^{1 2 3 4 5} . Ngesure kweizvi, mukutonga kwaArthazekizesi mambo wePhesia, Ezura mukororo waSeraia, mukororo waAzaria, mukororo waHirikia, 2. mukororo waSharumu, mukororo waZadhoki, mukororo waAhithubi, 3. mukororo waAmaria, mukororo waAzaria, mukororo waMeraiothi, 4. mukororo waZerahia, mukororo waUzi, mukororo waBhuki, 5. mukororo waAbhishua, mukororo waFinehasi, mukororo waEreaza, mukororo waAroni mupristi mukuru, ^{6 7} uyu Ezura wakakwira kubva Bhabhuroni. Waiya munyori ngwazi mumipango yaMosi, iyo yakapuwa ndiMambo Mwari, Mwari waIsuraeri; namambo wakamupa zveshe zvaakakumbira, ngendaa yokuti nyara yaMambo Mwari, Mwari wake, yaiya padera pake. 7. Vamweni vevana vaIsuraeri, vamweni vevapristi nevaRevhi, vaembi, nevangwariri vemisiwo, nevashandi vomutemperi, vakakwirawo Jerusarema, mugore rechinomwe rokutonga kwaArthazekizesi mambo. ^{8 9 10} . Vakauya Jerusarema ngomwedzi wechishanu, mugore rechinomwe rokutonga kwamambo. 9. Ngezuva rokutanga romwedzi wokutanga, wakaamba kukwira kubva Bhabhuroni, ngezuva rokutanga romwedzi wechishanu wakaguma Jerusarema, ngokuti nyara yenyasha yaMwari wake yaiya padera pake. 10. Ngokuti Ezura waiya aemesa mwoyo wake kuti anase kufundira mupango waMambo Mwari, nokuuita nokudzidzisa zviemeso nezvitongero muIsuraeri. ¹¹ Iyi ndiyo imwe yetsambayo yaakapa mambo Arthazekizesi kunaEzura mupristi, munyori, mudzidzi wemazwi emipango yaMambo Mwari, nowezviemeso zvake kunaIsuraeri: ¹² “Arthazekizesi mambo wemadzimambo, kunaEzura mupristi, munyori wemipango yaMwari womudenga: Kunyarara. Nazvino. ¹³ ndinoemesa chironzo, kuti kunyazwi ndiani wevanhu vaIsuraeri, nokuti vapristi vavo, nokuti vaRevhi, vari muumambo hwangu, vanodzipira ngokwavo kukwira Jerusarema, vaende newe. ¹⁴ . Ngokuti watumwa ndimambo, nemakota ake manomwe, koobvunzisa ngendaa yaJudha neJerusarema, kudai ngomupango waMwari wako uri munyara yako, ¹⁵ nokuenda nesirivha nomukore uwo wakapirwa ndimambo nemakota ake ngomwoyo unoda kunaMwari waIsuraeri, uwo ugaro hwake huri muJerusarema. ¹⁶ Nesirivha nomukore zveshe zvoungaona munyika yeshe yeBhabhuroni, pamwepo nezvipo zvinoduswa zvevanhu vanopa ngomwoyo unoda, nevapristi zvinopirwa ngokuda zvemhatso yaMwari wavo muJerusarema. ¹⁷ Ngemare iyi zvino ukone kunasa kutenga mikono, magondohwe, zvimakwai, nemidiro yavo yezviyo nemidiro yavo yokumwa, uzvipire padera pearita remhatso yaMwari wako muJerusarema. ¹⁸ Kunyazwi ngechiri chinooneka chakanaka kwouri, nokuhama dzako chokuita, ngesirivha nomukore zvinosara mungazviita, kudai ngokuda kwaMwari wenyu. ¹⁹ . Nezvidziyo zvakapirwa kwouri zvemushando wemhatso yaMwari wako, unozozviunza pamberi paMwari muJerusarema. ²⁰ Kunyazwi chiinyizve chinodiwa chemhatso yaMwari wako, icho chinosisira kuti iwewe uchiunze, unozochipa kubva kuupfumi hwemhatso yamambo. ²¹ Inini Arthazekizesi mambo, ndinopanga kwevari vangwariri veshe vepfuma vari ruseri rworwizi, kuti kunyazwi chiinyi chaanoda kubva kwomuri Ezura mupristi nomunyori womupango waMwari womudenga, chiitenyi, ngokunasa kunaka, ²² metsa makumi emazana esirivha, chipimo chekoroni makhirogramu gumi remakumi emazana , maritha evhini makumi emazana mairi , maritha emafuta makumi emazana mairi nezvipimo zvomunyu zvakawandisa. ²³ Kunyazwi chiinyi chinopangwa ndiMwari womudenga, ngachiitwe ngokuda kumhatso yaMwari womudenga, ngokuti ushungu ungazouya padera poumambo hwamambo nevagari venhaka yake. ²⁴ Tinomuziisawo kuti akuzotenderwi kubhadharisa muthero wokutengesa nowepato, kunyazwi ngouri zvawo, kuvapristi, vaRevhi, vaembi, vangwariri vemisiwo, vashandi vomutemperi, nokuti vashandiri vamweni vemhatso iyi yaMwari. ²⁵ Iwewe Ezura, kudai ngoungwaru hwakapuwa kwouri ndiMwari hwounahwo, emesa vatongi nevaguri vendaa, vatonge vanhu veshe vari ruseri rworwizi, avo veshe vanozia mipango yaMwari wako; newe unozodzidzisa avo vasikazii. ²⁶ Veshe avo vasikazopurutani mupango waMwari wako, nemupango wamambo, kutongwa kunozouya padera pavo ngokukasira, kuurawa, nokuti kudzingwa, nokuti kutorerwa upfumi, nokuti kuiswa mutirongo”. ²⁷ Ngaakudzwe Mambo Mwari, Mwari wemadzibaba edu, uwo wakaisa chiro chakadaro mumwoyo mwamambo, kunemesa mhatso yaMambo Mwari muJerusarema, ²⁸ uwo wakandiitira nyasha pamberi pamambo nemakota ake, nepamberi pevakuru vake vanesimba. Ndakagwinyiswa ngokuti nyara yaMambo Mwari, Mwari wangu, yaiya padera pangu, neni ndakaunganidza pamwepo vatungamiriri vaIsuraeri kuti vakwire neni.