¹ Sure kweizvi zviro Mwari wakareketa kunaAbrama rakauya muchioniso echiti: “Usatya, Abrama, inini ndiri chihlangu chako nemudhairo wako unozowa mukuru.” ² Asi Abrama wakadhaira echiti: “ Mambo Mwari, munozondipeyi, kwechioneka kuti andina mwana, neuwo unogara nhaka yemhatso yangu ndiErieza weDhamasekusi?'' ³ NaAbrama wakawedzera echiiti: “Auzi kundipa mubarirwana, ndizvo hloko yakabarwa mumhatso yangu ndiyo inozogara nhaka yangu.” ⁴ Asi izwi raMambo Mwari rakauya kwaari rechiti, “Uyu munhu aazogari nhaka yako; asi uwo unozobva mumuiri wako ndiye unozogara nhaka yako.” ⁵ Wakamubudisa kubanze, akati, “Ningira mudenga, uerenge nyeredzi, kudai wechikona kudzierenga.” Zvino wakati kwaari, “Ndizvo zvichaita mibarirwana yako.” ⁶ Abrahama wakagonda Mambo Mwari, nakwo kwakaerengerwa kwaari kuti kutendeka. ⁷ Mwari wakati kwaari: “Ndini Mambo Mwari uwo wakakubudisa kubva kuUri revaKharadhea, kuti ndikupe iyi nyika kuita nhaka yako.” ⁸ Abrahama wakavunza echiiti: “ Mambo Mwari, ndinozoita maziireyi kuti ndinozoigara nhaka?”. ⁹ AKati kwaar: “Ndiunzire tsiru rine makore matatu, thokazi rembudzi rine makore matatu, gondohwe rine makore matatu, gora nenjia itsva.” ¹⁰ Wakamuunzira izvi zveshe, akazviadza ngepakati, wakaisa rupande rumwe panorumweni; asi aazi kuadza shiri. ¹¹ Apo makodzi akamata padera pemiiri , naAbrama wakadzidzinga. ¹² Apo zuva roobira, hope huru dzakabata Abrama, chidima chikuru chinotkisa chakawira padera pake. ¹³ Saka Mambo Mwari wakati kunaAbrama, “Zia ngegwinyiso kuti mibarirwana yako inozoita vapfumba munyika isiri yavo. vanozoitwa varanda nekuzotambudzwa makore mazana marongomuna. ¹⁴ Asi ndinozoitonga iyo nyika yevanozoshandira; ngesure vanozobudemwo vane pfuma yakawanda. ¹⁵ Asi iwewe pachako unozoenda kune madzibaba ako mukunyarara unozotsirwa waa musharuka. ¹⁶ Ngemubarirwana wechirongomuna vanozopetukazve pano, ngekuti kushata kwavaAmori akusati kwaperera.” ¹⁷ Apo pakapota zuva, kwasvipa, wona, hari inopwititika chiushi nesasi rinobaka zvakapinda pakati pezvigurwa. ¹⁸ Pazuva iro Mambo Mwari wakaita chitenderano naAbrama echiti: “Ndapa iyi nyika kune mibarirwana yako, kubvira kurwizi rweEgipite, kuguma kurwizi rukuru, rwizi Yufratesi: ¹⁹ nyika yevaKheni, vaKhenizi, vaKadhimoni, ²⁰ vaHiti, vaPherizi, vaRefaimu, ²¹ vaAmori, vaKhenani, vaGirigashi nevaJebhusi.”