¹ Roboam iwa Siquem ricojle, ima pjiomi njaji Iraelnai naaca Siquem ricojle nakeepitanatá carroni nirse natalricanaawani. ² Mitsa Jeroboam, Nabat irrí jimi cádanaco cayo cana Egipto lricjoite, ima nirse catoani, lripitolri nirse talricanaati Salomón ioya, njite Jeroboam iofaa cjapanitoa nirse. ³ Niini njaji iwacaaca cápewa nameenaca iacoti Jeroboam irso lrinó carro naderse, niini Jeroboam njite njaji Iraelnai iwacaacalrio naaco Roboam irso: ⁴ ''Jliaji pjinirri icadaa aima calretsa wadenjicalreo nini poicadaa tsoo carro pjatsa wadenjica lrioya jliaji pjinirri icadaalri warso njite wadenjicaotsa pirso cayo cadaa pinaitjaca warso.'' ⁵ Niini Roboam iaco narso: ''Idia toawa, njite madalridaa nacoatsa iino tsenacja noderse.'' Njite njaji inaiki nadiaca toa lrioya. ⁶ Niini talricanaati Roboam itatja jimio nainai njaji caconaaperri pequipenai idenjicapemi jlinirri Salomón iinai lricodapitsa caafi cádanacotoani, lriaco narso: ''Coanje icaiteca njoanjoepacaotsa njaji inaiki? ⁷ Njite naaco lrirso: ''Ajadalri cadantja piomaca pidenjica narso njaji inaiki panaya, njite picaite narso iacoti matsiadalri, niinimtja pirsoperricantjana caidalritsana. ⁸ Mitsa corrim Roboam jiepa naaco njaji poekipenai, ima lrikenacja lritatja lrimio nainai njaji iempetipe lritaoñacaweenai, neema lripeyajle. ⁹ Lriaco narso: ''¿Coan icaiteca njoa njoepaca njaji inaiki icaitecape norso, naomaca noinai tsoo carro pjatsa nadenjica lrioya jliaji njonirri icadalri nadenjica?'' ¹⁰ Niini njaji iempetipe toa Roboam itaoñacawenai naaco lrirso: ''Picaite narso njaji inaiki icaitecape pjinirri Salomón icadaaca nadenjicalreo jamiñádalri, njite naoma picadaaca tamomi carro pjatsa jliaji idenjikjeti jamiñadalri. Picaitentja narso cayoji: Cotsa cocaca jliaji njonirri icadaalri irso lrioya jliaji nocadalriotsa irso. ¹¹ Niini panaya, jamiña cadanena ianji lriaji idenjikjeti njonirri icadalri irso, nocada pjatoatsa jlimiñaca irso nanaco, njonirri jirrapiteta piaca jia capee sho, mitsa njoa njorrapiteeta caotsa jia yalree sho.'' ¹² Jeroboanm njite pjiomi njaji Iraelnai nawacaacawa Roboam iderse madalridaa naco, cayotsa lricaite capisho narso, nanó carro lriderse madalridaa jalredaoca nacó. ¹³ Niini jliadeena, jliaji talricanaati icaite njemi njaji inaiki lrinaco jliaji natatjalri inaco, mitsa corri lricaite cayoji nacaite caposho lrirso njaji pekipenai. ¹⁴ Lricaite narso naacoarrom njaji iempetipe toa, lriaco narso: ''Njonirri icadaa pia idenjicalre jamiñádalri, mitsa njoa nocadaa pjatoatsa idenjicalre lrinaco pja. Njonirri jirrapiteta piaca jia capee sho, mitsa njoa njorrapiteeta caotsa jia yalree sho.'' ¹⁵ Corri talricanaati jimi narso njaji inaiki, ima jorreca njaji jiyapalrio nanacowaaca cayotsa wa Minalri icadaa capisho, lrimotó carrotsa cayoji Lricaite capisho Jeroboam irso, Nabat irrí Ahias silonita inoma lricjoite. ¹⁶ Nacapa cádanaco njaji Iraelnai corrica talricanaati jiepana, naaco lrirso: ''¡Corriotsa waa carroca nainai njaji David inacjoite perri! ¡Corriotsa wanjíi carroca lrinaco jliaji Isai irrí! Warsa wadiawa waapana lricojle, Iraelnai. Panaya pjia, David inacjoite dalri, picapa pjiwaacatsa jliaji pitalricanaaca naapiya njaji pikitsiñape. Cayotsa nadiacawa njaji Iraelnai naapana lricojle. ¹⁷ Mitsa narso njaji Iraelitanai iofaacape nerricoda njaji yacaalre Judá jipaite ricope, icatsa Roboam italricanaataca nanaco. ¹⁸ Njitedalri talricanaati Roboam imeenaca Adoram, jliaji ianjirri nanaco njaji idenjikjeti jamiñaperri, mitsa njaji Iraelitanai njepa naino mayamin jiipada sho. Njite jliaji talricanaati Roboam jlirra kjeyao lricaballon naco irsocada carreta lripitó carro Jerosalén ricojle. ¹⁹ Cayotsa Iraelnai iemaca David iipaneta icjoete panajiete. ²⁰ Njite njaji Iraelnai njemi cádanaco Jeroboam idiaca iocao jlipaite ricojle, naa nawanani nawacaaca carroda lrico, niini nacadaacani natalricanaawani nanaco njaji Iraelnai. Corritsa coca nanacjoite ikitsindata David iipaneta, icaamitsa Judá poco. ²¹ Roboam ioca cádanaco Jerosalén ricojle, lriwaketa pjiomi njaji Judá poco njite njaji Benjamín poco tsacja; niini pia ciento ochenta mil atsianai tsolrodaonai njenitaji inoacacapeo, naacarro nainocacawa Iraelnai iipaneta icjoete, nadietá carro njaji inaiki iraelitanai pjiomi Roboam irso, Salomón irri. ²² Mitsa caacoca Dio Semaia inomalricjoite, ape atsia Dio irsodalri, lriaco cayoji: ²³ Caaco pjia Roboam irso, Salomón irrí, Judá italricanaa, narso tsacja njaji Judá poco pjiomi, njite narso tsacja njaji Benjamín poco, njite narso nja apaana inaiki tsacja, picaite narso cayoji: ²⁴ Cayo lriaco jliaji wa Minalri: Corrím itaita iaca inoacawa nacjoete njaji ikitsiñape Iraelnai. Idiawa iipana lricojle icoana, ima pjiomi njaji jiyapalrio, Njoatsa icada cayo.'' Niini njaji inaiki njemica jliaji iacoti Dio njité dalri, icaamitsa nadiacawa njapodamrsewa, njepa jliaji Dio icaiterri narso. ²⁵ Njite Jeroboam inaitja jliaji yacaalre Siquem awacada cawa njepaite rico njaji Efraín poco, njite lriofaca niini. Lriá tsenacja njiteo njite lrinaitjaca jliaji yacaalre Penuel. ²⁶ Jeroboam iwaopia lricaolre ricó: ''Panaya nadiaca tsenacjaotsa njaji inaiki lricjaolre jliaji talricanaati David iipaneta lricjoite dalri. ²⁷ Naacada tsenacjaotsa njaji Iraelitanai namjaitá carro maaficalri Dio irso panti macadapana ricó Jerosalén ricojle, njaji inaiki nadia tsenacjantja Roboam icjaolre, Judá italricanaa. Nainontja njoa nadiá carro tsenacja Roboam icjaolre, Judá italricanaa.'' ²⁸ Niini jliaji talricanaati Jeroboam ianji ioma iacoti nainai njite lrinaitja yamana vaaca ienipe jinapjia owirro sho; njite lriaco narso njaji inaiki aimadan: ''Jirapitina calretsantja irso iaa carro Jerosalén ricojle. Icapa, icatsa idioteca njaji, jia Iraelitanai. Icatsa njaji jitalri piaca jia Egipto lricjoite.'' ²⁹ Niini lricadaa apana vaken jinaapjia Betel rico njite apana Dan rico. ³⁰ Opi lrima nanaitjaca maatsi naikjaote njaji lrinaitjalri. Njaji inaiki naawa Betel ricojle njite nja paan nacawa Dan ricojle. ³¹ Jeroboam inaa nanaitjaca panti yenondalripe naco njite lricadaa sacerdote carro coamperri catsa inaiki, corricantja njatsa njaji Leví poco. ³² Jeroboam inaa nanaitjaca naija carroa kince jalredaoca naco ochopi kerri naco. Cayotsaji nanatja capisho nawaketaaca carroa Judá lrico, njite namjaita maaficalri altar naco cayo cádanco tsacja. Lrinaitja cayo Betel rico narso njaji vaken jinaapjia lrinaitjaji, njite lridee tsacja njaji sacerdotenai iwapacape nerricoda njaji panti lrinaalri nanaitjaca yenondalripe naco ³³ Jeroboan iwa Betel ricojle lrimjaitá carro maaficalri nanaco njaji altar lrinaalri nanaitjaca nanaco njaji yenondalripe kince jalrdaoca naco ochopi kerri naco, lrinacopi jliaji kerri lriwaopianda inaco jliwaacatsa, lrinaa nacatima taacawa njaji inaiki Irael ricope jlite lriawa lrimjaitá carro incienso altar nacó