¹ Ngesure kweizvi zviro, apo ushungu hwamambo Ahasuerusi hwapora, wakakarakadza Vhashiti, nezvaakaita, neizvo zvakaemeswa kumuitira ndaa. ² Zvino varanda vamambo vaimushandira vakati kwaari, “Ngakutsvakirwe mambo mhandara itsva dzakanaka. ³ Mambo ngaaemese nduna munyika dzeshe dzoumambo hwake, kuti dziunganidze pamwepo dzeshe mhandara dzakanaka muSusa mungome, kumhatso yevakadzi, muungwariri hwaHegai muthenwa wamambo, mungwariri wevakadzi; ngavapuwe mafuta okucheneswa kwavo. ⁴ Nomusikana wakanaka uwo unodakadza mambo ngaaite vahosi pandau yaVhashiti.” Izwi iri rakadakadza mambo, naye wakaita kudaro. ⁵ Zvino waiyapo muJudha mungome yomuSusa, zina rake raizwi Mordhekhai, mukororo waJairi, mukororo waShimei, mukororo waKishi, muBhenjamini. ⁶ Kishi wakatorwa kubva Jerusarema ngomukuwo woubatwa, uwo wakatorwa naJekhonia mambo waJudha, uwo wakatorwa ndiNebhukhadhineza mambo waBhabhuroni. ⁷ Mordhekhai wakarera Hadhasa, ndikwo kuti Esita, mwanasikana wababamunini ake; ngokuti waiya asina baba nokuti mai, musikana waiya akanaka chimiro chake nokuringirika, uwo waakatora Mordhekhai apo baba ake namai vafa, kuti amungwarire kudai ngemwanasikana wake. ⁸ Ndizvo apo mupango wamambo nezviemeso zvadaidzirwa, naapo vasikana vazhinji vaunganidzwa pamwepo mungome yeSusa, vechingwarirwa ndiHegai, Esita wakaunzwawo mungome yamambo, kuti angwarirwe ndiHegai, mungwariri wevakadzi. ⁹ Musikana uyu wakamudakadza, naye wakaona nyasha dzake; naye wakakasira kumupa mafuta okunakisa ganda rake, pamwepo nezvikoaniswa zvezvokudya zvake, nevasikana vakatsanangurwa vanomwe kubva mungome yamambo; naye wakamuthutisa nevasikana vake kuvaisa mundau yakapindisisa kunaka yevakadzi muharemu. ¹⁰ Esita waiya asati aronza rudzi rwake nokuti hama dzake, ngokuti Mordhekhai wakamupanga kuti asazoronza. ¹¹ NaMordhekhai waihamba zuva rimwe ngarimwe pamberi poruwanze rwemhatso yevakadzi yeharemu, kuti azie ngokugara kwaEsita, nokuti chiinyi chinoitika kwaari. ¹² Zvino yakaguma nguva yokuti musikana umwe ngaumwe apotere kunamambo Ahasuerusi, ngesure apo aiya apedza mwedzi gumi nemiiri yokunasirira, kudai ngemishuma yevakadzi, (ngokuti ndiyo nguva yavo yokudzinasirira kwavo ngemafuta, mwedzi mitanhatu vechizora mafuta emhura, nemwedzi mitanhatuzve vechizora zvinonuhwira nezviro zvimweni zvinonakisa ganda revakadzi. ¹³ Naapo musikana paaipotera kunamambo, kunyazwi chiinyi chaaidisisa chaipuwa kwaari kuti aende nacho kubva kumhatso yevakadzi kuenda mungome yamambo. ¹⁴ Madeekoni waipoteramwo, echibudamwo mangwanani, echipetuka kumhatso yechipiri yevakadzi, yaingwarirwa ndiShaashigazi, muthenwa wamambo, waingwarira mapunha amambo; asaizopetukazve kunamambo, asi kuti mambo akadakadzwa ndiye, naye waizodaidzwa ngezina. ¹⁵ Naapo jana raEsita raguma, mwanasikana waAbhihairi, babamunini vaMordhekhai, uwo waiya akamurera kuita mwanasikana wake, kuti apotere kunamambo, aazi kukumbira chiro ngepabanze peizvo zvaakaemesa Hegai muthenwa wamambo mungwariri wevakadzi. Zvino Esita wakaona nyasha mukuona kwaavo veshe vakamuringira. ¹⁶ Naapo Esita paakatorwa kuenda kunamambo Ahasuerusi mungome yamambo ngomwedzi wegumi unozwi Thebhethi, mugore rechinomwe rokutonga kwake, ¹⁷ mambo wakamuda Esita kupinda vakadzi vamweni veshe, naye wakaona nyasha norudo mukuona kwake kupinda mhandara dzeshe; ndizvo wakamupfekesa dzungudza roumambo musoro rake, naye wakamuita vahosi pandau yaVhashiti. ¹⁸ Zvino mambo wakaitira vakuru vake dhiri veshe nevaranda vake, Dhiri raEsita. Wakaita kuti nyika dzizorore, wakapa zvipo zvizhinji kudai ngoukuru hwoumambo. ¹⁹ Naapo mhandara dzaunganidzwa pamwepo ngokwechipiri, Mordhekhai waiya akagara pamusiwo wamambo. ²⁰ Zvino Esita waiya asati aronza hama dzake nokuti dzinza rake, kudai ngezvaakapangwa ndiMordhekhai; ngokuti Esita wakapurutana kupanga kwaMordhekhai kudai ngezvaaiita acharerwa ndiye. ²¹ Mumazuvawo, apo Mordhekhai akagara pamusiwo wamambo, vairi vemithenwa yamambo, Bhigithana naThereshi, avo vaingwarira misiwo, vakashishwa vakapangana kuuraya mambo Ahasuerusi. ²² Asi bangano rakazwika kunaMordhekhai, naye wakaronzera Esita vahosi; naEsita wakaronzera mambo ngezina raMordhekhai. ²³ Naapo ndaa iyi yatsvakisiswa, yakaoneka kuti igwinyiso, veshe vairi vakaturikwa pamuti. Zvakanyorwa mubhuku remishando yemadzimambo yezuva ngezuva pamberi pamambo.