¹ Pazuva rechitatu Esita wakapfeka zvipfeko zvake zvoumambo, naye wakaema muruwanze rwomukati rwengome yamambo, urwo rwakaringirana nemhatso huru yamambo. Mambo waiya akagara padendemaro rake roumambo mungome youmambo, iyo yakaringirana nepamusiwo wengome. ² Naapo mambo aona Esita vahosi akaema muruwanze, wakaona nyasha mukuona kwake, namambo wakamirudzira Esita ndonga yomukore yaiya munyara yake. Ndizvo Esita wakakwedzera pasinde, wakagwama soro rendonga. ³ Mambo wakati kwaari, “Chiinyi chounoda, vahosi Esita? Chiinyi chikumbiro chako? Chinopuwa kwouri kunyazwi rupande rwoumambo hwangu.” ⁴ Zvino Esita wakapingura echiti, “Kudai chechimudakadza mambo, mambo naHamani ngavauye nyamashi kudhiri rendakakunasirira.” ⁵ Zvino mambo wakati, “Unzai Hamani ngokukasira, kuti tiite kudai ngezvaanoda Esita.” Ndizvo mambo naHamani vakauya kudhiri raakanasira Esita. ⁶ Naapo vechimwa vhini, mambo wakati kunaEsita, “Chiinyi chichemo chako? Chinozoitwa kwouri. Nechikumbiro chako chiinyi? Kunyazwi chiri rupande rwoumambo chinozoitwa.” ⁷ Zvino Esita wakapingura echiti, “Ichi ndicho chichemo changu nechikumbiro changu: ⁸ Kudai ndaona nyasha mukuona kwamambo, nokudai zvechidakadza mambo kuti andipe chichemo changu, nokuita kudai ngechikumbiro changu, ngaauye mambo naHamani mangwani kudhiri rendinozovanasirira, neni zvino ndinozoita kudai ngezvaakaronza mambo.” ⁹ Hamani wakabuda ngeiro zuva echidakara anomweya wakanaka. Asi apo Hamani paakaona Mordhekhai ari pamusiwo wamambo, wakamuringira akaona kuti aazi kumumirukira, nokuti kuhuta pamberi pake, akanyangadzwa ndiye Mordhekhai; ¹⁰ zvakanyadaro Hamani wakadzibata, akaenda kanyi. Zvino wakadaidza shamwari dzake, naZereshi mukadzi wake, ¹¹ naHamani wakaronza kwevari ngouthende hwoupfumi hwake, nouwandu hwevakororo vake, nezviro zveshe zvaakapinda kukudzwa ndizvo ndimambo, nenjira yaakamuemesa ndiyo mambo padera pevakuru nenduna dzeshe dzamambo. ¹² NaHamani wakaangira kuronza kuti, “Kunyazwi Esita vahosi aazi kutendera naumwe munhu kuti apotere pamwepo namambo kudhiri raakanasira asi inini pachangu. Mangwanizve inini ndinokokwa ndiye pamwepo namambo. ¹³ Asi izvi zveshe azvingandidetseri chiro, nguva yeshe yendinoona Mordhekhai muJudha echigara pamusiwo wamambo” ¹⁴ Zvino Zereshi mukadzi wake neshamwari dzake dzeshe dzakati kwaari, “Ngakunasirwe muti urebu hwawo huri mamitha makumi mairi nemairi, newe uronzere mambo mangwani kuti Mordhekhai asungirwe padera pawo; zvino potera iwewe ngokudakara pamwepo namambo mudhiri.” Kupanga uku kwakadakadza Hamani, naye wakaita kuti muti uwo unasirwe.