¹ Ben Adad Aram ricoda, iwaketa pjiomi njaji tsolrodaonai. Niini pia trenta do talricanatinai iwapacape jiipai tsocjoepe lriinai, narso tsacja caballo njite njaji caballo irsocape carreta nanaco. Niini lriaca lridaanata jliaji yacaalre Samaria njite lrinoacawa lricjoete. ² Ben Adad imeenaca inaiki ideecape iacoti Acab irso, Irael italricanaa, lriaco lrirso jliaji ideecada iacoti lrirso: ''Cayo Ben Adad icaiteca: ³ Njaji pipalraatan, piwirrote tsacja noyapecana panaya, cayo tsacja njaji pininai njite njaji pienipe matsiaperri, noyarropeca panayana.'' ⁴ Niini jliaji talricanaati Irael ricoda lriaco lrirso: ''Cayo pedaotsa picaite capisho, pia no minalri, no talricanaa. Piyadaca njoa njite pjiomi njaji norsolri tsacja.'' ⁵ Njite nanao tsenacja njaji ideecaperri iacoti Acab icjaolre, naaco lrirso: Cayo Ben Adad icaiteca: Nomeenacjenina pirso iacoti piá carro norso njaji pipalraatani, piwirrote, pininaipe, pienipenaipe tsacja. ⁶ Tjewaotsa nomeenaca piderse njaji norsoperri cayo kenaotsa jerri, njaa carrotsa iniwa nacaapisho piipana lrico njite naapana lrico tsacja njaji pirsoperri njaji nacapampe matsiaca iipana lrico.'' ⁷ Njite jliaji talricanaati Irael ricoda, lrinaa nanoca lriderse pjiomi njaji pekipenai caconaaperri Irael lricope, lriaco narso narso: ''Inaitja matsiacalri, iwapa icapa matsia coanjeca jliaji atsia iomaca maatsicalri wainai. Lrimeenaca norso iacoti, noá carro lrirso pjiomi njaji noninai, noenipenaipe, nopalraatani, nowirrote, njite njoa corrin noifarroca lrioyana.'' ⁸ Niini njaji pekipenai caconaaperri njite pjiomi njaji inaiki naaco Acab irso: ''Mjemitsa lrirso, manaitjatsa cayoji lrioma capisho pinaitjaca lrirso.'' ⁹ Niini Acab iaco narso njaji ideecaperri iacoti Ben Adad irsoperri: ''Icaite lrirso jliaji nominalri, jliaji notalricanaa. Nonaitjaotsa pjiomi jliaji lritatjalri noinai, njoa lrirsodalri jliaji lriinitalri lritatjalrica noiani, mitsa jliaji lripietalri lritatjaca noinai, corriotsa nonaitjá carrocan.'' Ikeena nadiacawa Ben Adad icjaolre njaji lrirsoperri idecaperri iacoti lrirso. ¹⁰ Njite Ben Adad, idieta iacoti Acab irso, lrinaa nacaiteca lrirso cayoji: ''Nowayaketa caotsa matsiajerri jliaji yacaalre Samaria, ajadalri nocaiteca pirso corricaotsa cocaca pacapa Samaria ioya, corri miketsa lriwayolremi jliaji yacaalre nadee carrontja narsowao nacaapi rico narsowao lrinacjoite njaji nonaikite. Matsiatsa naino cadaa njoa njaji nodiotenai corri cadaa nonaitja cayoji nocaite capisho.'' ¹¹ Njite Irael italricanaa idieta iacoti Ben Adad irso, lriaco: ''Icaite Ben Adad irso cayoji. Manaatsa jiameeta cada sho kena lrianjiacacawa lripjeya toa wainoacacawa.'' ¹² Ben Adad jimi jliaji iacoti lriirra cadaana toa nainai njaji paana talricanaatinai lrinacojleda perri napanaita rico. Ben Adad inaa namatsietaaca carroa, naa carro oowi rico njaji lrinaikite atsianai. Niini, ikena namatsietaacawa nawapá carroenatsa naa carro nainoacawa Samaria icjoete. ¹³ Njite pada inoparrotacada ino Irael italricanaa, Acab iderse, lriaco lrirso: ''Cayo lriaco jliaji wa Minalri: ¿Capja picapaca njaji tsolrodaonai aimadan? Picapaotsa, Nocada caotsa picaapi rico panayana jliadaa jeecoapica jliaji, pianjíi carroatsa icatsa pi Minalrica Njoa.'' ¹⁴ Njite Acab jiepani, lriaco: ¿Coca inacjoite watsa pinaitja cayó? Wa Minalri jliepani lrinoma lricjoite jliaji inoparrotacada, lriaco: ''Nacacjoite watsa njaji talricanaatinai iwapacape yacaalre tsocoepe irsoperri.'' Njite Acab icaite tsenacja: ''¿Cocaotsa iniita jliaji oowi? Njite wa Minalri jliepani lrinoma lricjoite jliaji inoparrotacada, lriaco: ''Pjia watsa iniitan.'' ¹⁵ Niini Acab iwaketa narsoperri njaji talricanaatinai iwapacape yacaalre tsocoepe. Dociento trenta do namaimaca pjiomi. Njite Acab iwaketa pja njaji tsolrodaonai Irael ricope pjuiomi; siete mil namaimaca. ¹⁶ Njaji Iraelitanai nawa naicjaolre dainoma nacojle. Ben Adad irrampe njite lridewana lripanaita lrico naapiya njaji trenta do talricanaatinai lrinacojleda perri, lrinaiperri. ¹⁷ Njite narsoperri njaji talricanaatinai iwapacape yacaalre tsocoepe, naawa napjeya. Mitsa Ben Adad, icadanda icapacaope lricaowa dawacaitsa napecolrico njaji Iraelitanai, nacaite jlimi nano kena njaji atsianai Samaria lricope naicjaolre. ¹⁸ Njite Ben Adad iaco narso njaji lrinaikite: ''Corri panjii nano cadaa matsiacalri rico o nanoca nainoacawa, mitsa jipaotsana caafitsa.'' ¹⁹ Niini narsoperri njaji talricanaatinai iwapacape yacaalre tsocoepe namotoa yacaalre ioya, njite njaji tsolrodaonai nanoca njaapodam. ²⁰ Nacoanaatsa nainoca nacoema, njite njaji arameonai napito Iraelnai ioya, mitsa napineetana. Njite Ben Adad, Aram italricanaa oopi lripito naoya lri caballon naco njite njaji jiecocape nanaco njaji caballo tsacja. ²¹ Ikena jliaji Irael talricanaati Acab, lrimoto nacjoete lriino carrona, lriino nja caballo njite njaji caballo irsocape carreta njapodamjite, lriino aima arameonai niini. ²² Niini jliaji inoparrotaada, ino lriderse jliaji Irael italricanaa, lriaco lrirso: ''Panaya pidienawa, picjaidataacawa, njite piwanjii watsa matsia coancaotsa pinaitjaca, ima pawalria nacoatsa, jliaji Aram italricanaa lrino tsenacjaotsa picjoete.'' ²³ Njaji talricanaati Aram irsoperri naaco lrirso: ''Awacada idioteca jliaji nadiote. Caishopa cjaida pjaacana waoya niini. Mitsa panaya picadaa waa carro wainoacawa nacjoete pacoaca cawa naco jiipai, icatsaotsa cjaida pjaca fa naoya niini.'' ²⁴ Njite pjita njaji talricanaatinai pinacojleda perri iwapacape yacaalre tsocoepe; pjita naoya natalricanaaca picadaa carroenaca capitamanai nanaco njaji tsolrodaonai naarontacao. ²⁵ Pjirreta tsenacja walripe tsolrodaonai nacayosho piatsa njaca nainolri pioya, coshoca nja caballo njite nja carreta tsacja coan piaca namaimaca, waa carroatsa wainoaca nacjoete pacoaca cawa naco jiipai. Icatsaotsa cjaida pjaca fa naoya niini.'' Njite Ben Adad jimi jliaji nacaiterri lrirso, jliepana lrinaitjá carro cayoji nacaite capisho lrirso. ²⁶ Njite pawalria naco iniitacao, Ben Adad iwakeeta njaji arameonai, njite lriacawa Afec ricojle lrinoacá carro nirse nacjoete njaji Iraelnai. ²⁷ Nawacaaca caaminao njaji Iraelnai njite namatsietaacawa nainoacá carro nacjoete. Njaji Iraelnai nawacaacawa nacjoete, mitsa cayoca pacapana nacoema icjoete cayoji yamapoco ovejanai orrai pemi, mjaida pemi nacjoete. Nja cadana njaji arameonai, napacjanta pjiomi jliaji nainoacalriotsa niinio. ²⁸ Njite pada inoparrotacada itsoomita Irael italricanaa, lriaco lrirso: Cayo lriaco jliaji wa Minalri: Nacaite capoa njaji arameonai wa Minalri icjoete, diocani awacada nacotsa, mitsa corrica diocani pacoaca cawa naco jiipai, Nocadaotsa picaapi rico njaji tsolrodaonai aimadan, pianjíi carroatsa Dioca Njoa.'' ²⁹ Niini nawacaacawa, neema nacapacawa nacjoete waca siete jalredaoca. Siete jalredaoca nacoena, ikeena nainita kena nainoacawa. Njaji Iraelnai naino cien mil arameonai padaa nacotsa. ³⁰ Njaji pana njeco napitoa yacaalre Afec lricojle, lriwawa lricojle, njite lriwai jliaji yacaalre jliwacawa nanaco njaji ventisiete mil atsianai namacajim, iacapetja idawaacawa. Mitsa Ben Adad jieco jiewao idawaacawa yacaalre rico, lrianji lridawaacajiwa panticoami. ³¹ Niini njaji Ben Adad irsoperri naaco lrirso: Pjimi kje warso, femi nacaiteca nanaco njaji talricanati Iraelnai riope itaita capetsa kjenaaca icapaca parso. Pinaitja matsiacalri, picadaa feetaca wanacoa wa tsayaniwa tsaco wanapem sho wapapinda waawalre naco, njite wapapi tsacjaotsa fewida naco, waa carroatsa lricjaolre jliaji Irael italricanaa. Pawada cayoca, corri lriino pjia.'' ³² Ikeena njeta natsayaniwa tsaaco wanam napapin naawalre naco njite napapi tsacja njewida naco, njite naawa lricjaolre jliaji Irael italricanaa, naaco lrirso: ''Cayo lrinaa wacaiteca pirso jliaji pirsodalri Ben Adad: ''Pinaitja matsiacalri norso, mainotsa njoa.'' Njite Acab jiepani, lriaco: ''¿Capja caafi catsani?'' Ima nokitsinca jlia.'' ³³ Njite njaji atsianai nawapa nacapa tsia coancaotsa Acab inaitjaca, niini kjeya calrim njeepani, naaco: ''Ajaca, caafirri catsa jliaji pikitsin Ben Adad.'' Niini Acab inaa naaca naoma lrirso Ben Adad, njite lricadaa lriofaca lriinai lri carretan naco caballo nacoda. ³⁴ Niini Ben Adad iaco Acab irso: ''Nodietaotsa pirso pjiomi njaji yacaalre njonirri jitampe pjinirri ioya, njite pikjenanataji pirsowao Damasco lrico, cayoji njonirri inaitja capisho Samaria lrico.'' Niini Acab iaco lrirso: ''Cayo cadaa pinaitjaca iacoti noinai picaite capisho corri noino pjia.'' Ikena Acab inaitja pada iacoti lriinai njitena lricada lridiá carroa. ³⁵ Njite pada atsia profeta, neenipe nacjoite njaji profetanai, lriaco lriprofetan cawerri irso, Dio inaacalre, lriaco: ''Pinaitja matsiacalri, pitoda njoa.'' Mitsa corri jliepani lritodacan. ³⁶ Njite jliaji profeta lriaco lriprofetan cawerri irso: ''Corri capoa pjiepa jliaji wa Minalri iaco, pidiá cádanacoatsa nooya, apana yaawi iinocaotsa pjia.'' Niini cayotsa lricaite capisho. Lridia catsa lrioya apana yaawi imoto lricjaolre, lriinoni. ³⁷ Njite jliaji profeta lrioketa apenacja, lriaco lrirso: ''Pinaitja matsiacalri, pitoda njoa.'' Niini jliaji atsia lritodani njite lrinaitja lriyaonio. ³⁸ Ikeena lriacawa jliaji profeta lriwapá carro jliaji talricanaati inipolrico; njite lripapi trapowana sho lritjí naco lrimatjinaata carrotsa talricanaati ioya. ³⁹ Talricanaati jiyapa cadanao, jliaji profeta iwana lricjaolre, lriaco lrirso: ''Noinoaca cádanacoa jorrecawa pja wacoema, njoa pirsodalri, pada tsolrodao wanacjoite dalri idee norso pada wacoema, lriaco norso: ''Piwapaotsani, mitsa lripito cadaotsa pioya, pjia watsa icaoña picafica sho, o piacaotsa tre mil moneda palraata. ⁴⁰ Mitsa, aima capoa nodenjicalre, corri noema pafetsa, jliaji wacoema, oopi lripitowa. Njite Acab iaco lrirso: ''Cayoatsa picaoñaca pimatsicanaa, cayotsaji picaite capisho pjiwacatsa.'' ⁴¹ Njite, kjeyacalrim jliaji profeta jita lrioyao jliaji trapowanam lripapinada lritji naco, njite jliaji talricanaati Irael ricoda icapa padaca nanacjoite njaji profetanai. ⁴² Niini jliaji profeta iaco lrirso jliaji talricanaati: ''Cayo lricaiteca jliaji wa Minalri: Corri capoa piino jliaji atsia nocadanda picaapi rico, noomanda piinocani, icaamitsa picadaata lriawa, pjia nacjaotsa mayami lrinaco, njite njaji pinaikite, lrinaikite naco.'' ⁴³ Niini Acab idiawa lriipana lricojle lriwaopiakje maatsidalri iapiya njite kerroani, caitsa lriocacawa Samaria lricojle.