¹ Zvaita zvokudini kuti mukore usajeka! Zvaita zvokudini kuti mukore wakaera utsandudzwe! Mapuwe akacheneswa adururwa dera kwemapato eshe. ² Vana vanodikanwa veZioni, vanoedzaniswa nomukore wakaera muuremu, vanoerengwa vakadai ngehari dzedongo, mushando wenyara dzomuumbi! ³ Kunyazwi makechani anoamwisa nokurera vana vawo, asi vanhu vangu vaita mwoyo wakashata, kudai ngemhowani dziri mushango. ⁴ Rurumi rwechiya runonamira kumuromo wedera ngendaa yenyota; ndumure dzinopemha chokudya, asi akuna naumwe unodzipa chiro. ⁵ Avo vakadya zvakanaka vanoparara mumapato; avo vakakura vechipfeka zvakatsvuka vanoata mumirwi yemadota. ⁶ Ngokuti kuororwa kwokushaisha kwevanhu vangu kwakapinda kukura kunokuororwa kwokushaisha kweSodhoma, iro rakaparadzwa ngomukuwo mudoko, kunyazwi akuna nyara yakaiswa padera paro. ⁷ Vatongi varo vaiya vakachenesa kupinda chando, vakachena kupinda mukaka; muiri wavo wakatsvukira kupinda mapuwe anomutengo mukurutu, kun'anikira kwavo kwaiya kwakadai ngokwesafire. ⁸ Zvino hope dzavo dzakasvipa kupinda masimbe; avaziikani mumapato. Ganda ravo raomera kumagodo avo; raoma kudai ngomuti. ⁹ Vanomuchena avo vakaurawa ngeshoti kupinda avo vakaurawa ngenzara, ngokuti ava voperezeka, voda kufa ngokutama michero yomunda. ¹⁰ Nyara dzemadzimai vanenyasha dzabika vana vavo; vakaita kudya kwavo mukuparadzwa kwevanhu vangu. ¹¹ Mambo Mwari wakapedza mushando woushungu hwake; wakadurura ushungu hwake hunotyisa, akabasira muriro muZioni, uwo wakapedza matsikiro aro. ¹² Madzimambo enyika aazi kugonda, nokuti naumwe wevagari venyika, kuti magaa nemapandu vaizopinda pamisiwo yeJerusarema. ¹³ Indaa yezvishaishi zvavaprofeti varo, nokushata kwevapristi varo, vakaparadza ngazi yevakarurama mukati mwaro. ¹⁴ Vakazungaira kudai ngemapofu mumapato, vakadzisvipisa ngengazi, kwokuti apana naumwe waikona kugwama zvokupfuka zvavo. ¹⁵ Vanhu vakadaidzira kwevari vechiti, “Ibvai, mwakasvipiswa! Endai! Endai! Musatigwama.” Ndizvo vakaita minzererekwa nevapepeshekwa; vemadzinza vakati pakati pavo, “Avachazogarimwo nariini. ¹⁶ Mambo Mwari pachake wavaparadzanisa; aachazopinimidzi ndivo; avazi kuremeredza vapristi, avazi kuda vakuru. ¹⁷ Madziso edu akadzerera ngokuangira kuringira kudetserwa kuneavo vasikadetseri; tairingirira dzinza risikakoni kutiponesa. ¹⁸ Vakateera tsoka dzedu, nesu atizi kukona kuhamba mumapato edu; magumo edu akwedzera pasinde; mazuva edu akaerengwa, ngokuti kupera kwedu kwaguma. ¹⁹ Varumbiriri vedu vaikasira kupinda makodzi omudenga; vakatirumbirira padera pemitunhu, vakatihwarira mushango. ²⁰ Wakadzodzwa waMambo Mwari, femero rokupona kwedu, wakabatwa ngehunza dzavo, umwe uwo wetakati ndiye, “Pashi pebvute rake tinozopona pakati pemadzinza. ²¹ Dakara nokudakadzwa, O mwanasikana weEdhomu, iwewe unogara munyika yeUzi; asi kweuriwo tsani iyo inozopinda; unozoradza nokudziita mutitinini. ²² Kuororwa kwokushaisha kwako, O mwanasikana weZioni, kwapera, aachazomurekeri muri muuhloko; asi kushata kwako, O mwanasikana weEdhomu, unozoorora; unozofukura zvishaishi zvako.