¹ Rsoaji talricanaati Sabá ricoda rsomi cádano Salomón iacona naco, Dio iipitana naco, rono lricjaolre rotatjá carro rsomi lriinai iacoti jirrapitinaaperri naco rowí carrotsa lrianjiikje. ² Rono Jerosalén ricojle njite rodee jorre camello idee caperri aima pomeniajaipe, aima owirro, njite aima tsacja jiipada cacoada perri. Rooc cádanaco Salomón iderse rocaite lrirso pjiomi njaji rosolri rocaolre rico rotatjaoda inaco. ³ Salomón icaite rsomi pjiomi njaji iacoti rotatjaji inaco. Corrin pacapa pada iacoti corridalri Salomón jiepano rotatjalri inaco lriinai. ⁴ Rsoaji talricanaati Sabá ricoda rocapa cádanaco Salomón ianjíikje naco, jliaji panti talricanaati dapana lrinaitjalri, ⁵ njaji lrinjaoda lrimesan nacope, naofa carroita njaji idenjicape lrirso, nadenjicalre njaji lrirsoperri, natsayan njite njaji iirracape lriirraope lripjeya lriirraca, njite coanca lrimjaitaca njaji maaficalri Dio irso panti macade rico, corri roanji coanca. ⁶ Niini roaco Salomón irso: ''Ajadalritsa jana njaji njomirri noyacalre ricojle piaco naco njite pianjikje naco tsacja. ⁷ Corrin njoepaca njaji njomirri pinaco, niini nonoca nocapá carrocatsa notji sho njaji nocapalrina. ¡Corri pamoyoa miketsa njaji nacaiterri njomi pianjikje naco, pinaani matsiaperri naco cantja! Jorre pjatoa njaji piacona lrioya jliaji njomirri pinaco. ⁸ Matsia perrica njaji icoadatacape pjia njite njaji idenjicaperi pirso, njaji iemalri pipjeyajle caidalritsa njemí carro pianjikje. ⁹ Iáa matsiadalri imiNalri Dio irso, matsia capoa lricapaca pirso niini lricadaaca pjia natalricanao njaji Iraelnai. Ima lripeyoca njaji Irelnai caidalriwetsa, Dio icadaa talricanaati carro pjia, pinaitjá carro matsia ajádalri sho. ¹⁰ Rsoaji talricanaati iáa Salomón irso jorre pja coatro mil kilo ioya owirro, jorre tsacja pomeniajaipe, njite jiipada cacoada perri. Corritsa coca iáa pja jorre pomeniperri Salomón irso nacayosho njaji talricanaati Sabá ricoda ianji lrirso. ¹¹ Njaji iita macafianipe talricanaati Hitam iyape idee owirro Ofir ricjoite, njite aima tsacja jaico sándalo nape njite jiipada cacoadaperri. ¹² Salomón inaa neemetaca lritopjirreo jliaji Dio iipana njite jliaji talricanaati dapana jaico sánadalo nape sho, nanaitja tsacja arpa, lira tsacja nasho narso njaji icantacaperri. Corrin natsa coancaojli napieta nawaketaca aima jaico sándalo jliawajli shopia atee panajiete. ¹³ Talricanaati Salomón iáa pia talricanaati Sabá ricoda irso pjiomi njai romaji, cocatsa rotatjalri lriinai, naoya tsacja njaji Salomón iampe rorso. Njitedalrina rodiawa naapiya njaji rorsoperri royacalre ricojle. ¹⁴ Nápia Salomón irso ventido mil kilo owirro pawalria icoam, ¹⁵ naoya tsacja njaji comerciantenai ideji njite njaji irsocape almacen. Pjiomi njaji talricanaatinai Arabia lricope njite njaji iwapacape yacaalre macacoepe Salomón irso jlipaite ricotsa, nadee trsacja owirro Salomón irso. ¹⁶ Salomón inaa napatsicaca sei kilo pada nacojle pja owirro nanaitja carro pada escudo, caipe minitsa lrinaa nanaitjaca dociento escodo pjiomi. ¹⁷ Lrinaa tsacja nanaitjaca treciento escodo tsoitepe owirro sho irsocape pada kilo lrinacojle pja paitape nacoanaa. Njite lricanaada lrirricoda jliaji panti irsocada iipitana Líbano Iawacadate. ¹⁸ Jliaji talricanaati inaa tsacja nanaitjaca lriofaa carrodao marfil sho, njite nadaatani owirro matsiapedalri sho pjiomi. ¹⁹ Niini pia sei papjoa carrona pjerrá carro paocá nirse, njite. Nanaitja matojledadalri lriorsoa carrona lridanjitjete, nanaitja tsacja lricadaa carrona lrinaapa iorsoawa yameemape. Yaamana león nanaitjaji iemawa lrinaapa kema yameemape. ²⁰ Doce león nanaitjaji iemawa nawayacacawao njaji papjoa carrona, sei pema, sei tsacja pema. Corri piatsa paca naofa carona lricayosho jliaji pada talricati irso. ²¹ Owirropjipe pjiomi njaji Salomón irracarrodape, pjiomi njaji nairra carrodape lrirricodape jliaji panti Líbano Iawacada tena ricoda njawacatsa owirroapjipe. Corrin pacapa nanaitjanda palrataitape sho cantja, ima njaji palrataitape macoada perrim piacatsana Salomón jiawajlri. ²² Salomón irso pia aima iita macafianipe itaitacape iyoetaca manoá lrico, papocotsa nanijicawa Hiram iyaape iinai. Papiatsa pawalria icoam naaca naoma nerricoda owirro, palrata, marfil, njite powenape tsacja. ²³ Corripiatsa cocaca caanjikjé dalri njite cananí dalri tsacja Salomón icayosho nanacjoite nja paana talricanatinai jalredaoca lricoperri jliawajli. ²⁴ Pjiomi njaji inaiki jalredaoca lricoperri naoma mana Salomón njemí carro lrianjikje, njaji ianjikjeti Dio icadalri lrirso lricaolre ricó. ²⁵ Njaji iacape icapa lriderse nadee nacoadao lrirso, palrata naaroda lrico, owiro, tsaya, nainoacashopao, njite pomeniajaope; nadee tsacja lrirso caballo, mula tsacja, caidalri manatsa oonia icoami. ²⁶ Salomón iwaketa pia aima caballo nainoca shopao njite njaji jiecocaope nanaco. Lrirso pia mil cotrociento caballo lrinoaca shopao njite doce mil atsianai jiecocaope nanaco, Njite lricadaana nerricoda njaji yacaalre nawapacawana, njite nja paana lriinaitsa Jerosalén rico. ²⁷ Salomón irso pia jorre palrata, jiipai shotsa namaimaca. Lriapana aima cedro, cayoji aima capisho nja higuera naapanaji tjewacajle cawa. ²⁸ Salomón irso pia caballo nadenji Egipto lricjoite njite Coa ricjoite tsacja. Jliaji iwentacadana lrirso lriwentana aima sho papiatsa, njite njaji papoco narso teecojlepe nacoada. ²⁹ Njaji carreta fianpe nawentaji Egipto lricjoite seiciento moneda palrata pafiape, njaji caballo, ciento cincoente nacoada apanape. Aima nanacjoite nja nawentaji nadia navende narso njaji talricanaati hitata ricope njite Aram.