¹ Asi Sauri echifemurika ngoushungu wokuda kuuraya vadzidzi vaMambo, wakaenda kumupristi mukuru, ² akakumbira kwaari tsamba dzokuenda Dhamasekusi, kumhatso dzokudira, kuti kudai echizoona vateeri veNjira iyi, kunyazwi vamuna nokuti vakadzi, waizovaunza vakasungwa Jerusarema. ³ Zvino echihamba wakakwedzera Dhamasekusi. Paripo kujeka kwakauya kwechibva mudenga ⁴ kumutendenedza: “Sauri, Sauri, unonditambudzirenyi?“ ⁵ Naye wakati: “Urianani, Mambo?” Wakati: “Ndini Jesu uwo wounotambudza; kwakakonza kwouri kupunhura zvibaiso zvinopinza. ⁶ Asi iye echihuta nokushama wakati: “Mambo, unoda kuti ndiiteyi?” NaMambo wakati kwaari: “Asi muruka, upinde mudhorobha, naapo unozobuira iwewe izvi zvinosisira kuti uite.” ⁷ Vaissa vaihamba naye vakaema vasikareketi, vechizwa izwi, asi vasikaoni munhu. ⁸ Sauro wakamuruka kubva pashi, naapo abeura madziso ake, aazi kuona chiro; ndizvo vakamubata ngenyara, vakamuunza muDhamasekusi. ⁹ Naye wakaita mazuva matatu asikaoni, asikazi kudya nokuti kumwa. ¹⁰ Zvino waiyamo mudzidzi muDhamasekusi, zina rake raizwi ndiAnaniasi. Mambo wakati kwaari muchioniso: “Ananiasi,” naye wakati: “Ndiri pano, Mambo. ¹¹ NaMambo wakati kwaari: “Miruka uende mupato rinozwi Rakarurama, ubvunze mumhatso yaJudhasi munhu unozwi ndiSauri weTharsusi; ngokuti, ningira, iye unokumbira, ¹² naye waona muchioniso munhu unozwi ndiAnaniasi, echipinda nokuisa nyara dzake padera pake, kuti aonezve.” ¹³ Asi Ananiasi wakapingura echiti: “Mambo, ndakazwa ngevanhu vazhinji ngendaa yomunhu uyu, ngokuwanda kweizvo zvakashata zvaakaita kune vakacheneswa venyu muJerusarema. ¹⁴ Nepano unaro simba raakapuwa ngevapristi vakuru kuti asunge avo veshe vanokumbira ngezina renyu.” ¹⁵ Asi Mambo wakati kwaari: “Enda, ngokuti mudziyo wakatsanangurwa ndini kuti atware zina rangu kune vemadzinza nemadzimambo nokuvana vaIsuraeri. ¹⁶ Ngokuti inini ndinozomuonisa zveshe zvaanosisira kuzotambudzwa ndizvo ngendaa yezina rangu.” ¹⁷ Ndizvo Ananiasi wakaenda, akapotera mumhatso. Echiisa nyara dzake padera paSauri, akati: “Mukoma Sauri, Mambo Jesu, uwo wakaoneka kwouri munjira yewakauya ndiyo, wandituma kuti uonezve, uzadzwe ndiMweya Wakachena.” ¹⁸ Paripo zvakawa kubva kumadziso ake zviro zvakadai ngemagwamba ehove, naye wakaonazve. Wakamiruka, ¹⁹ akabhabhatidzwa, wakadya zvokudya, akagwinyiswa. Sauri wakagareyo mazuva amweni nevadzidzi muDhamasekusi. ²⁰ Paripo mumhatso dzokudira wakachumaira ndiJesu echiti: “Uyu Mwana waMwari.” ²¹ Veshe vakamuzwa vakashamiswa vechiti: “Uyu andiyepi here wakauraya avo vaikumbira ngezina iro muJerusarema? Naye wakauya pano here ngeichi chizato, kuti aende navo vakasungwa pamberi pevapristi vakuru?.” ²² Asi Sauri wakaramba echigwinyiswa, akanasa kugutsa vaJudha vaigara muDhamasekusi, echikohomedzisa kuti uyu Jesu ndiye Kristu. ²³ Nangesure kwemazuva mazhinji apera, vaJudha vakapangana kumuuraya. ²⁴ asi bangano ravo rakaziikanwa kunaSauri. Vakarinda misiwo masikati nousiku kuti vamuuraye; ²⁵ asi vadzidzi vake vakamutora usiku, vakamubudisa ngepaburi reparukumbati, vakamudzasa ari mudendere. ²⁶ Naapo aguma Jerusarema, wakaedza kuti abatanewo nevadzidzi; navo veshe vakamutya, vasikatendi kuti waa mudzidzi. ²⁷ Asi Bhanabhasi wakamutora, akamuunza kune vapostori, wakadudzira kwavari maonere aakaita Mambo munjira, nenjira yaakareketa ndiyo kwaari, nenjira yaaiya akachumaira ngezina raJesu ngokushinga muDhamasekusi. ²⁸ Ndizvo wakagara navo echihamba kupotera nokubuda pakati pavo muJerusarema, akachumaira ngokushinga ngezina raMambo. ²⁹ Wakareketa echiphikisana nevaJudha vaireketa chiGiriki, asi vakatsvaka mazano okuda kumuuraya. ³⁰ Asi apo hama dzazvizia, vakamudzasa kuenda Sizaria, vakamutumira Tharsusi. ³¹ Ndizvo chiara cheshe chaiya muJudhia nomuGarire neSamaria chakaona kunyarara, chikaakiwa, nacho chechihamba ngokumutya Mambo nomukuembedzerwa ndiMweya Wakachena, chakawandiswa. ³² Kwakaitika kuti Petro echihamba kundau dzeshe pakati pavo veshe wakadzaka kune vakacheneswa vaigara Ridha., ³³ Naapo wakaona munhu waizwi ndiAeneasi, uwo waiya akaata mumubhedhi wake makore masere, ngokuti waiya akaoma muiri. ³⁴ Petro wakati kwaari: “Aeneasi, Jesu Kristu unokuponesa; miruka, unasire mubhedhi wako.” Paripo iye wakamiruka. ³⁵ Naavo veshe vaigara muRidha nomuSharoni vakamuona, vakatenderukira kunaMambo. ³⁶ Zvino kwaiyapo muJopa mudzidzi, zita rake raizwi Thabhitha, ukwo kunoti ngokukumuchwa, Dhokasi. Iri dzimai raiya nemishando yakanaka nokukovera zvipo.” ³⁷ Kwakaitika ngaawo mazuva, kuti rakarwara, rikafa. Naapo vaiya varishambidza, vakariisa mukamera romuturika. ³⁸ Ngokuti Ridha raiya pasinde peJopa, vadzidzi vechizwa kuti Petro waiyamwo, vakatuma vanhu vairi kwaari, vechimupota vechiti: “Usanonoka kuuya kwetiri. ³⁹ Petro wakabudisa veshe pabanze, wakagwadama, akakumbira. Akunukukira kunomuiri, akati: “Thabhitha, muka.” Naye wakasvinura madziso ake, naapo aona Petro, wakamuka, akagara. ⁴⁰ Ndizvo Petro wakamiruka, akaenda navo. Naapo aguma, vakamuunza mukamera romuturika; shirikadzi dzeshe dzakaema pasinde pake dzechichema, dzechipangidzira mabhachi nezvokufuka zvaakaita Dhokasi, achiripo navo. ⁴¹ Naye amubata ngenyara yake wakamumirudza. Naapo adaidza vakacheneswa neshirikadzi wakamuisa pamberi pavo echipona. ⁴² Zvakaziikanwa mukati mweJopa reshe, vazhinji vakatenda kuna Mambo. ⁴³ Naye wakagara mazuva mazhinji muJopa nomunhu unozwi Simoni, musukuti.