¹ Karakadza, O Mambo Mwari, izvo zvatigumira; ringira, uone kutsveruka kwedu. ² Nhaka yedu yapuwa kuvapara, nemhatso dzedu kuvanhutu. ³ Taa nherera nevasina baba, madzimai edu adai ngeshirikadzi. ⁴ Tomwa mvura ngokutenga; huni dzedu toita zvokutengeserwa. ⁵ Mitsipa yedu yaapashi pokuangiridzwa; tinoshanda tisikazorori. ⁶ Tatambanudza nyara dzedu kuvaEgipite nokuvaAsiria kuti tipuwe kudya kwakakwana. ⁷ Madzibaba edu akashaisha, apachina; nesu tatwara zvishaishi zvavo. ⁸ Hloko dzinotonga padera pedu; apana naumwe unotinunura kubva kunyara dzavo. ⁹ Tinoona kudya kwedu ngokupinza kupona kwedu mungozi, ngendaa yeshoti iri mushango. ¹⁰ Ganda redu rasvipiswa kudai ngechiwenda ngendaa yenzara huru. ¹¹ Vakadzi vanobhinywa muZioni, mhandara mumadhorobha aJudha. ¹² Vatongi vanoturikwa ngenyara dzavo; vakuru avazi kuremeredzwa. ¹³ Majaha anoangiridzwa kuti akuye, varumbwana vanothethereka nehuni. ¹⁴ Vakuru vabva pamisiwo yedhorobha, majaha avacharidzi munanzi. ¹⁵ Kudakara kwomwoyo yedu kwapera; kuzvina kwedu kwapinduka kuita kuchema. ¹⁶ Dzungudza rawa kubva pasoro redu; ihehe kwetiri ngokuti tashaisha. ¹⁷ Ngendaa yeichi mwoyo yedu inodemera; ngendaa yeizvi madziso edu anodzerera, aachanasi kuona, ¹⁸ ngendaa yoMutunhu Zioni uwo waita dongo, hava dzinohamba padera pawo. ¹⁹ Asi iwewe, O Mambo Mwari, unotonga mhera nariini; dendemaro rako rinogara kubva kumubarirwana kuenda kumubarirwana. ²⁰ Ngenyi wechitiriyarwa mhera nariini? Ngenyi wechitisiya mazuva mazhinji aya? ²¹ Tipetudze kwouri, O Mambo Mwari, kuti nesu tipetudzwe; musirira mazuva edu kuti adai ngeekare. ²² Asi kuti watiramba yaamho, newe wakanyadzwa tisu kupinda chipimo.