¹ Elía, yacaalre Tisba Galaad lrickoda iaco Acab irso cayoji: ''Caafidalrica jliaji wa Minalri, naDiote njaji Iraelnai, jliaji noemalri ipeyajle, corriotsa iiyá carroca lrirrico walriaca jlaji, o a kjerreca nocaite iiyá caaron.'' ² Caacoca Dio Elía, lriaco cayoji: ³ ''Warsa piawa ajaiteji jerri inotokemajle watsa piawa, podawacaotsa onipaokja Queriat dalri iipitana icodapi, jerri imoto kjemjete ooni Jordán irso. ⁴ Pirraotsa ooni lrioya jliaji onipaokja, njite Nomeenacaotsa njaji waayolri soperri nadee carri pinjao.'' ⁵ Niini Elías iawa njiteo, lrinaitja cayoji Dio icaite capishoi lrirso. Elía iáa iofawa onipaokja Queriat icodapi, jerri imoto kjemjete ooni Jordán irso. ⁶ Njaji waayolri shoperri nadee mana lrirso peete njite maaficalri iipe piyompinaco, caitsacja dainomajle, njite lrirra ooni onipaokja ioya. ⁷ Mitsa aima jalredaoca jiapodamina, jliaji onipaokja lriá meetani corri capoa iiyani jalredaoca lrico. ⁸ Njite caacoca Dio lrirso cayoji: ⁹ "Pjinico piawa Serepta lricojle, njepaite rico njaji Sidón ricope, piofaa watsa niini. Nocaitjenina apama madoiyoam irso rokeñjawá carroatsa pjia nirse.'' ¹⁰ Niini Elía jlinico iawa yacaalre Serepta lricojle, njite lrioca cádanaco jliewao yacaalre ipananoma lrico, lricapa apama madoiyoam iniwaca rotiñjaiwa. Niini lriwanacano, lriaco rorso: ''Pinaitja matsiacalri, pidee norso paapa vaso lrico ooni noirrá carro.'' ¹¹ Njite roá cádanacotoa rooma ooni, Elía iwanano. lriaco rorso: ''Pinaitja matsiacalri, pidee norso picaapi rico apana pan.'' ¹² Mitsa rsoepani, roaco lrirso: ''Ajadalrica caafidalri tsaca jliaji pi Minalri Dio, corri norsoca pawana pan, icaamitsa pada pacaapi icoenatsa harina lriarroda lrico njite jatjaminatsa aceite tazápa lrico. Picapa noniwaca yaamanamitsa tiyeena njoewá carroena noyana noijao nirri iapiya, wawapa carroenatsa mayamíca faa maawitacai sho.'' ¹³ Njite Elía iaco rorso: ''Mafiotsawa, warsena pia pinaitja cayoji picaite capisho, mitsa pinaitja piinita norso pidee carro noinjao. Njitenaotsa pinaitja pja pirsowao njite pirrí irso. ¹⁴ Ima jliaji no Minalri, naDiote njaji Iraelnai, lricaite cayoji: ''Corriotsa canacaí carroca harina lriarroda lrico, njite aceite imotocaotsa tazápa lricjoite, a kjerreca Dio icadaotsa iiyao jiwaca jalredaoca lrico.'' ¹⁵ Njite rsoaji madoiyoam inaitja cayoji Elía icaite capisho rorso, jliapodamjite njaji madalridade nainjacatsa aima jalredaoc nacó. ¹⁶ Corri yaami keetadaca jliaji harina iarroda, corri tsacja yaami aceite imotocawa tazapa lricjoite, caitsaji Dio icaite capisho Elía inoma lricjoite. ¹⁷ Njite jliapodamina jliaji, rirri rsoaji madoiyoam, lriminalri jliaji panti naofaalri irricoda, caifiacani matsina. Matsinaa jliaji ipoati lriyaamirri niini corrinatsa cjaidan. ¹⁸ Niini jlidoa icaite Elía jimi, roaco lrirso: ''¿Pjia atsia, Dio imeenacanda, Cocao jliaji pirsolri nocjoete? ¿Capja pinoca picafieta njaji nomatsicana, njite mayamí carro noenjipe naicjaote? ¹⁹ Njite Elía jiepano, iaco rorso: ''Pia norso pienipe.'' Niini Elía jipa jireeta jliaji iempeti lrinaapa naco lriwaakje carroni. Njite lrideeni lrimaacawa lrico, lricadaa jliaji iempeti iorsoawa lriorsoa carroita rico. ²⁰ Njite Elía itatja cjaida wa Minalri iinai, lriaco: No Minalri Dio, ¿Capja picadaaca rsorrapitaca rsoaji madoiyoam, nofaalri ipana lrico piino capoa roenipe noicjaote?'' ²¹ Njite Elía iorsoawa madalripia lrinaco jliaji iempeti, njite lritatja cjaida wa Minalri iinai caiwi ricotsa, lriaco: ''No Minalri Dio, no tatja piinai caiwi ricotsa. pinaitja matsiacalri, picadaa lricafica idiaca tsenacja lrinaco jliaji iempeti.'' ²² Njite wa Minalri jimica Elía irso, niini lricafica idiaca tsenacja lrinaco jliaji iempeti, njite caafica tsenacjn. ²³ Njite Elía jipa idee jliaji iempeti lrimacawa lricjoite lria carro jlidoa irson, njite lriaco rorso: ''Picapa caafi catsenacja jliaji pienipe.'' ²⁴ Niini rsoaji inarro iaco Elía irso: ''Panaya decja noanjíi pada atsia Dio imeenacandaca pjia, njiite ajádalripeca njaji wa Minalri iaco imotolrio pinoma lricjoite.''