¹ Dio imeenaca pada inoparrotacada Judá lricoda Betel ricojle. Jeroboam iema cadanawa altar icodapi lrimjaitá carro incienso lrinaco. ² Dio inaa inoparrotacada iiyaca lricjoete jliaji altar, lriaco cayoji: ''¡Altar, altar! Cayo wa Minalri icaiteca: padaotsa iempeti imotoa, lriipitanaotsa Josia, David inacjoite dalri cani, njite Josia imjaitacaotsa pinaco njaji sacerdotenai iwapacape njaji yenondalripe, namjaita cawa naco incienso panaya, namjaita caotsa inaiki iapipem.'' ³ Njite jliaji inoparrotacada icada pada nanjishopa jliadaotsa jeecoapi, lriaco cayoji: ''Icatsa panjishopaca lrinaco jliaji wa Minalri icaiterri: Icapa lrirso jliaji altar, lrimacjaaca caotsa yameemao, njite njaji palripoco lrinacoperri napatja caotsao macadtsa.' ⁴ Taleicanaati jimi cádanaco njaji iacoti lricaiterri jliaji inoparrotacada, coanca lriiyaca altar icjoete Betel ricda. Jeroboam icaite njite lripiajleta lricaapi altar ricjoite: ''Jipani'' Icamina merrica lricaapi lripiajletanda jlicjoete jliaji inoparrotacada, njite corrinatsa lritaitetsa lridietacani. ⁵ Njite altar lrimacjaacawa jamemao, njite napatjawa njaji palripoco lrinacodalri, cayotsa Dioicaite capisho lrinoma lricjoite jliaji inoparrotacada. ⁶ Njite jliaji talricanaati Jeroboam iaco lrirso jliaji inoparrotacada: ''Pitatja caiwi ricotsa nonaco piniNalri Dio imatsiaca sho, matsia carro tsenacja nocaapi.'' Niini jliaji inoparrotacada wa Minalri iinai, ikena matsiaca tsenacja lricaapi jliaji talricanaati, cayotsaji lripjeya toa maatsicani. ⁷ Njite jliaji talricanaati iaco inoparrotacada irso: ''Pino noinai noopana lricojle pinjá carro noinai, njite noá carroatsa poirso picoadao.'' ⁸ Njite jliaji inoparrotacada iaco lrirso jliaji talricanaati: ''Picaite cadantja piaca norso pamoyoa nanacjoite njaji piyaarro, corri tsacjanta noaca piinai; ima corritsa noinjá carroca injaodati, corri tsacja noirrá carroca ooni adalriji, ⁹ ima no Minalri iaco norso cayoji: Corriotsa injá carroca petje, corri tsacja pirraca ooni nindalri, corri tsacjaotsa pidiá carroca lrirrico mitsa inipoca.''' ¹⁰ Niini jliaji inoparrotacada lridiawa Betel ricjoite, lriipana lricojle pacja lricotsa inipo. ¹¹ Niini pia pada inoparrotacada pekirritsa Betel rico, njite pada nanacjoite njaji lrienipe ino lriderse njite lricaite lrirso pjiomi njaji lricaiterri jliaji inoparrotacada jliadaa Betel rico. Nacaite tsacja jlimi nja lrienipe nanaco nja iacoti lricaiterri talricanaati irso jliaji inoparrotacada. ¹² Njite njanirri iaco narso: "¿Coajerricja lricoca inipo lridiawa?'' njaji lrienipe nacañjata lricapa coajerricja lricoca inipo lridiawa jliaji inoparrotacada ínolri Judá ricjoite. ¹³ Niini lricaite narso nja lrienipe natsietá carro lrirso lriborron lriá carro lrinao. ¹⁴ Ikena lriacawa jliaji inoparrotacada pekirrim jliapodam jliaji pada inoparrotacada njite lrioketani lriofacawa apana jaico iapjite; lriaco lrirso: ''¿Icatsa pjia inoparrotacada inocada Judá lricjoite?'' Njite jlepani: ''Icatsa njoa.'' ¹⁵ Njite lriaco lrirso jliaji inoparrotacada pekirrim: ''Pino peda panti ricojle pinjá carro noinai injaodati'' ¹⁶ Njite jliepa toan inoparrotacada, lriaco: ''Corrin notaita nodiacawa, corri tsacja notaita njoewacawa piipana lrico noinjá carro pinjaoda njite corrim tsacja notaita noirraca ooni adalriji, ¹⁷ ima cayoca lricaiteca norso jliaji wa Minalri: ''Corriotsa pinja carroca injaodati niini, corri tsacjaotsa pirracaotsa ooni nindalri, corri tsacjaotsa pidia carroca lrirrico minitsa jliaji inipo pialri irricocja.''' ¹⁸ Niini lriaco jliepacan jliaji inoparrotacada pekirrim: ''Inoparrotacada tsacja njoa, caitsa picayosho, ima caacoca norso pada angele wa Minalri nacjoite: ''Pia pidieta piinaiwa piipana lricojle, ltritaitá carro lrinjaca njite lrirra tsacja ooni.''' Lriwa cadanatsa lrirso jliajiinoparrotacada pekirrim lrirso jliaji inoparrotacada. ¹⁹ Niini jliaji inoparrotacada iawa lriinai jliaji inoparrotacada pekirrim, lrinja lriinai, lrirra tsacja ooni lriipana lrico. ²⁰ Naofa cadana toa naija mesa naco, caacoca Dio lrinoma lricjoite jliaji inoparrotacada pekirrim, jliaji imalri lridiacawa jliapodamrse, ²¹ njite caacocani cjaida lrirso jliaji inoparrotacada inocada Judá lricjoite, lriaco lrirso: ''Cayo lriaco jliaji wa Mianlri, corricapoa pjiepa wa Minalri iaco, corri pinaitja cayoji lrinaa capisho pinaitjaca jliaji wa Minalri Dio, ²² icaamitsa pinoca pinjá, pirra tsacja ooni adalriji, wa Minalri icaite cadana pirso wadee pinjaca, pirra tsacja ooni adalriji, corriotsa nadawá carroca pidadam pjinirrinaipem icodapi."' ²³ Lritaita cayami lrinjaca, lrirra tsacja, jliaji inoparrotacada pekirrim imatsieta apana borro lrirso jliaji inoparrotacada, jliaji lridietandam toa lriinai. ²⁴ Lriá cádanacoena jliaji inoparrotacada inipo lrico, apana yaawi inoni. Njite atsa yaawi icada lridadam inipo lrico. Njite lriborronim atsa lriemawa lricodapi, njite lriaji yaawi inocadam lriema tsacja lricodapitsa. ²⁵ Njaji inaiki jiyapajicape niini, nacapa pada inaiki mayandalrim inipolrico, njite apana yaawi lricodapi, niini naaca nacaite narso njaji inaiki iofaacape lrirricoda jliaji yacaalre lriofalri ninio jliaji inoparrotacada pekirrim. ²⁶ Jlimi cádanaco jliaji inoparrotacada imalri lridiacawa jliapodam rsewa, lriaco; ''Jliatsa jliaji inoparrotacada corridalri jiepa wa Minalri iaco. Corri capoa jliepani, Lricadaa yaawi iinó carron, cayotsa lriaco wa Minalri icaite capisho lriso jlipjeyao.'' ²⁷ Niinijliaji inoparrotacada pekirrim iaco narso njaji lrienipe namatsietá carro lrirso lriborron. ²⁸ Ikena lriacawa, njite lrioketa lridadam inipolrico; lriborron tsa lricodapi njite jli yaawi tsacja. Mitsa jliaji yaawi corrim lrinjaca jliaji lridadami, corrim tsacja lriino cantja jliaji borro. ²⁹ Icaamitsa jlipaca jlirreta lridadam jliaji inoparrotacadam, lricadaani borro nacó lridietá carron lriyacalre ricojle jliaji inoparrotacada pekirri lridawá carron nirseni. ³⁰ Lridawani lri ricodatsa jliaji irrirrí lricaonaadatsa jliaji inoparrotacada pekirrim, njite lriiya lrinao cjaida, lriaco: ''¡Maatsí, nokitsinda!'' ³¹ Njite lridawa cayamini, jliaji inoparrotacada pekirrim iaco narso njaji lrienipe: ''Mayam kenaotsa njoa, idawaotsa njoa lrinaitsa jliaji inoparrotacada. Icadaotsa noapipemm, lriapipem icodapitsa. ³² Ima njaji iacoti Dio icaiterri lrinoma lricjoite, lricjoete jliaji altar Betel ricoda, njite nacjoete njaji panti nanaitjaji yenondalripe naco nerricoda njaji yacaalre Samaria ricoda, ajá dalricana. ³³ Jeroboam jimi cadana nja iacoti coancaotsa, mitsa corrim lrimaca njaji lrimatsicana, icaamitsa lricadaa pjaca sacerdotenai macadatsa naicaona njaji panti yenondaripe icaona, coandalricatsa inaiki. Coandalricatsa lricapa matsiaca, icaamina lricadaacan sacerdote carron. ³⁴ Jliaji imatsicanaati icadaa nanaitja pecado matsinaadalri njaji Jeroboam ipaneta, njite naicjaotena Jeroboam ipaneta iwayacawa matsianjerri, corritsa padacantja iofawa nanacjoite jalredaoca lrico.