¹ Njite Hiram, Tiro italricanaa, imeenaca njaji lrirsoperri Salomón iderse jlimi capoa jlia kenakja talricanaati jlinirri David jiapodam; ima Hiram ipeyopiaca David. ² Niini Salomón imeenaca iacoti Hiram irso cayoji: ³ ''Pianjintsa corrica njonirri David itaita pia inaitjaca padapana panti wa Minalri Dio iipitana naco lrinaitja capoa oowi, ima caafi cádanacon, jliaji wa Minalri icadaa piaca jliameeta carro nja lricoema. ⁴ Mitsa panaya, jliaji wa Minalri icadaa nowafetá carro naoya pjiomi. Corri pacapa jipondati, corrin tsacja maatsicalri. ⁵ Niini nooma noinita nonaitjaca pada pana macadee wa Minalri Dio iipitana irso, cayoji wa Minalri icaite capisho pia njonirri David irso, lricaite cádanaco cayoji: ''Jliaji pirrí, nocadaalriotsa italricanaatá carro pjiapodam, jliawatsa inaitja jliaji panti macade noipina icjaote.'' ⁶ Panaya, pinaa pirsoperri nayoá carro norso cedro Líbano lrico. Njaji norsoperri nakitsindataotsa njai pirsoperri. Nocaoñaotsa njaji pirsoperri cayoji pioma capisho nocaoñacana. Ima pianjintsa corrica pacapa pada wanacjoite ianjiicada coanca payoaca jaico nacayosho njaji sidonionai.'' ⁷ Hiran jimi cádanaco Salomón imemorian, catiima lricaolre pekirritsa, niini lriaco: ''Noá matsiadalri Dio irso panaya, Licadaa capoa David irso pada lrienipeo kanjiikjé dalri lritalricanaatá carro nanaco njaji inaiki aimadan.'' ⁸ Niini Hiram imeenaca memoria Salomón irso, lriaco cayoji: ''Njominina pimemorian. Nomeenacaotsa pirso coshoapacatsa pioma cedro nacjoite njite ciprés tsacja. ⁹ Njaji norsoperri naorrocoetaotsa nja jaico Líbano lricjoite ooni macapawan ricojle, nocadaotsa napapí carrona papocotsa nadee carrona akjerre catsa pioma wadeeca pirsona. Wawatacaotsana pidee carroenatsa njite. Njite icaamitsa nooma piinai piacatsa nainjao njaji nopaneeta.'' ¹⁰ Niini Hiran iaca Salomón irso nja jaico cedro njite jaico abeto tsacja cosho catsa lrioma. ¹¹ Njite Salomón iáa Hiran irso lrinjaope Cinco mil tomelada icoa harina njite treinta cinco tambor icoa aceite painjanda matsiadalritsa. Caidalri manatsa oonia icoam Salomón iáa maca Hiran irso. ¹² Wa Minalri Iáa Salomón ianjíikjewa cayotsa lricaite capisho lrirso. Corri poiatsa coca Salomón irso Hiram icjoete, naofaa namaodaca ima nanaitja piaca iacoti narsowaaca. ¹³ Talricanaati Salomón iniwa idenjicaope lrirso jiidati ricó. Lriwakeeta trenta mil atsianai idenjicaope lrirso jiidati ricó. ¹⁴ Lrimeenacana Líbano ricojle, lrimeenaca die mil keerri icoam, ima njamawaaca piaca. Naofaa aapapi keerri Líbano lrico njite yaamapi naapana lrico. Adoniram pia jliaji naapiyawalre, lricadaa pia nadenjica jiidati ricó. ¹⁵ Salomón irso pia setenta mil atsianai ideecaperri jamiñádalri njite ochenta mil atsianai jicacape jiipada namatsietá carro awacada lrico, ¹⁶ njite lrimeenaca tsacja nainai tre mil treciento atsianai caconaaperri idenjicape lrirso talricanaati dapana lrico nadenjii carro njite nacapá carro njaji idenjicape pjiomi. ¹⁷ Talricanaati inaana njetá carro jiipada macadalripe matsiaperri pja nacadaa carro panti macade initjee icaona. ¹⁸ Niini njaji jireetacape panti Salomón iyaape njite Hiram iyaape naapiya njaji gelabitanai nayoa pacoaca nja jiipada njite njaji jaico nanaitjá carro jliaji panti macade.