¹ Salomón inaitja ikitsindawa jliaji Faraón, Egipto italricanaa, jlita capoa Faraón iito lriinowa njite lrideeno David iyacalre ricojle lritaita cawiaca lrinaitjaca lriipanao njite Dio iipana macade, njite yacaalre Jerusalén idaanawa lriwaida naco. ² Njite njaji inaiki, naino piacatoa maaficalri yeenondalripe naco nainocawa tsacja narso nja macadawanai catsa, ima corri piacatoa nanaitja padapana panti wa Minalri iipitana nacó. ³ Salomón ipeyo wa Minalri, lrinaitja njaji iacoti jlinirri David icaiterri pia lrirso lrinaitja carró, icaamitsa lrinaitjaca maatsi lrimjaitaca nainai maaficalri nanaco njaji yeenondalripe naco namjaita carroji narso njaji macadawanaitsa. ⁴ Jliaji talricanaati ia manawa Gabaón ricojle lriino carro maaficalri niini, ima icapiatsa pada caaconadalri piaca niini. Salomón imjaita pia lrinaco mil maaficalri. ⁵ Njite apapiena deepi ricó wa Minalri icadaa Salomón icapá carroni jlitapon rico; njite lriaco lrirso cayoji: ''¡Pitatjena noinai coca catsa piomalri, njite nocadaotsa pirson.'' ⁶ Niini Salomón iaco cayoji: ''Corri coancaojli pimatada pirsodalri David irso, ima lrinaitja piaca njaji lrinaitjalri lri cadaa capoa lricaolre pinaco, lrinaitja capoa matsia njite corri lri pacjanta maatsidalri sho lricaolre ricó. Pimatsieta njaji iacoti picaiterri pia lrirso njite picadaa pada lrienipeo iofaacadao lriofaa carroda naco jliapodam iarrontacao. ⁷ Njite panaya, pjia no Minalri Dio, picadaa njoa carro talricanaati njonirri David iarrontacao iempeti cadaana toa njoa, njite corri noanjíi coanca talricanaatica pja. ⁸ Njite jliaji pirsodalri aaniji napecolrico njaji pinaikite aimadan pjienitaji pirsowawa, pana inaiki aimadan corripenatsa pataita paniweetaca. ⁹ Niini piáa watsa pirsodalri irso pada icaolreti canjíikjé dalri lritaitá carroatsa lricaiteca naaconao njaji pinaikite, notaitá carroatsa noanjíica coandalrica jliaji maatsídalri njite matsiádalri naco tsacja. ¹⁰ Niini wa Minalri matsiá jlimica cayoji Salomón itatjá capisho lriinai. ¹¹ Niini Dio iaco lrirso: ''Pitatja capoa cayo, corri cantja pitatja pirsowao piofaa carro wiá jalredaoca lrico, o pitatjá cantja pinaaniwa, o pitatjá cantja jiidati piinó carro njaji picoema, mitsa icaamitsa pitatjalrica pirsowao ianjiikjeti pidenjíi carro matsiá, ¹² caisopa nocadaotsa pirso cayoji pitatja capisho noinai. Nocadaotsa ianjíikjeti picaolre rico pianjíi carroatsa matsia, njite corriotsa pacapa pada caidalri picayosho pipjeya pia njite corri tsacja pjiapodami. ¹³ Mitsa nocadaa tsacjaotsa pirso njaji corrirritsa pitatjalri noinai, pinaaniwa pekirrí dalri njite piaconao, corrí carroatsa pacapa pada talricanaati napecolrico njaji paana talricanaati pjiá cádanaco talricanaati nainai. ¹⁴ Pjiepa cadaa njaji iacoti nonaalri pinaitjaca picjaidaatá carro njaji iacoti nonaalri inaitjaca, cayoji pjinirri David inaitja capisho pia, nocadaotsa wiáa carro piofaacawa jalredaoca lrico.'' ¹⁵ Jlia podami Salomón icafiawa njite lrianjíi jlitapon catsa. Njite dalri lriawa Jerusalén ricojle niini lriemacawa lripeyajle jliaji arca Dio inaitja shopam iacoti lrinaikite iapiya. Lrimjaita njaji maaficalri ofrendao imaodaca kjeti naco, njite lrinja naapiya njaji lrisoperri pjiomi. ¹⁶ Njite dalritsa yaamama inaitjepe ianjiicape macadatsa nacapa jliaji talricanaati njite naoca neemao pripeyajle. ¹⁷ Njite apama nanacjoite naaco lrirso: ''Pjia notalricanaa, sho iinarroca rsoaji njite njoá pada pana lricotsa waofaacawa, njite jiico nooya pada iempeti aacadanacono panti rico. ¹⁸ Njite madalridaa jiapodam jiicocam nooya jliaji iempeti, jiico tsacja royada rsoaji. Njite corritsa cocaca wainai panti rico. ¹⁹ Njite roenipe rsoaji iinarro oopi mayamini deepi rico, ima rorsoacawa lrinaco. ²⁰ Niini deepi pamoyoa, nomaa capem, rsota rocarseta nooya noenipe nocodapí dalritsa iorsoacawa, njite rocadaa lriorsoawa rocóda naco, njite rocadaa jliaji roenipe mayamdalrin nocóda nacó. ²¹ Njite nocafiawa deepi pjatoa nocadá carro lriirra lriinia, corrinatsa caafican, oopi mayamini. Mitsa jaalre keena, nooma nocapa matsián njite noanjíi corricatsa noyaada cani.'' ²² Niini rsoaji aapama roaco rsoepacano: ''Corrina, noyaadatsa jliaji caafirri, piyaadatsa jliaji mayandalrim.'' Njite roaco rsoaji iniita cada icaiteca: ''Pyadaca jliaji mayandalrim, njite noyadaca jliaji caafirritsa.'' Cayotsa caacocana talricanaati ipeyajle. ²³ Njite lriaco narso jliaji talricanaati: Apama inacjoite icaite: ''Noenipe jliaji caafirri, njite piyadaca jliaji mayandalri,'' njite apama icaite: ''pienipeo jliaji mayandalri, njite noyaadaca jliaji caafirritsa.'' ²⁴ Niini talricanaati iaco: ''Idee norso paita matseeta.'' Njite nadeeca talricanaati irso paita matseeta. ²⁵ Njite talricanaati iaco: ''Warsa iyoa pamoyoa caafitsa jliaji iempeti, njite iawatsa peemape narso njaji yaamamade.'' ²⁶ Njite rsoaji iinarro caafidarrotsa ienipe, iaco talricanaati irso, ima kjenaaca rocapaca roenipe irso, niini roaco: ''Pjia no talricanaa, piena rorso jliaji iempeti caafidalritsa, corritsa nooma piinocani.'' Mitsa rsoaji aapama iaco rsoepacano: Ajaca, corriotsa norsowao carrocan, corri tsacja royaadacan. Iyoenani.'' ²⁷ Ninii talricanaati iaco: ''Icadaa jliaji iempeti caafidalri rorso rsoaji iinarro caacorro iinita, corriotsa iinó carrocan. Ima icacatsa jlidoaca.'' ²⁸ Njaji Iraelitanai, njemi cádanaco coanca talricanaati imatsietaca jliaji iacoti, nafiowa pekirritsa lricjoete, nacapa capoa coanca Dio ianjíikje iofawa lrinaco lrimatsieta cádanaco jliaji iacoti.