¹ Acab ioca icaite Jezabel irso pjiomi njaji Elía inaitjalri, njite coanje lriinoca njaji Baal iprofetaperre matseeta sho. ² Ikeena Jezabel imeenaca pada ideecada iacoti Elía irso, ronaa lricaiteca Elía irso cayoji: ''Cotsa coadaca naino cadaa njoa njaji dionai, o coan cadaa pja nanaitjaca njoa, corri cadaa noino pjia cayoji piino capisho njaji profetanai, ima tjeewena, cayokenaji mayamdalrim kenaotsa pjia.'' ³ Elía jimi cádanco jliaji iacoti, icamitsa jlinico lriá carro lridawaacawa rooya Beerseba lricojle, njepaite lricojle njaji Judá poco, njite lricada jliaji lrirsodalri niini. ⁴ Njite Elía iáa pawa padaa jalreaoca inipolrico jalrapocolri rico, njite lrioca lriofawa apana jaico enebro dalri iipitana iapjite, njite lritatja Dio inai niini mayamí carron, lriaco cayoji: ''Ajena njorrapitaca no Minalri, pjitena nodaki ioya nocafica, ima corritsa matsiadalri pjaca njoa naoya njaji nopjeyadapempia mayamirrina nopjeya.'' ⁵ Niini jliwa lriorsoawa lriapjite jliaji jaico enebro dalri iipitana. Njite cjeyanatsa pada anjele inotani, lriaco lrirso: ''Pjinicoena pinjá carro.'' ⁶ Niini Elía icapa, tsoomi jliwida ioya niinica pan namerritanda torroda naco njite ooni tsacja lriarroda lrico. Niini lrinja, lrirra tsacja njite lridia tsenacja lriorsoawa ⁷ Njite lrino tsenacja yamapia shopena jliaji anjele, lrinotani njite lriaco lrirso: ''Pjinicoa pinja carro, ima jirrapitinaadalri caotsa jliaji inolri picjaolre.'' ⁸ Niini jlinico lrinja, lrirra tsacja, lriá carroena pjawa mitsa cjaida pjena lridaki rico lrinja caami njite kepinacani lrisho jliaji injaodati coarenta jalredaoca, coarenta tsacja deepi atee lriocawa Dio iawacadate Horeb nacojle. ⁹ Lrioca jliewa pafe jalrandalri rico jiipana lrico njite icatsa lriofaa catoa lri ricoda. Njite caacoca wa Minalri lrirso niini, lriaco: ''¿Coampecao pjia anjí Elía?'' ¹⁰ Njite Elía jiepani: ''Maatsi nocapaca narso njaji inaitjacape maatsi no Minalri irso, na Diote njaji cjaidaperri tsolrodaonai, ima njaji inaiki aimadan Iraelnai namacaca jliaji iacoti pinaitjanda naapiya, napeeco njaji altar piyape, naino matseeta sho njaji profetanai pirsoperri. Icaamitsa njoa iomjerri nanacjoite, njite naoma tsacja nainoca njoa.' ¹¹ Njite wa Minalri idieta lrirso iacoti, lriaco: ''Pimoto njiteo, piemá carro lrinaco jliaji jiipana Nopeyajle.'' Ikeena wa Minalri jiyapa niini njite caolri cjaidádalri ioca lrinaco jliaji jiipana, lrimacja nja jiipada ninperri wa Minalri ipeyajle, mitsa corritsa wa Minalrica jliaji ialriwa lri ricoda jliaji caolri cjaidadalri. Jliapodamjite tsa jliaji caolri cjaidá dalri cananica jiipai, mitsa corritsa wa Minalrica niini. ¹² Cananicami jliaji jiipai tiyee nacja jiwao, mitsa corritsa wa Minalri inoca tiyee rico. Njite tiyee jiapodamtsa, pada caolri tacaa dalritsa jliyapa niini. ¹³ Ikena Elía jimica wa Minalri iacoam, cayo cádanaco lriita lriecoa lritsayanalre sho, lrimoto jalramidalri ricjoite njite lrioca lriemawa lrinomafe rico. Njite jlimica apapeco iacoti icaitecada lrirso cayoji: ''¿Cocadao pinaitjalri anji, Elía?'' ¹⁴ Njite Elía jiepani: ''Maatsi nocapaca narso njaji inaitjacape maatsi no Minalri irso, na Diote njaji cjaidaperri tsolrodaonai, ima njaji inaiki aimadan Iraelnai namacaca jliaji iacoti pinaitjanda naapiya, napeeco njaji altar piyape, naino matseeta sho njaji profetanai pirsoperri. Icaamitsa njoa iomjerri nanacjoite, njite naoma tsacja nainoca njoa,'' ¹⁵ Njite wa Minalri iaco lrirso: ''Panaya pidiawa pinolri njite jalrapocolri Damasco lricoda, njite pioca cádanaco nirse piarroatsa timiajai Hazael naco jliá carroatsa talricanaati Aram naco, ¹⁶ piarro tsacjaotsa timiajai Jehú naco Nimsi irri, jliá carroatsa talricanaati Irael nacó, njite piarro tsacjaotsa timiajai Eliseo nacó Safat lrirri Abel Mehola dalri jliá carroenacjaotsa no profetan piarrontacao. ¹⁷ Ima Jehú iinocaotsa njaji iomjerriotsa Hazael imatseetan ioya, njite Eliseo inocaotsa njaji iomjerri Jehú imatseetan ioya. ¹⁸ Mitsa Njoa, Nocadaotsa norsowao nanacjoite siete mil inaiki Iraelnai, njaji corritsa itoda iorsipadao Baal irso, njite corri tsacja natsotoni nanoma sho.'' ¹⁹ Niini Elía imoto njiteo njite lricapa Eliseo, Safat irri, lrideeca docena buey lrideenipe, njite lritatjaca Dio iinai lrinaco jliaji apana piketendalri lridenna. Niini Elía iawa Eliseo icjaolre njite lripeco lritsayanalre Eliseo naco. ²⁰ Njite Eliseo imaca njaji buey jliecó carro Elía jiapodam; Eliseo iaco lrirso: ''Pinaitja matsiacalri picada toa noá carro notsotso nonirri, njodoa tsacja nacacoda naco, njite decjaotsa noa piinai.'' Njite Elía iaco lrirso: Warsena pia picapa naderse, mitsa piwaada lrinaco jliaji nonaitjalri pirso.'' ²¹ Njite Eliseo iawa idiao Elía icjaolre, njite lriino pjiomi njaji buey, lriyana neepe njaji maaficalri nashotsa njaji jaico napapirri nanaco. lriyana caami lriá nainjao njaji inaiki, njite nainjacana. Njitena Eliseo iawa Elía iinai lridenjíi carro lrirso.