¹ Dieciocho walria oonia talricanaati cayami Jeroboam, Nabat irri Abiam, lrinita lritalricanaataca Judá lrico. ² Lritalricanata madalriwalria Jerosalén rico. Njite Maaca pia roipitana rsoaji Abiam jidoa, Abisalom iito. ³ Abiam inaitja njaji imatsicanati jlinirri inaitjaji lripjeya toa. Corri lrinaitja matsia lricaolre rico lri Minalri Dio irso cayoji lripjeyadam David inaitja capisho pia lricaolre rico. ⁴ Mitsa, jliaji Dio, David iMinalri, lripeyo capoani lricadaa pada David inacjoite dalri Jerosalén rico jliapodam lricjaidatá carro Jerosalén. ⁵ Dio inaitja cayo, David inaitja capoa matsia lripeyajle; caidalritsa caafi cádanaco, corri jlienaca naoya njaji Dio inalri lrinaitjaca, icaamitsa lrimatadaca lrinaco jliaji lrinaitjalri Uria irso hitita dalri. ⁶ Njite caidalritsa nanaitjaca oowi Roboam, jeroboam iapiya caidalritsa caafi cádanaco Abiam. ⁷ Njite nanaco nja paana Abiam inaitjaji, pjiomi njaji lrinaitjalri paoketana nadananda lrico lrirricoda jliaji paperra nadana cawa nanaco njaji talricanaatinai Judá lricope. Nanaitja pia oowi nacjoetewaca Roboam, Jeroboam iapiya caidalritsa. ⁸ Mayami Abiam njite nadawani jlinirrinaipemi iinai, nadawani David iyacalre ricó. Njite lrirri Asa italricanata jliapodam. ⁹ Njite vente walria oonia naco talricanaati cayami Jeroboam Irael italricanaa, Asa iinita italricanataca Judá rico. ¹⁰ Lritalricanata coarentaun walria oonia Jerosalén rico. Maaca idakerrica jliaji Asa, Abisalom iito. ¹¹ Asa inaitja njaji matsiaperritsa Dio ipeyajle, cayotsa lripjeyadam David inaitja capisho pia. ¹² Lripeeco pjiomi njaji atsianai inaitjacape macadatsa nadada sho naoya njaji naacawa mana naa matsiadalri njite lripeeco tsacja nja idolonai nanaitjaji njaji lripjeya dapem pia. ¹³ Lricadaa tsacja jlirroitam Maaca rsoa carro talricanaati lriinai, ima Maaca inaitja piaca rsonapjiam rsoaji nadiote mapeyo canadarro Asera. Asa ipeeco rsonapjia rsoaji mapeyo canadarro Asera, lrimjatano pacoacaita cawa rico jiipai Cedrón ricó ¹⁴ Mitsa njaji yenondalripe nanaitjaji corri lripeecona. Mitsa, Asa icadaa lricaolre Dio naco matsia caidalritsa caafi cádanaconi. ¹⁵ Jlieta Dio iipana lricojle pjiomi njaji jlinirri jienitaji lricaoya, njite tsacja pjiomi njaji lrinaitjaji, njaji iarropetida lrinaji nanaitjaca palrata sho, owirro sho Dio irso. ¹⁶ Asa inaitja oowi Baasa Irael italricana icjoete caidalritsa jlia cádanaco talricanaati. ¹⁷ Jliaji Irael italricanaa Baasa, jlinico mana matsicalri rico Judá icjoete niini jlipaca lrirsowao Ramá njite lrinaitja lridanawa wadee naacawa o nadiacawa njaji inaiki Judá ricojle Asa iwapanda rico jiipai. ¹⁸ Njite Asa jipa iniwa pjiomi njaji palrata, owirro itepem namacaji namatsietacawa lrico Dio iipana lricope, njite njaji namatsietaji talricanaati dapana lrico tsacja. Asa icadaa narso njaji lrirsoperri nadee carrona Ben Adad irso, Tabrimón irri, Hezión irri, Aram italricanaa, iofaacada Damasco lrico, lrimeenaca iacoti lrirso cayoji: ¹⁹ ''Nooma pjiepaca njoa warso carro iacoti matsiadalri warsowaaca , cayoji njonirri irso capisho pia pjinirri iapiya. Nomeenaca pirso palrata, owirro tsacja macoadatsa. Ajena pirsoca iacoti Baasa iapiya, Irael italricanaa, lricadaa carro nofáa nomaodaca tsa.'' ²⁰ Ben Adad jimi lrirso jliaji talricanaati Asa, niini lrimeenaca njaji lritsolrodao icomandantenai nainoacá carro nacjoete njaji yacaalre Irael ricope. Nainoaca nacjoete njaji inaiki iofaacape Ijón rico, Dan rico, Abel Bet ricoda, Maaca ricope njite pjiomi nacjoete njaji Cineret ricope, nacjoete tsacja njaji iofaacape njepaite rico njaji Neftalí poco. ²¹ Niini Baasa jimi cádanaco coanca, yaami lrinaitjaca Ramá idanao njite lridiawa Tirsa lricojle. ²² Njite jliaji talricanaati Asa lrinaa nacaiteca pjiomi njaji Judá lricope, corrim njeyapa pada. Niini njaji inaiki njewajica pemajle njaji jiipada, jaico tsacja Ramá lricjoite Baasa inaa shopam nanaitjaca Ramá idanao. Nasho njaji lrinaitja shopam, jliaji talricanaati Asa inaa nanaitjaca jliaji yacaalre Geba Benjamin ricoda njite Mizpa tsacja. ²³ Njite nanaco nja paana Asa inaitjaji, coan piaca cjaidacani njite pjiomi njaji lrinaitjalri, nanaco njaji yacaalre lrinaitjaji, paoketacana nadananda lrico lrirricoda jliaji paperra nadana cawa nanaco njaji talricanaatinai Judá lricope. Mitsa pekirri kenani, caifia piaca jlipa naco. ²⁴ Mayami Asa njite nadawani jlinirrinaipemi iinai jlinirri David iyacalre ricó. Njite lrirri Josafat italricanaata jliapodam. ²⁵ Njite Nadab, Jeroboan irri italricnata nanaco njaji Iraelitanai yamawalria naco oonia talricanaati cayami Asa Judá lrico. Nadab Italricanata Israel nacó yamawalria oonia. ²⁶ Lrinaitja maatsi Dio ipeyajle, lrinaitja njaji imatsicanati jlinirri inaitjaji, njite njaji imatsicanati lrinaitjaji catsa, lricadalri ima nanaitjaca namatsicanao njaji Iraelitanai. ²⁷ Njite Baasa, Ahia irri, Isacar inacjoitedalri, Lriwaopia dawacalri ricotsa lrinó carro Nadab, niini lriino cani Gibetón ricó, nayacalre rico njaji filisteonai, ima Nadab njite njaji Iraelnai nadanata njaji nimperri, nafietacana. ²⁸ Madalriwalria naco oonia talricnati caami Asa, Judá italricanaa, Baasa iino Nadab niini Baasa nacja talricanaati jliapodam. ²⁹ Talricanatica icjoete jliaji Baasa, lriino pjiomi njaji Jeroboam iipaneta. Corrin lricacadaa caafi pada nanacjoite njaji lrinacjoite perri; cayotsa lriwayakeetaca pjiomi njaji Jeroboam inacjoite perri, cayotsa Dio icaite capisho Ahía inoparrotacada inomalricjoite, jliaji Silonita dalri, ³⁰ naicjaote njaji imatsicanaati Jeroboam inaitjaji lrimalri nanaitjaca namatsicanao njaji iraelitanai, naicjaotena lrima kerroaca wa Minalri, na Diote njaji Iraelnai. ³¹ Njite nanaco nja paana Nadab inaitjaji, pjiomi njaji lrinaitjalri, paoketacana nadananda lrico lrirricoda jliaji paperra nadana cawa nanaco njaji talricanaatinai Irael lricope. ³² Asa ianaitja mana oowi Baasa icjoete, Irel italricanaa caidalritsa jlia cádanao talricanaati. ³³ Madalriwalria naco oonia talricnati caami Asa, Judá italricanaa, Baasa, Ahía irrí iniita italricanataca nanaco njaji Irael Tirza lrico, lritalricanata niini venticoatro walria oonia. ³⁴ Lrinaitja njaji maatsirri Dio ipeyajle, lrinaitja cayoji Jeroboam inaitja capisho, lrimatsicanaa lrico lrimalri Irael inaitjaca maatsi.