¹ Jliaji talricanaati Salomón ipeyo njaji inaitjepe tecjoite perri: Faraón iito, njaji inaitjepe moabitanai, amonitanai, edomitanai, sidonitanai njaji hititanai tsacja, ² njaji inaiki wa Minalri icaiterri pia inaco narso njaji Iraelitanai: ''Corriotsa imaa carroca nainai, corriotsa jitá carroca ininaiwana, corri tsacjaotsa nanoca nemaa carro iinai, ima nadeecaotsa iwaopiacje nadiote icjaolre.'' Mitsa Salomón ipeyo lricaolre ricjoite nja inaitjepe canjaji. ³ Salomón irsopia seteciento lrininai catsa, njite treciento njaji lrinapjenaipe. Njaji lrininai njeneta lricaolre lripeyocawa pia Dio lricaolre sho. ⁴ Njite pekirri kena Salomón, njite njaji lrininai njenita lricaolre Dio ioya nadiote icjaolre; ima corripiatsa lricadaaca lricaolre ajádalri Dio nacó cayoji jlinirri David icayosho pia. ⁵ Ima Salomón iáa Astarot jiapodam, nadiote njaji sidonionai, Milcom tsacja, nadiote macadawalre njaji amonitanai. ⁶ Salomón inaitja maatsi wa Minalri ipeyajle; corrin lrinaitja matsia lricaolre ricjoite wa Minalri irso cayoji jlinirri David icayosho. ⁷ Salomón inaitja tsacja pada lriofaa carronao yenondalri Quemo irso, na idolon mapeyocanaadalri njaji moabitanai, jiipai yeenondalrida naco jeerri imoto kemjeteo Jerosalén irso, lrinaitja tsacja Moloc iofaa carrodao, na idolon mapeyocanaadalri njaji amonitanai. ⁸ Lrinaitja nadiote iofaa carrodao nacoanaa njaji lrininai corri perritsa raelitanaica, namjaita mana nanaco irso incienso njite naino maaficalri nadiote irso nanaco. ⁹ Niini kerroaca wa Minalri Salomón icjote, jlieneta capoa lricaolre Lrioya, nja Diote njaji Iraelnai, yamapia cadaana tja Dio Lricañjataacacao lrirso ¹⁰ njite lricaite lrirso wadee lrinaitjaca njaji lrinaitjalrina, wadee lriaca njapodam njaji idolonai. Mitsa Salomón imjepata jliaji wa Minalri icaiterri lrirso. ¹¹ Cayoshopa wa Minalri icaite Salomón irso cayoji: ''Naicjaote njaji pinaitjalri njite corrim pinaitja cayoji noaco icaite capoisho piapiya, njite njaji iacoti nonanda ponaitjá carro, Njota pioya maatsicalri rico talricanaaticawa pjia njite nocadaa caotsa pirso dalri irso. ¹² Mitsa pjinirri David icjaote, corriotsa njotá carroca pjia cádanacotoa talricanaati, mitsa notacaotsani pienipe cádanacoatsa talricanaati. ¹³ Caicayatsa corriotsa njotá carroca lrioya pjiomi jliaji lri talricanaatalri inaco; nocadaotsa papocoetsa lri talricanaatalriotsa inaco jlia pirrí. Nonaitja cayo lricjaote jliaji norsodalri David njite lricjaote jliaji yacaalre Jerosalén, niniwananda norsowao.'' ¹⁴ Icena, wa Minalri icadaa pada Salomón icoemao, lriipitana Hadad Edom njité dalri. Lrienipem nacjoite jliaji talricanaati Edom dalri pia. ¹⁵ David jiawajli pia, lriinocawa nacjote njaji edomitanai njite jliamana oowi ricó. Njite Joab, icapiatsa nacapitamaca njaji tsolrodaonai Irael ricope niini lriaca lridawa njaji nainojim oowi rico, cayo cadaa lriino tsenacja njaji atsianai Edom ricope. ¹⁶ Niini Joab iofaa pjatoa sei kerri naapiya njaji tsolrodaonai Irael ricope Edom rico, niini lriinoca pjiomi njaji atsianai nimperri. ¹⁷ Mitsa njaji Edomitanai italricanaa irsoperri napitoeta lrienipem tsoodalritoa, Hadad, Egipto lricojle. ¹⁸ Naawa Madian ricjoite Parán lricojle. Parán lricjoite pana atsianai iawa nainai naocá carroa Egipto lricojle, talricanaati Faraón iderse, njite lriá narso injaodalti, naapanao njite njepaitewa tsacja. ¹⁹ Njite matsia Faraón icapaca Hadad irso, niini Faraón iaca lriinowa, lriino iwedoatsa, roweedoa rsoaji talricanaati Tahpenes. ²⁰ Niini Hadad irsoca lrienipe Tahpenes iwedoa iapiya. Lricada lriipitanao Genubat. Njite Tahpenes itaoñani Faraón iipana lrico, talricanaati dapana lrico. Niini Genubat iofaawa talricanaati dapana lrico nainai njaji Faraón ienipe. ²¹ Egipto lricjoite, Hadad jimi mayamica David, njite Joab tsacja, nacapitama njaji tsolrodaonai Irael ricope niini Hadad iaco Faraón irso: Picadaa nodiá carro noofawa noyacalre ricojletsa.'' ²² Njite Faraón jiepani, lriaco lrirso: ''¿Cocao canacai pirso noinai, cocao podia pioma piyacalre ricojle?'' Njite Hadad jiepani: ''Cotsa coca canacairri norso piinai. Mitsa pinaitja matsiacalri picadaa nodiá carroa.'' ²³ Dio icadaa pada pja Salomón icoemao, lriipitana Rezón, Eliada irrí. Rezón ipito pia lrirsodalri Hadad ioya, jliaji Soba italricanaa. ²⁴ Rezón iwakeeta inaiki njite jliaca nacapitama njaji lriwakeetaji, mitsa David jiameetana oowi ricó njaji tsolrodaonai Sbá lricope. Njite Rezón iawa naapiya njaji lrinaikite Damasco lricojle naofaa nirseo njite njaaca ianjíi nanaco njaji Damasco lricoperri. ²⁵ Rezón jipondata njaji Iraelnai Salomón jiawajli, lriicjaote tsacja jliaji maatsidalri Hadad inaitjalri. Corri pia tsooca Rezón iomaca njaji Iraelnai, njite lritalricanaataca Aram nacó. ²⁶ Njite Jeroboam, Nabat irrí, efrateo tairri Sereda ricoda, njite jlidoa iipoitana Zerúa maduiyoam, caconaite Salomón irso, jlinco tsacja Salomón icjoete. ²⁷ Jlinco lricjoete lrinaitja capoa jliaji Milo, lriita capoa lricjaote lrinomafe jliaji yacaalre idaana njeyapacarroji pia David iyacalre ricojle. ²⁸ Jliaji Jeroboam pada atsia mafiokjete. Salomón icapa lrinaco pada iempeti idenjicaita cani, niini lricadaani jlia carro ianjíi José iipaneta nacó. ²⁹ Jliawajli pioa Jeroboam imoto caojli Jerosalén ricjoite, inoparrotacaita Ahias silonita inacjoite dalri icapa piani lriacayao inipolico. Ahias jietacapiawa tsaya walridalri sho, njite njaji yamadade atsianai neemacawa awacadapji rico njawaacatsa. ³⁰ Njite, Ahias icapa cádanacona lritserrenta lritsayan walridalri lrinaconda yamemam. ³¹ Niini lriaco Jeroboam irso: ''Pjipa die wana lrinacjoite, ima wa Minalri, na Diote njaji Iraelnai icaite cayoji: ''Njotacaotsa maatsicalri rico Salomón icapi ricjoite lritalricanaaca njite Noacaotsa pirso die poco nanacjoite njaji Iraelnai. ³² Njite Salomón irsocaotsa papocoenatsa, nopeyocapoa jliaji norsodalri David, njite lriicaote jliaji yacaalre Jerosalen nopeyonda, noniwananda norsowao nanacjoite njaji nanacjoite njaji inaikinai poco Irael ricope. ³³ Nonaitja cayo namaca capoa njoa Astoret icjaote, naacarro matsiadalri rorso rsoaji nadiote njaji sidonionai, Quemo icjaote tsacja, nadiote njaji Moab ricope. Corri nanaitja matsia nopeyajle, corri nanaitjá cayoji nooma capiosho, nacaite capisho njaji iacoti nocadaalri narso, iacoti nocadanji narso nanaitja carro cayoji lricayosho jliaji norsodalri David. ³⁴ Mitsa, corriotsa njotá carroca Salomón cádanaco talricanaati. Nocadaotsa jlia carrotsa talricanaati caafi cádanacon, lricjaote jliaji nopeyonda norsodalri David, jliaji noniwananda, jliaji inaitja cada cayoji nonaa capisho lrinaitjaca nanacjoite njaji iacoti nocadanda. ³⁵ Mitsa njotacaotsa jliaji talricanaatiapan lrirrí icaapi ricjoite nocadaa carroatsa pirso die poco nanacjooite njaji Irael poco. ³⁶ Papocoenatsa nocadaotsa Salomón irrí irso, niiní carro tsaotsa pada norsodalri David inacjoitedalri nacapaoda naicao talricanaati cadanaco Jerosalén rico, jliaji yacaalre njoenitanda noipitana icaoya. ³⁷ Njoatsa iniwana talricanaati carro pjia, pinaitjá carro matsia pjiomi njite cocatsa piomalri pinaitjaca, pjia watsa talricanaati nanaco njaji Iraelnai. ³⁸ Pinaitja cadaa cayoji nocaite capisho pirso, pinaitja cadaa matsia norso, njite pinaitja matsia nopeyajle, wadee namacaca noaco njite njaji iacoti nocadanji inaitjá carro cayoji norsodalri David icayosho, pjia nacjaotsa nokitsindata, pinacjoite perri nacjaotsa italricanaata Irael naco, cayoji nonaitja capisho norsodalri David ipaneeta irso. Nocadaotsa pjia carro italricanata Irael naco. ³⁹ Njorrapiteeta catoatsa kjeyatsa njaji David inacjoite perri.'' ⁴⁰ Niini salomón ioma piatja iinoca Jeroboam. Mitsa Jeroboam ipito lrioya Egipto lricojle, Sisac iderse, Egito italricanaa. Lriofaa nirseo kjerreca mayami Salomón. ⁴¹ Pjiomi njaji Salomón inacoapana, njaji lrinaitjaji njite lrianjikje nacó, paoketana nerricoda njaji paperra nadanda lrinaco. ⁴² Salomón italricanaata pjiomi Irael naco Jerosalén rico coarenta walria oonia. ⁴³ Mayamini njite nadawani nainai njaji lripjeyadampe pia jlinirri David iyacalre rico. Lrirrí Roboam nacja italricanata jliapodam.