¹ Njite David ianjii tsoomikena lrioya mayamicalri, niini lricaiteca lrirri Salomón cocaca njaji lrirsolritsa lrinaitjaca, lriaco lrisho: ² ''Tsominatsa nooya mayamicalri, niini picjaidatakenewa. ³ Pjiepaotsa njaji piminalri Dio icaitelri pisho pinaitjá carro, pinaitjaotsa cayoji nacaite capisho njaji iacoti ianjíicada panaco lricadaaji warso, njaji iacoti lrinaampe panaitjá carro, njaji lriwaopiakje ioma capisho waapiya, njite pjiomi njaji iacoti lricaiterri lrinaitja cádanaco iacoti waapiya. Piwapaotsa picapa matsia pinaitja carro njaji iacoti ianjiicape wanaco Moise idananpe, matsia carroatsa pjia pjiomi nanaco njaji pinaitjalriotsa, akjerrecawa catsa piawa, ⁴ wa Minalri itaitá carroatsa inaitjaca cayoji lricaite capisho nonacó: ''Matsia cadaotsa njaji pienipe, njite corri namatada nosho pjiomi nacaolre ricjoite, pjiomi nacafica iapiya tsacja, corriotsa coancaojlicaotsa yaamiotsa natalricanaataca njaji atsianai pinacjoite perri Irael ricó.' ⁵ Pianjii matsia coanca Joab, Sarvia irri inaitja pia norso, njite coanca lrinaitjaca narso njaji yamadan Irael itsolridaotenai icomandantenai irso. Abner, Ner irri irso, njite Amasa, Jeter irri irso, njaji lriinoni. Lriinona corri cádanacotsa nanaitja oowi njite lrinjetacawa neerranam sho lri cintorón naco njite lri tsapaton naco tsacja. ⁶ Canjíkje dalrica pjia, niini picadaotsa mayamica Joab cayoji mayami capisho njaji lrinojim lripjeyao. ⁷ Mitsa, kjena watsa picapaca narso njaji Barzilai galaat tairri ienipenai, picadenaotsa naofaacawa napecolrico njaji pikitsiñapeji injacape piinai pimesan nacó, ima nacoadata pioaca njoa noanji caolri pia nodawaacanjiwa pipjerri Absalón ioya. ⁸ Njite piwaopia niini catoa Simí, Gera irrí Benjamín tairri, icatsa jliaji caacolrica maatsi nonaco jliadaa pia noacawa Mahanaim ricojle. Mitsa jliatsa iino icoadata njoa Jordán ricojle, Njite nocaite wa Minalri naco corricaotsa nonó carroni matseeta sho. ⁹ Mitsa corrinatsa coadaca picadaaca lriofaatoa. Canjiikje dalrica pjia niini pianjii watsa coancaotsa pinaitjaca lriapiya. Picadaotsa naino cani, wadentja mayamican lri pekirrica nacotsa.'' ¹⁰ Caacocaamini, mayami David nainai njaji jliapodamperrim njite nadawani lriyacalre ricotsa. ¹¹ Coarenta oonia David italricanaata piaca Irael nacó. Siete oonia lritalricanaata Hebrón ricjoite njite treinta tre oonia Jerusalén ricó. ¹² Njité dalrina Salomón italricanaata jlinirri David jiapodam, jliá carroena ianjíi talricanaaca naco pjiomi. ¹³ Njité dalri Adonía, Haguit irri ino Betsabé iderse, Salomón jidoa. Roaco lrirso: ''¿Matsiatsa pinoca?'' Njite jliepano: ''Matsiatsa nonoca''. ¹⁴ Njite lriaco rorso: ''Noma nocaiteca pirso pada.'' Njite roaco lrirso: ''Picaite.'' ¹⁵ Niini Adonia icaiteca: ''Pianjintsa noyaadape piaca jliaji talricanaatiapan, njite pjiomi njaji Iraelnai nawapa pia njoaca natalricanaa. Mitsa teecojlenaca panaya ima nowerri kenacja jliaji talricanaati, ima lriyadacani wa Minalri nacjoite. ¹⁶ Panaya nosho pada noomanda piinai, njite corri nooma pimjepataca njoa.'' Njite Betsabé iaco lrisho: ''Picaite.'' ¹⁷ Lriaco rosho: ''Pinaitja matsiacalri, caacoatsa pjia talricanaati Salomón iapiya, ima corriotsa lrimjepatá carrocapjia, lriá carro norso Abisag sunamita tadoa noinowa.'' ¹⁸ Njite Betsabé jiepani: ''Matsiatsa, caacoatsa njoa lriapiya.'' ¹⁹ Ikeena Betsabé iawa talricanaati Salomón icjaolre caaco carro lriapiya Adonia icjaote. Talricanaati Salomón icapa cádanaco shoewacao jlinico jliemao lricoadatá carrono njite lricoanja roicjaolre. Njite lridia lriofaawa lriofaa carroda naco, lrinaa tsacja nadeeca rofaa carrodao shoaji talricanaati jidoa. Niini rofaacawa lriyekjeema nacó. ²⁰ Njite roaco lrisho: ''Nosho pada noomanda piinai, njite corri nooma pimjepataca njoa.'' Njite talricanaati iaco rorso: ''Pitatjena noinai njodoá, corriotsa nomjepatá carroca pjia.'' ²¹ Roaco lrirso: Picadaotsa shoaji Abisag sunamita tadoa, pipjerri Adonia irsono, jlita carro lriinoano.'' ²² Talricanaati Salomón iaco jlidoa irso: ''Coadao pitatja shoaji Abisag amonita tadoa Adonia irso? ¿Coadao corri pitatja nopjerri irsowao jliá carro talricanaati sacerdote Abiatar iapiyao njite Joab, Savia irri iapiyao tsacja?'' ²³ Niini talricanaati Salomón icaite iacoti ajádalri sho Dio naco, cayoji: ''Diowatsa jirrapiteeta njoa nocadaa capoatsa Adonia icaoñaca lricafica sho lricjaote jliaji lritatjalri noinai. ²⁴ Niini panaya Dio icadaaca njoa carro talricanaati Irael nacó, njite lricadaa norso lritalricanaaca jliaji njonirri David, njite lricaite norso njaa carro tsacja talricanaati njaji nonacjoite perri, caishopa jliaji Adonia lrirsotsa mayamica jliada jeecoapica jliaji.'' ²⁵ Niini talricanaati Salomón imeenaca Benaia, Joiada irrí lriinó carro Adonia. Niini Benaia iinoca Adonia. ²⁶ Nité dalri talricanaati iaco sacerdote Abiatar irso: ''Warsa piawa pjipaite ricojle, Anatot. Pirsotsantja mayamica pjia panaya, mitsa corritsa noinó carroca pjia paanaya, ima piwakje piaca jliaji wa Minalri Dio iarcan njonirri David ipjeya njite pjirrapita tsacja cayotsa njonirri jirrapita capisho pia. ²⁷ Cayo piatsa Salomón imotoeta Abiatar lrioya jliaji Dio isacerdoten poacani, lritaitá carro lrinaitjaca cayoji wa Minalri icaitenda pia Elí iipaneta naco Silo ricó. ²⁸ Njite Joab jimi nja iacoti, ima Joab ikitsindata piaca Adonia, mitsa corri piatsa lrikitsindata Absalón. Niini Joab ipitoa Dio iipanaita ricojle njite jlipaacawa altar itsowaita naco. ²⁹ Nacaite talricanaati Salomón irso Joab ipitocawa Dio ipanaita lricojle njite lriaca jlipaacawa altar itsowaita naco. Niini Salomón imeenaca Benaia, Joiada irri lriino carroni. ³⁰ Niini Benaia iawa Dio ipanaita ricojle njite lriaco: "Cai lriaco jliaji talricanaati: 'Pimoto pemajle.''' Njite Joab jiepani: ''Corríi, icatsaotsa mayamica njoa.'' Njite Benaia idiawa talricanaati icjaolre, lriaco lrirso: ''Joab icaite altar naco catsa lrioma mayamicani.'' ³¹ Niini talricanaati iaco lrirso: ''Pinaitjena cayoji lricaite capisho. Piinoni njite pidawaotsani wadentja njonirri iipaneta njite noopaneta tsacja ideeca njaji imatsicanaati lriino capoa njaji inaiki mikjapantsa. ³² Wa Minalri icadaotsa lricaoña carro nacoadao njaji yamadade atsianai matsiaperri pja lrioya lriinoji jliwacatsa lri matseetan sho, Jliaji Abner, Ner irri; nacapitama njaji tsolrodaonai Irael ricoda, Njite Amasa, Jeter irri, nacapiotama njaji tsolrodaonai Judá lricoda. Lriinona dawacaitsa njonirri David ioya. ³³ Niini lridiaca Job icjaolre lricaapiarrom tsa njite nanaco tsacja njaji lrinacjoite perri caidalriwenatsa. Mitsa David inacjoite perri inaco, njite njaji italricanaata cape lrinacjoité perri talricanaati cádanacona, naofaotsa imawadaca kjeti ricó caidalritsa ima wa Minalri catsa icadaa cayoca naifaacawa. ³⁴ Ikeena Joiada irri Benaia iawa lriino carro Joab. Njite lridawani lriipana lricotsa jalrapocolri rico. ³⁵ Niini Salomón icadaa Joiada irri Benaia jliá carroenaca naapiyawalrio njaji tsolrodaonai Irael ricó Job jiapodam, njite lricadaa Sadoc carroenacja sacerdote Abiatar iarrontacao. ³⁶ Njite dalri talricanaati imeenaca naa carro naoma lrirso Simei, niini lriaco lrirso: ''Pinaitja piipanao Jerosalén ricó piofaa carro niinio, njite mamotoatsa njiteo pafe ricojle. ³⁷ Ima coancaojli cadaotsa pimoto njiteo, njite pjiyapawa jiipai pacoacaita cawa Cedrón ricó, pjianjíiwatsa icamicaotsa mayamica pjia. Pjia tsaotsa isho maatsicalri pinacowaacatsa. ³⁸ Niini Simei iaco talricanaati isho: ''Matsiatsa njaji picaiterri. niini jliaji pirsodalri lrinaitjaotsa cayoji picaite capsisho lrirso.'' Niini Simei iofaawa aima oonia Jerosalen ricó. ³⁹ Mitsa madalriwalria iwayaca caawao, yamee Simei irsoperri napitoa Aquís iderse, Maaca irri, Gat italricanaa. Njite nacaite Simei irso Gat ricojleca napito lrioya njaji lrirsoperri. ⁴⁰ Niini simei imatsieta lriborron, njite lripápi lrinaco lriofaa carroita lriá carro Aquís iderse Gat ricojle naicjaote njaji lrirsoperri. Caitsa lriaca lridieta tsenacja njaji lrirsoperri Gat ricjoite. ⁴¹ Njite nacaite Salomón jimi Simei iawa idao Gat ricjoite Jerosalén ricojle, ⁴² talricanaati inaa naa carro naoma Simei lricjaolrewa, njite lriaco lrirso: ''¿Capja corrica nocaiteca pirso wa Minalri iipitana naco, nocaite cádanaco mayamicaotsa pjia pimoto cadaotsa akjerrecatsaji, njite picaite matsiacatsa cayoji nocaite capisho pirso? ⁴³ ¿Coada pimjeepata piacoam njite jliaji iacoti wa Minalri inanda panaitjá carro?'' ⁴⁴ Njite talricanaati iaco pjaa Simei irso: ''Pianjintsa picaolre ricó pjiomi njaji imatsicanaati pinaitjalri njonirri David irso, niini wa Minalritsa, icadaa pjiá carrotsa icaoña njaji maatsirri poinaitjalri. ⁴⁵ Njite cadanaotsa jliaji talricanaati Salomón matsia catsaotsani njite jlinirri David italricanaaca corriotsa lriwayacá carroca wa Minalri ipeyajle.'' ⁴⁶ Niini talricanaati imeenaca Benaia, Joiada irri iino carro Simei.