pemanjicawa lriitan jaio cipre sho. ¹⁶ Lrinaitja naapiya pacoma lridanam sre jliaji panti patawajle naitanda matsia tabla cedroitape sho, lriwawa lricjoite tjewacajle njite lriicao tsacja lriwawa lricotsa. Lrnaitja jliaji patawajleo corricawao pacapa tsoo imatsicanaati. ¹⁷ Nanaitja Cooya jinaana, njite potira jinaana imjecoacacape nanaitjaji cedrona nacjoite, nacadaa carrona panti iwawalrico. ¹⁸ Cedro sho minitsa nanaitja pjiomi njaji panti iwawalricope. Njite corri pia catjinaa njaji jiipada padaa njite lrirsho jliaji panti. ¹⁹ Salomón inaa namtsietaca jliaji patawajle panti macade iwawalricoda nacadaa carro niini jlijai wa Minalri iarcan lrinaitjashopam iacoti naapiya. ²⁰ Jliaji panti itawajle lrinanda natsietaca lrirsopia nueve metro jliwalripaca, nueve tsacja lrimacaiteca, njite nueve tsacja lriyenonca. Salomón inaa nainjetaca lriwai owirro sho, njite lricawainita jliaji altar cedro sho. ²¹ Salomón inaa nainjieteca panti iwawalrico owirro matsiadalri sho, njite lriinaa naitacani pemajle cadena nanaitjanda iwirrocja sho tsacja. ²² Lrinaa nainjieteca pjiomi panti iwawalrico owirro sho kjerreca nataitan. Lrinjieta tsacja owirro sho lridaki jliaji altar iofalriwa panti itawajle rico. ²³ Salomón inaa nanatjaca yaamana kerobinai (anjele) jinaana jaico olivo sho, nacoana, narsoca coatro metro lrinacojle pja njawalripaca yenonre, nacadaa carrona altar iemalri nirse. ²⁴ Nanpje njaji kerobinai narsoca nacoana yamada metro njite paita pja pacaapi lrinacojle. Caiyopa narsopca coatro metro njite pamoyoa pja lrinacojle pjiomi. ²⁵ Cayo tsacja jliaji apana kerobin, coatro metro pamoyoa pja inacojle njaji lrinapje, njite cayo minitsa njawalripaca njite nacapacanaa tsacja. ²⁶ Coatro metro pamoyoa pja inacojle njawalripaca yenonrse, njite cayo tsacja jliaji apana. ²⁷ Salomón inaa nacadaca njaji kerobinai lrirricoda jliaji panti tawajle corricawa tsa pacapa tsoo imatsicanaati. Njite cayo pia neemacao, pada inapje inota pema inapje sho pema panti iwai nemalri niini, njite pema lrinapje jliaji apana kerobin lrinota pema tsacja panti iwai. Njite nanapje jiwidana inotacawa pamoyoa neemalri niinio lripamoyoaca lrico jliaji patawajle corricawatsa pacapa tsoo imatsicanaati. ²⁸ Salomón inaa nadaaca nadaki pjiomi njaji kerobinai iwirro sho. ²⁹ Salomón inaa nanaitjaca njaji iacoti lriwaida naco jliaji panti njenapjiapem sho njaji kerobinai, manacapje jinapjiam sho, potira imjecoaca cape jinapjiam sho tsacja. Cayo tsacja lrinaa nanaitjaca njaji panti itawajle, nawawalrico njite nadanjite tsacja. ³⁰ Lripeeco panti iwawalrico owirro sho, pjiomi njaji panti itawajlepe tsacja. ³¹ Salomón inaa nanaitjaca lripananomao jliaji panti itawajleo corricawa tsa pacapa tsoo imatsicanaati jaoco olivo sho. Jliaji pantinoma irrocarrona njite jliaji pantinoma nasoca cinco neecoa. ³² Niini lrinaa nanaitjaca yamaita panitinomaita jaico olivo sho, njite nacadaa nanaco njenapjiapem njaji kerobinai, manacapje jinapjiam sho, potira imjecoaca cape jinaapjiam tsacja. Njite lrinaa nainjetaca owirro sho nanaco pjiomi. ³³ Lrinaa nanaitjaca coatro dalri iecoa pantinoma irro carrona lrirso jliaji panti macade jaico olivo sho naketitaji matsia, njite yamaita lripananomao nanaitjaji jaico cipre sho. ³⁴ Njjai pantinomaita narsoca yamaitape njite tsikji cawa padieta carrona, caitsacja pema. ³⁵ Njite nacadaa nanaco kerobinai jinapjiapem, manacapje jinapjiam, potira imjecoaca cape jinaapjiam tsacja, njite nainjieta owirro sho njaji nanaitjaji jinaapjiami. ³⁶ Salomón ina njereetaca lriwaiwa jliaji nawacaaca caroda iwawalrico madalricja naicaowawa jiipada sho nayoanji matsia, njite pacja coanjai cedronape sho nayoanji matsia. ³⁷ Njaji jliipoco Dio ipana nainita nanaitjacana coatro walria naco oonia Salomón italricanatacaawa naco, lrinacopi jliaji keerri Zif dalri iipitana. ³⁸ Njite once walria oonia naco, ocho keerri naco lriipitana Bul, Salomón iwayakeeta inaitjaca jliaji panti, njite pjiomi njaji lrinacoperri cayotsaji lrinacoapana naco. Siete año Salomón idenjica naapiya jliaji Dio iipana.