¹ Ngesure kweizvi zviro mambo Ahasuerusi wakakudza Hamani mukororo waHamedhatha muAgagi, akamukurisa kakurutu, akaemesa chigaro chake padera pevakuru veshe avo vaiya naye.. ² Nevaranda veshe vamambo, vaigara pamusiwo wamambo, vakadzikotamisa pashi, kuremeredza Hamani; ngokuti mambo waiya akapanga kudaro ndiye. Asi Mordhekhai aazi kudzikotamisa, nokuti kumuremeredza. ³ Zvino varanda vamambo vaiya pamusiwo vakati kunaMordhekhai, “Ngenyi usikapurutani kupanga kwamambo? ” ⁴ Naapo vaiereketa kwaari zuva ngezuva, naye aazi kupurutana kwevari, vakaronzera Hamani, kuitira kuti vaone kuti mazwi aMordhekhai anodetsera here; ngokuti iye waiya akavaronzera kuti muJudha. ⁵ Naapo Hamani aona kuti Mordhekhai aazi kudzikotamisa, nokuti kumuremeredza, Hamani wakazara ngoushungu. ⁶ Asi wakapinimidza kuchiita chiro chisina shwiro kuuraya Mordhekhai ega. Ndizvo aiya aronzerwa dzinza raMordhekhai, Hamani wakaronga kuuraya vaJudha veshe, dzinza raMordhekhai, mukati mwoumambo hweshe hwaAhasuerusi. ⁷ Mumwedzi wokutanga unozwi mwedzi waNisani, mugore regumi nemairi rokutonga kwamambo Ahasuerusi, vakakandira Puri, ukwo kunoronza kuti mabhigidha, pamberi paHamani, kukheta zuva nomwedzi, nemabhigidha akabata zuva regumi nematatu emwedzi wegumi nemiiri, uwo unozwi Adha. ⁸ Zvino Hamani wakati kunamambo Ahasuerusi, “Varipo vanhu vamweni vakapararira vanopepesheka pakati pevanhu veshe voumambo hwako; mitemo yavo yakasiyana neiyo yevanhu vamweni veshe, avangwariri mitemo yamambo; ndizvo avasisiri kuti mambo avatendere. ⁹ Kudai zvechidakadza mambo, ngakuemeswe mutemo wokuurawa kwavo: neni ndinozobhadhara makhirogramu mazana matatu nemakumi marongomuna emakumi emazana (340,000) esirivha munyara dzaavo vanoita uwo mushando, kuti vaaise muupfumi hwamambo.” ¹⁰ Ndizvo mambo wakadusa ndandazi yake kubva munyara yake, wakapa kunaHamani mukororo waHamedhatha muAgagi, gaa revaJudha. ¹¹ Mambo wakati kunaHamani, “Mare inopuwa kwouri, nevanhu, kuita kwevari kudai ngezvinooneka kwouri zvakanaka.” ¹² Zvino vanyori vamambo vakadaidzwa ngomwedzi wokutanga ngezuva regumi nematatu rawo, mutemo wakaemeswa kudai ndizvo zveshe zvaakapanga Hamani, ukanyorwa kumadzimambo, vatongi, nokunduna dzaiya padera penyika dzeshe kudai ngokunyora kwavo, nokuvanhu veshe kudai ngendimi dzavo; ukanyorwa muzina ramambo Ahasuerusi dzakanyorwa tsamba, dzakanamiswa ngendandazi yamambo. ¹³ Tsamba dzakatumirwa nenhumwa kunyika dzeshe dzamambo kuti vaparadze nokuuraya, nokuita kuti vapere, veshe vaJudha, veshe vadoko navakuru, madzimai nevana ngezuva rimwe, pazuva regumi nematatu romwedzi wegumi nemiiri, uwo mwedzi unozwi Adha, nokuchakata upfumi hwavo. ¹⁴ Imwe yezvakanyorwa zvaiya mutemo yakapuwa kunyika dzeshe ukadaidzirwa kuvanhu veshe, kuti vaite vakanasirirwa metsa iro zuva. ¹⁵ Nhumwa dzakaenda ngokukasira kudai ngomupango wamambo, mutemo waunzwa mungome yeSusa. Mambo naHamani vakagara pashi kumwa; asi dhorobha reSusa raiya mukukangaidzwa.