¹ Jliawajli pia, Jeroboam irrí Abía, caifiacani matsinaa. ² Niini Jeroboam iaco lriino irso: ''Pinaitja matsiacalri pjinicoa, pjietacawa teecojletsa wadee nanjica noinoca pjia. Piawatsa Silo ricojle lricjaolre jliaji prifeta Ahía, icapiatsa jliaji inoparrotacada caacolrica pia norso lricaite cádanaco njoacaotsa talricanaati nanaco njaji inaiki. ³ Pjipa pidee dieta pan, torta tsacja njite apana botejieco maapa, pia carro Ahía iderse. Jliaotsa icaite coancaotsa jliaji weenipe tsoodalri toa.'' ⁴ Rsoaji Jeroboam iino inaitja cayo; romoto roawa Silo ricojle Ahía iipana ricojle. Mitsa ahía corrinatsa lritaita lricapaca matsia, matjirrenatsani lripekirrica ima. ⁵ Niini wa Minalri iaco Ahía irso: ''Rsoaji Jeroboam iino ronoca picjaolre roma rsomica piinai iacoti roenipe naco, ima caifiacani matsinaa. Picaiteotsa roso cayoji nocaite capishoatsa pirso, ima ronocaotsa apama capishotsano.'' ⁶ Njite Ahía jimi rsopanialre rsoewa cádanaco pantinoma lrico, lriaco rorso: ''Pjiewawa, Jeroboam iino. ¿Coadadao pino apama capishotsa pjia? Dio icaite norso nocaite carro pirso iacoti maatsidalritsa. ⁷ Pidiaotsa picaite Jeroboam irso wa Minalri naco, naDiote njaji Iraelnai, cayo lricaiteca: Njota pjia nanacjoite njaji inaiki aimadan pjia carro naapiyawalreo njaji nonaikite aimadan Iraelnai. ⁸ Njota maatsicalri rico norsodalri David iipaneta ioya jliaji talricanaatiapan nocadaa carro pirson, mitsa pjia corri pinaitja cayoji norsodalri David inaitja capisho pia, jliepapoia noaco, lripeyo piaca njoa lricaolre sho, lrinaitja norso pjiomi njaji matsiaperritsa. ⁹ Pinaitja werrico matsia, pinaitja maatsi, matsinaa pja naoya njaji pipjeyadempia. Pinaitja njaji diodape, njite pirsoca njaji njenapjiandape napatsicanda tsipalrape sho piometa carro noirroa, njite pidanjiteetaca njoa. ¹⁰ Niiniotsa, nocada matsirri piipaneta naco; corriotsa caafi carroca pada iempeti atsiada Irael rico. Corriotsa coadaca canaani dalri ienipecani o irsodalri ienipe cadani, Nowayakeeta decjaotsa pjiomi piipaneta lricope, cayoji pada imjaita capisho vacja nakewitanda malritsi sho, lrimacawa akjerreca lriwayacao. ¹¹ Mayami cadaotsa pada pinacjoité dalri aji yacaalre rico, tsinoatsa inja lridadam, njite mayami cadaotsana awacada lrico wayolriotsa injani, ima Njoa iMinalri, cayo Nocaite.'' ¹² Niini pjinicoenawa, pjia Jeroboam iino, pidienawa piipana lricojle; pjiewa cádanacoatsa piyacalre rico, mayamicaotsa jliaji iempetitoa Abia. ¹³ Naiya caotsa lrinaco pjiomi njaji Iraelitanai, njite nadawaotsani jiipai ricó. Icaamitsaotsa jliaji nadawalriotsa jiipai rico nanacjoite njaji Jeroboam iipaneta, ima icamipiatsa wa Minalri, na Diote njaji Iraelnai icapalrica inaco matsiadalri nanacjoite njaji Jeroboam iipaneta. ¹⁴ Njite wa Minalri icadaotsa pada talricanaati walridalri Iraelitanai irso, icatsaotsa jliaji iwayakeetalriotsa njaji Jeroboam iipaneta jliadaa jeecoapi. Njite ikena jlinaana ioca kenao jliadeena jliaji paanayalri. ¹⁵ Ima wa Minalri iñocota caotsana cayoji ooni itarraca iñocota capisho jaicoapo, jlitacaotsa Irael lri pocoda nacjoite lripeeco carro pemajlena lrioya jliaji jiipai matsiadalri lricadanda narso njaji ipjeyadampe pia. Lripatjaotsana ooni Eufrate pemajle rse, nanaitja capoa Asera jinapjiam njite nakerroataca wa Minalri lricjaote. ¹⁶ Lricadaa caotsa njaji Iraelnai paana irso Jeroboam imatsicanaa icjaote, naicjaote njaji imatsicanaati lrinaitalri, lricadaalri Iraelitanai inaitja imatsicanano icjaote.'' ¹⁷ Niini icaamitsa Jeroboam iino jinicoa rodia carro Tirsa ricojle. Rooca cádanaco catsa ropjoa pantinoma naco, mayami tsacja roenipe. ¹⁸ Nano pjiomi njaji Iraelitanai nadawá carroni, njite naiya lrinaco, cayotsa wa Minalri icaite capisho lrirsodalri inoparrotacaita Ahia inoma lricjoite. ¹⁹ Nanaco njaji Jeroboam inaitjalri, coanca lrinaitjaca oowi, coanca lritalricanaataca, nadanana paperra lrico nadana cawa nanacoapana njaji talricanaatinai Irael ricope. ²⁰ Ventido walria oonia Jeroboam italricanaataca, njite mayamini. Nadawani nainai njaji jlinirrinaipemi, njite lrirri Nadab italricanaata jliapodam. ²¹ Njite Judá rico, Salomón irri Roboam italricanaata niini. Coarentaun walria oonia kena lripekirrica lriinita pia lritalricanaataca, njite lritalricanaata diecisiete walria oonia Jerosalén rico jliaji yacaalre Dio iniwananda lrirsowao nanacjoite njaji Iraelnai poco lricadaa carro niini lriipitana. Naama pia roipitana rsoaji Roboam jidoa, Amon njité darro. ²² Njaji Jodá poco nanaitja maatsi Dio ipeyalje; Nakerroatani naicjaolrewa naicjaote njaji imatsicanaati nanaitjalri, matsinaa pja njanirrinaipemi inaitjaji ioya. ²³ Ima jipanadape nacó, njerreta narsowao jiipada nacadaa carro nanaco Asera jinapjiam. Caiminitsa nanaitjaca nanaco njaji jipanadape, napjite njaji jaico matsianepe capjecan, ²⁴ Niini pia tsacja atsianai inaitjacape macadatsa nadada sho nerricoda njaji naacawa naa matsiadalri idolo irso. ²⁵ Njite papia nacojle, cinco walria oonia kena talricanaatica Roboam, Sisac Egipto italricanaa inaitja oowi Jerosalén lricoperri icjoete. ²⁶ Niini nadeeca Dio iipana lricjoite pjiomi njaji cacoadaperri nimperri, cayo tsacja njaji cacoadaperri talricanaati dapana lricjoite. Nadee pjiomi; nadee tsacja njaji escodo Salomón inaalri pia nanaitjaca owirro sho. ²⁷ Niini talricanati Roboam ipieta inaitja njaji escodo bronce shoenacja njite lricana nja carro ianji nanaco njaji comandantenai iwapacape yacaalre ipananoma njite talricanaati ipananoma lriipana lrico. ²⁸ Talricanaati iáa cádanaco Dio iipana lricojle, njaji tsolrodaonai iwapacapen nadee njaji escodo, njitedalri nadieta tsenacjana nawapa carroda dapana lrico. ²⁹ Njite nanaco nja paana Roboam inaitjaji, pjiomi njaji lrinaitjalri paoketana nadananda lrico lrirricoda jliaji paperra nadana cawa nanaco njaji talricanaatinai Judá lricope. ³⁰ Nanaitja pia oowi nacjoetewaca Roboam, Jeroboam iapiya caidalritsa. ³¹ Njite mayami tsacja Roboam njite nadawani jlinirrinaipem iinai David iyacalre rico. Naama pia roipitana rsoaji Roboam jidoa, amón njité darro. Njite Roboam irri Abiam nacja talricanaati jliapodam.