¹ Naapo Mordhekhai azia zveshe zvakaitwa, Mordhekhai wakabaura zvokusimira zvake, akapfeka masaka akadziisa marota, naye akabuda akaenda pakati pedhorobha, akaboorera ngeizwi guru rinenheruso. ² Wakakwira metsa pamusiwo wamambo, ngokuti paiya pasina naumwe waitenderwa kuti apotere pamusiwo wamambo akapfeka machira emasaka. ³ Munyika dzeshe apo pewakaguma mupango nomutemo, kwaiyapo kuchema kukurutu pakati pevaJudha, kuera kudya, kutsumba nokuboorera; nevazhinji vavo vakaata pashi vakapfeka machira emasaka nokudziisa marota. ⁴ . Naapo varandakadzi vaEsita nemithenwa yake vakauya vakamuronzera, vahosi vakasvipa mwoyo kakurutu; naye wakatumira Mordhekhai zvokusimira, kuti aduse machira ake emasaka kubva kwaari; asi aazi kuzviashira. ⁵ Zvino Esita wakadaidza Hathakhi, umwe wemithenwa yamambo, uwo wakaemeswa kuti amushandire, naye wakamupanga kuti aende kunaMordhekhai, azwe kuti chiinyi chiri kuitika, nokuti ngenyi. ⁶ Hathakhi wakabuda kuenda kunaMordhekhai paruwanze rwedhorobha pamberi pemusiwo wamambo, ⁷ naMordhekhai wakamuronzera zveshe zvakaitika kwaari, nouwandu hwemare yaakagondisa Hamani kuti unozoibhadhara kuupfumi hwamambo yokuparadzwa kwevaJudha. ⁸ Mordhekhai wakamupawo tsamba yomutemo wakanyorwa, wakabudiswa muSusa kuti vaparadzwe, kuti aionise kunaEsita, nokududzira kwaari, nokumupanga kuti aende kunamambo kuti aite mukumbiro kwaari, nokuti amupote ngendaa yevanhu vake. ⁹ Hathakhi wakauya, akaronzera Esita mazwi aMordhekhai.. ¹⁰ Zvino Esita wakaereketa kunaHathakhi, naye wakapa kwaari izwi raienda kunaMordhekhai echiti, ¹¹ “Varanda veshe vamambo, nevanhu veshe venharaunda dzenyika dzamambo, vanozia kuti kunyazwi ndiani mwamuna nokuti mukadzi unozopotera kunamambo mukamera repakati, asikazi kudaidzwa, pane chironzo chimwe kuti aurawe. Kwega uwo waanomirudzira mambo ndonga yomukore, kuti apone. Inini pachangu andizi kudaidzwa kuti ndipotere kunamambo aya mazuva makumi matatu.” ¹² Naapo pevakaronzera Mordhekhai mazwi aEsita, ¹³ Mordhekhai wakavaronzera kuti vapingure Esita echiti, “Usapinimidza pachako kuti unozopokonyoka mungome yamambo, kupinda vamweni vaJudha veshe. ¹⁴ Ngokuti kudai wechiramba wakanyarara panguva iyi, kusunhurwa nokuponeswa kunozouya kuvaJudha kubva kundau imweni, asi iwewe nemhatso yababa ako munozourawa. Ndiani ungazia kuti pamweni iwewe wakaunzwa muumambo ngendaa yenguva yakadai?” ¹⁵ Zvino Esita wakapanga kuti vapingure Mordhekhai vechiti. ¹⁶ “Endai, muunganidze pamwepo vaJudha veshe vomunoona muSusa, muere kudya ngendaa yangu, musikadyi nokuti kumwa mazuva matatu, usiku nemasikati. Inini nevarandakadzi vangu tinozoerawo kudya kudai ndimwi. Ngesure kweizvo ndinozopotera kunamambo, kunyazwi kurwisana nechironzo kudaro; kudai ndechifa, ndafa”. ¹⁷ Zvino Mordhekhai wakaenda, akaita kudai ndizvo zveshe zvaakamupanga Esita.