¹ Asi mambo Dari wakatara kuti kutorwe zvinyorwa mubhatso mebhabiloni ² . Asi mwaiya muEkhibhathana dhorobha guru munyika yeMedhia umwo mweyakaoneka tsamba yakapetwa, mwaiya mwakanyorwa izvi, “Chinyorwa. ³ . Mugore rokutanga rokutonga kwake, Sairusi mambo wakaita mupango: Ngendaa yemhatso yaMwari muJerusarema, ngaiakiswe, mhatso ndau yevanopira midiro, nemidiro yokupisha peinounzwa urebu hwayo hwepadera huite mamitha makumi mairi nemanomwe nokupamhama mamitha makumi mairi nemanomwe, ⁴ nemisara mitatu yemapuwe makuru, nomusara umwe wematanda; mutengo ngaubhadharwe kubva kuupfumi hwoumambo. ⁵ Zve, zvidziyo zvomukore nezvesirivha zvemhatso yaMwari zvaakatora Nebhukhadhineza kubva mutemperi muJerusarema, akazviunza Bhabhuroni, ngazvihwirinzwewo zvipetudzwe mutemperi muJerusarema, chimwe ngachimwe kundau yacho; unozozviisa mumhatso yaMwari.” ⁶ “Zvino, iwewe Tatenai, mutongi wenyika yoruseri rworwizi, Shethabhozenai, nemwi vamweni vavo, vatumwa vari munyika yoruseri kworwizi, garai kuretu; ⁷ rekerai mushando wemhatso yaMwari uangire; tenderanyi mutongi wevaJudha nevakuru vevaJudha kuti vaakise mhatso iyi yaMwari pandau payo. ⁸ Zve, ndaisa mupango ngendaa yeizvo zvomunosisira kuitira ava vakuru vevaJudha kuti iakiswe iyi mhatso yaMwari; mubhadharo ubhadharwe kuneava vanhu, wakaperera ngokukasira; mare ngaitorwe kubva muupfumi hwoumambo, hwechibaro chenyika yoruseri rworwizi. ⁹ Kunyazwi chiinyi chevanotama, mikono mitsva, magondohwe, nemakwai, okuita midiro yokupisha kunaMwari womudenga, koroni, munyu, vhini, nokuti mafuta, kudai ngokuronza kwevapristi vari muJerusarema, ngazvipuwe kwevari zuva ngezuva; musakorera, ¹⁰ kuti vapire midiro inegwema rakanaka kunaMwari womudenga, nokukumbirira ndaramo yamambo neyevana vake. ¹¹ Zve, ndaemesa mupango, kuti kunyazwi ndiani unozoshandura iri izwi, ngakuduswe sika kubva kumhatso yake, naye ngaaturikwe padera payo; nemhatso yake ngaiite murwi wemadisa ngendaa yeichi.. ¹² Mwari uwo wakaita kuti zina rake rigaremwo, ngaauraye madzimambo eshe nevanhu veshe avo vanozoisa nyara yavo kushandura nokuiparadza iyi mhatso yaMwari iri muJerusarema. Inini Dhariusi ndaemesa mupango: ngauitwe ngokunaka kweshe.” ¹³ Zvino kudai ngeizwi rakatumirwa ndiDhariusi mambo kunaTatenai, mutongi wenyika yeseri kworwizi, naShethabhozenai, nevamweni vavo, vakaita ngokunaka kweshe kudai ngezvaakapanga Dhariusi mambo. ¹⁴ Ndizvo vakuru vevaJudha vakaaka, navo vakabudirira kubudikidza ngokuprofeta kwomuprofeti Hagai naZekharia mukororo waIdho. Vakaaka, vakaipedza, kudai ngokupanga kwaMwari waIsuraeri, nokupanga kwaSairusi, Dhariusi, naArthazekizesi mambo wePhesia. ¹⁵ Nemhatso iyi yakapera kuakwa ngezuva rechitatu romwedzi unozwi Adha, mugore rechitanhatu rokutonga kwaDhariusi mambo. ¹⁶ Vana vaIsuraeri, vapristi nevaRevhi, nevamweni vakapetuka kubva kuuhloko, vakaita dhiri rokupirwa kweiyi mhatso yaMwari ngokudakara.. ¹⁷ Vakapira ngomukuwo wokupirwa kweiyi mhatso yaMwari, mikono zana , magondohwe mazana mairi, zvimakwai mazana marongomuna ; nokuita mudiro wokushaisha wevaIsuraeri veshe, vakapira magotokoto gumi namairi, kudai ngokuwanda kwemadzinza aIsuraeri ¹⁸ Zvino vakaemesa vapristi kudai ngezvikwata zvavo, nevaRevhi kudai ngemabingo avo, kuti vaite mushando waMwari muJerusarema, kudai ngezvakanyorwa mubhuku raMosi. ¹⁹ Ngezuva regumi nemarongomuna romwedzi wokutanga vakapetuka kuuhloko vakangwarira Phasika. ²⁰ Ngokuti veshe vapristi nevaRevhi pamwepo, vaiya vadzichenesa pachavo; veshe pamwepo vaiya vacheneswa. Ndizvo vakauraira gwayana rePhasika reveshe vouhloko vakapetuka, nerevakoma vavo vapristi, neravo pachavo. ²¹ Rakadyiwa ngevana vaIsuraeri, avo vaiya vapetuka kubva kuuhloko, naavo veshe vaiya vabatana pamwepo navo nokudziparadzanisa pachavo kubva kutsvina yemadzinza enyika, kuti vadire Mambo Mwari, Mwari waIsuraeri. ²² Ngokudakara vakaita dhiri rechingwa chisina mumera mazuva manomwe; ngokuti Mambo Mwari wakavaita kuti vadakare, naye wakatenderudzira mwoyo wamambo weAsiria kwevari, kuti agwinyise nyara dzavo kumushando wemhatso yaMwari, Mwari waIsuraeri.