¹ Cayo lricaiteca jliaji wa Minalri Jehú inoma lricjoite Hanani irri Baasa icjoete: ² Njoa cadana tja icadaa talricnaati carro pjia nanaco njaji Iraelnai corri cadanatsa cocaca pjia, mitsa pinaitja cayoji Jeroboam inaitja capisho pia, njite pima nanaitjaca namatsicanaa njaji Iraelnai, cayo carroena nakerroataca njoa namatsicanaa icjaote. ³ Nowayaketacaotsa Baasa njite njaji lriipaneta cayoji nonaitja capisho pia Jeroboam iipaneta, Nabat irri. ⁴ Coca cadaotsa mayami nanacjoite yacaalre rico, tsiinowatsa inja nadadam, mitsa jliaji mayamirriotsa awacada lrico waayolriotsa inja nadadam.'' ⁵ Njite njaji Baasa inacoapana, njaji lrinaitjalri, jliida paoketana nerricoda njaji lribo nadana cawa nanacoapana njaji talricanaatinai Irael ricope. ⁶ Mayami Baasa njite nadawani nainaitja njaji lripjeyadapempia Tirsa lrico, njite lrirri Ela nacja talricanaati jliapodam ⁷ Cayotsa caacoca wa Minalri inoparrotacada Jehú inoma lricjoite Hanani irri Baasa icjoete njite lriipaneta icjoete tsacja, naicjaote njaji imatsicanaati lrinaitjalri wa Minalri ipeyajle imalri kerroacani, naicjaote njaji lrinaitjalri njite lriino capoa njaji Jeroboam iipaneta. ⁸ Njite ventisei walria oonia talricanaati caami Asa Judá italricanaa, Baasa irri Ela iniita italricanaataca nanaco njaji Iraelnai Tirsa lrico. Lritalricanaata yamawalria oonia. ⁹ Jliaji lrirsodalri Zimri, lricapitama ianjicada pamoyoa naco nanaco njaji caballo nainoaca shopawa oowi rico, lriwaopia dawacai ricotsa lriinó carro Ela. Njite Ela iofaa lriira lridewana Tirsa ricó Arsa iipana lricó. ¹⁰ Niini Zimri jiewa lricjaolre lrinoaca lriapiya njite lriinoni, ventisiete walria oonia talricanaati caami Asa, Judá italricanaa cayo pia jliyapacao. Niini Zimri nacja talricanaati jliapodam. ¹¹ Zimrri iniita cádanacoena italricanataca njite lriofa kena talricanati iofacawa naco, lrinaa nainoca pjiomi njaji Baasa iipaneta. Corrim lricadaa caafi pada atsia Baasa ipaneeta inacjoité dalri, nanacjoite njaji lrikitsiñape o njaca njaji lrikiñapeji pia inacjoité perri. ¹² Zimri iwayaketa matsiape Baasa iipaneta, cayotsaji wa Minalri icaite capisho Baasa icjoete inoparrotacada Jehú inomalricjoite, ¹³ naicjaote njaji Baasa imatsicanaa njite lrirri Ela imatsicana icjaote tsacja, nama capoa Iraelnai inaitjaca imatsicanao, niini nakerroataca na Minalri naDiote njaji iraelitanai. ¹⁴ Njaji Ela inacoapana perri, njaji lrinaitjalri, paoketana nadanacawa paperra lrico nanacoapana naco njaji talricanaatinai Irael ricope. ¹⁵ Ventisiete walria oonia talricanaati caami Asa Judá italricanaa, Zimri italricanata siete walriatsa oonia Tirsa lrico. Njite njaji tsolrodaonai aimadan naa naofawa Gibetón rico, nayacalre njaji filisteonai. ¹⁶ Njaji tsolrodaonai ialri iofaa nirse njemica coanca Zimri iwaopia dawacalri rico lrinó carro jliaji talricanaati Ela, njite coanca lriinocan, niini jliadaa jeecoapi pjiomi njaji tsolrodaonai aimadan iwacaacalrio niini, nacaite pjiomi jliaji tsolrodaonai icomandante Omri, jlia carroenacja talricanaati Irael naco. ¹⁷ Niini Omri iawa Gibetón ricjoite, njite pjiomi njaji tsolrodaonai iraelitanai lriinai naa carro nacawainita Tirsa tsolrodaonai sho. ¹⁸ Njite Zimri icapa cádanaco njaaca ianjíi lrinaco jliaji yacaalre Tirsa, ikeena lriacawa lriofacawa taimí dalri rico jliaji talricanaati jlimaitá carro jliaji talricanaati dapana; cayotsa mayamica jliaji talricanaati tiyee ricó. ¹⁹ Cayo jliyapacao naicjaote njaji imatsicanaati lrinaitjalri maatsitsa Dio ipeyajle, lrinaitja capoa Jeroboam icayosho, njite njaji imatsicanaati lrinaitjaji njite lrima nanaitjaca namatsicanao njaji Iraelnai. ²⁰ Njaji Zimri inacoapana perri, njite coanca lriinoca dawacalri ricotsa jliaji talricanaati Ela, paoketana nadanacawa paperra lrico nanacoapana naco njaji talricanaatinai Irael ricope. ²¹ Njite njaji Iraenai njena naoyawaaca yamopocoa. Paco iawa Tibni iinai, Ginat irri jlia carro tja natalricanaa, njite nja pamoyoa naawa Omri iinai. ²² Mitsa njaji aimadan pja icatsa njaji ialriwa Omri iinai naoya njaji ialriwa Tibni iinai. Mitsa mayami Tibni niini Omri nacja talricanaati. ²³ Omri iinita italricanaataca nanaco njaji Iraelnai trentauno walria naco oonia talricanaati caami Asa Judá lrico. Doce walria oonia lritalricanaata Irael naco. Lritalricanata Tirsa lricjoite sei walria oonia. ²⁴ Omri iwenta Semer iinai pada jiipai yeenondalri, lria lrirso sesenta sei liko palraata lricoadawa. Njite lrinaitja pacoa yacaalre lrinaco jliaji jiipai yeenondalri Samaria dalri iipitana, Semer iipitana icjaote, jliaji jiipai iminalrim pia iinita. ²⁵ Omri inaitja maatsi Dio ipeyajle, maatsi pja naoya njaji paana talricanatinai lripjeyadape. ²⁶ Lrinaitja cayoji Jeroboam inaitja capisho, Nabat irri njite njaji imatsicanati lrinaitjaji catsa lrimalri nanaitjaca namatsicanao njaji Iraelnai, lrikerroatalrina icjaote wa Minalri, naDiote njaji Iraelnai, na idolon icjaote. ²⁷ Njaji Omri inacoanaperri, naji lrinaitjaji, jlida lricañjatalri nacapa oowi ricó paoketana nadananda lrico paperra Iraelnai italricanaa inacoana perri naco. ²⁸ Mayami Omri njite nadawani lripjeyadampepia iinai Samaria lrico, njite lrirri Acab italricanata jliapodam. ²⁹ Trenta tre walria naco oonia talricanati caami Asa Judá lrico, Omri irri Acab iinita italricanataca nanaco njaji Iraelnai. Omri irri Acab italricanata Irael naco Samaria lricó ventido walria oonia. ³⁰ Omri irri Acab, inaitja maatsi Dio ipeyajle, maatsi pja naoya njaji lripjeyadapem. ³¹ Corri capishotsa coadaca Acab irso lrinaitjca njaji Nabat irri Jeroboam imatsicanaalri, niini jlitaca lriinowa rsoaji Jezabel, Etbaal iito natalricanaa njaji sidonionai. Acab iáa manawa lriá carro matsiadalri Baal irso, lricoanja manawa lripeyalre. ³² Lrinaitja pada pana panti Baal irso Samaria lrico njite lrinaitja pada altar lrirso lrirricoda. ³³ Lrinaitja tsacja Asera jinapjia. Aima pja njaji imatsicanaati Acab inaitjalri lriomeetá carro wa Minalri iirroa, naDiote njaji Iraelnai, matsina pja njaji imatsicanaati lrinaitjalri naoya njaji talricanaatinai lripjeyaperri. ³⁴ Lriwiaca pia talricanaatica Acab, Hiel, Betel njité dalri ipieta pia jirretaca jliaji yacaalrem Jericó. Jlirreta capoa lripieta jliaji yacaalre, mayami lrirri pjerriti Abiram; njite lrinaitja cádanaco yacaalre ipananomao, mayami lrirri iwerriti Segub, cayocarrotsani lricaite capisho jliaji wa Minalri Josoé inoma lricoite, Num irri.